[قاهر الاحزان]

السلام عليكم ورحمة الله وبركاته

ندخل في التفاصيل علطول لانه الوقت يداهمني كما يداهم طلاب دفعه 13

واقصد ان الوقت يحكمكم بخصوص المذاكره + انكم تختارون الترتيب المناسب للكليات اللي تناسبكم

اخوكم طبعا طالب في كلية تصاميم البيئه وهي كلية تختص بالجوانب الهندسه العمرانية والتخطيطية وهي تعتبر كلية هندسه لانها تحتوي على التخصصات الآتيه (هندسه معماريه - هندسة تخطيط- هندسه عمارة بيئه - جيوماتيكس)

طبعا انا هنا ما اقصد اني اسوي دعايه للكلية او شي لا طبعا .. انا بأعرف فيها للي ما يعرفها

المهم ... انا كتبت الموضوع لغرضين .. اول شي النصيحة ! ثاني شي طلب

اولا نصيحتي .. انه لا تدخلوا تخصص الا انتم حابينه .. لا تقولوا لا سوق العمل ومدري ايش ترى لا تنسوا انه الارزاق اولا واخرا بيد الله .. لذلك لا يشغلكم هذا الموضوع وادخلوا الشي اللي تحبونه مهما كانوا الناس يستحقروه !! .. انا كنت ابغا كلية الهندسه العامه لاني كنت ابغا اتخصص هندسة ميكانيكية او صناعيه .. لكن للأسف ما جبت نسبتها .. وبالتالي حولوني على كلية هندسة التصاميم .. وما ارتحت بالكلية ابدا ابدا ابدا !! يعني انا من صغري نفسي اكون مهندس لكن هالنوع من الهندسه اللي حطوني فيه بالتحديد كله يختص بالفكر والديزاين والابداع وانا ما عندي اي توجه لهذه الاشياء !! وانا كملت الترم الاول بالقوة و كله عشان ابوي لا يزعل مني !! والان بداية الترم الثاني قدمت طلب اعتذار لاني حسيت بخنقه ما بعدها خنقه من الكلية .. ماني مقتنع اني اجلس ارسم واجلس اسوي اشكال بالفلين لانه انا اساسا من صغري اكره الرسم !! فبالتالي ولدت عندي حالة من كرة للكلية بشكل مو طبيعي ... رغم انه للمعلومية نتائجي كانت (جدا) مميزه بالترم الاول !! لكن انا ماني مقتنع باللي جالس اسوي وماني مرتاح !! فيه اشخاص فسروا اللي فيني بإنه عين او حسد واعوذ بالله .. لكن انا مستبعد هالشي لاني جبت درجات عاليه .. لكن الموضوع موضوع رغبه !!
وخلاصه كلامي انه اختار تخصص انت تبغاه وتحبه وترغبه ولا تجامل احد على حساب نفسك .. انا دخلت للتصاميم الهندسيه عشان ارضي ابوي واخش هندسه لكن ما ارتحت واعتذرت وهو الان جدا زعلان مني .. لكن ان شاء الله باحول من الكلية وادخل تخصص ثاني وارضيه !

الطلب هو :

انكم تبحثون بشكل جاد عن التخصص اللي يناسبكم فعلا !! فممكن انسان رغبته في شي لكن للأسف هو ما ينفع فيه اصلا .. يكون مثلا انسان يحب الحفظ وطول حياته الدراسيه يمشي بالاختبارات بالحفظ .. انسان زي هذا صعب عليه يدرس هندسه ! وفي المقابل انسان يحب يفهم صعب عليه يدخل طب .. طبعا انا ما اعمم تجربتي .. لكن انا احكي عن واقع حصل لي ولاصدقاء لي ! .. تذكر ان الشي اللي راح تدرسه هو اللي راح تعيش فيه طول حياتك .. لذلك اختار شي ترتاح له

وهنا اتمنى اذا احد يعرف برنامج .. او موقع ... مكان لدورة لتحديد المسار وتحديد التخصص انه يتفضل علينا ويحطه وبكذا يخدمنا كلنا لانه بصراحة لحد الحين انا مو عارف احول لايت كليه ولا اعرف ايش ميولي :(

آسف على الإطاله !