رد: ياليت تساعدوني برايكم عن وول ستريت تفضلو ربي يحقق كل احلامكم يااااااااااااااااااا
وعليكم السلام ورحمة الله وبركاته ...
أهلين بيكي ياقمر , انا من المدينة زيك , وكمان اعاني من اللغة الانجليزية
بس حأقولك شئ ازا انتي تخصصك انجليزي و4 سنين بتدرسيه وماحسيتي نفسك أستفدتي , تتوقعي معهد من دي المعاهد حتقدري تستفيدي منو شئ , صدقيني بس خساير فلوس مو أكتر لانو اللغة الانجليزية تحتاج ممارسة أكتر من دراسة .
حاولي قد ماتقدري تمارسيها أدخلي مواقع ومنتديات أجنبيه واتخاطبي معاهم وحبة حبة حتلاقي نفسك بدأتي تسترسلي الكلام معاهم .
مممم في موقع اسمو بوزو يعلم لغة انجليزية من بين الأدوات اللي يستخدمها للتعليم انو يحطلك مجموعة أشخاص لغتهم الأم الانجليزية وداخلين يتعلمو لغة تانية , يعني زينا داخلين يتعلمو , وانتي تختاري اي احد فيهم وتحادثيه وتدربي معاه , أنا بصراحة حسيت نفسي أستفدت من الموقع دا , ومو بس هوا في مواقع كتير , أسمعي أكتبي رددي خاطبي , حتى مع صاحباتك , او مثلا عندك برنامج sim sim اللي كل الناس آخدتو تسليه إنتي حاولي تحمليه باللغة الانجليزية وأقعدي أهرجي معاه إسمو تتدربي ومحد داري عنك لو غلطتي عشان لا تقولي أتكسف .
صدقيني مافي زي التعليم الذاتي , حاولي قدر المستطاع تعلمي نفسك بنفسك وتأكدي أي شئ دون ممارسة ماراح ينمو ولا يتطوور حتى لو درستي في معاهد امريكية .
دي نصيحتي ليكي ومن مجربة , أتمنى إنك تكوني أستفدتي من كلامي ^ ^
وصحيح على معهد وول ستريت صاحبتي دخلتو تقول انها زادت مهارتها حبتين بس بصراحة أنا ماشفت أي تطور عندها , لأني زيك كنت أفكر أدخل معهد , بس دحين آمنت إيمان تام إنو مافي زي التعليم الذاتي =)
وأي طلب نحنا في الخدمة ياعسل
|