مسا الخير ع الجميع..
أنا زيك حولت خارجي السنه اللي فاتت.. وقبل فتره كتبت رد هنا بس مو مشكله اقولكم ع الاجراءات بزبط عشان توضح لكم الصوره..
اول شي (التاخير في القبول).. من السنه اللي فاتت موجود انا جاني قبول ع نهايه الاسبوع الثاني وبعدين سحبت ملفي الاسبوع الثالت.. وداومت سبت الرابع
الحل: للي مقتنع 100% بالجامعه ويبغى يداوم سريع.. يروح للجامعه ومعاه اوراقه ويقولهم الاستماره أتأخرت وانا وراي دراسه ومحاضرات.. فرع الفيصليه للبنات ما سألوا صحبتي عن النت ع طول قبلوها وسوو اجراءاتها..
* معادله المواد مايسوونها الا بعد مايصير عندك رقم جامعي.. والنتيجه تتطلع بعد اسبوعين من يوم ما تعطيهم توصيف المواد.. وبكل هباله يقولون لك داوم ع جدولك واذا تعادلت ماده راح تلقاها محذوفه من الجدول !!!!
*
للبنات توصيف المواد اعطوه للفرع اللي بتداومون فيه علمي في شرفيه.. وادبي في السلامه..
ثاني شي (ايش الوضع بعد القبول).. ينزل جدول تحضيري تدرسون
تحضيري للاسف ويعادلون المواد المتشابهه.. حتى لو كنت دارس سنتين تخصص بجامعتك.. لكن هناا يعتمد الوضع ع المحول اذا قعد على قلبهم راح يعادلون له اغلب المواد وتصير تدرس ترم وتتخص ترم ثاني (اللي اعرفه الطب التخصص سنوي بس مو مره متأكده).. لكن اللي بيرضى ويستسلم محا يعادلون له الا بالكثير 3 مواد
بقولكم شي صار معايا.. الانقلش عندهم يدرسون كتاب (هيد واي) اربع مستويات.. في جامعتي درست كتاب (تتش ستون) برضو اربع مستويات اوووكي.. لما طلعت نتيجه المعادله الموظفه قالت لي حتبداين من المستوى الثالث.. هنا انا عصبت قلت لها مو على كيفكم دارسه 4 مستويات بمعدل محاضرات 20 ساعه في الاسبوع وتقولين لي سووري بس مستويين اتعادل!!!..
قالت لي: انا مالي دخل مو انا اللي عادلت وفيه اختبار مستوى اذا تبغين.. قلت لها ماراح اختبر مستوى وسألتها مين الدكتوره اللي مسؤوله عن معادله الانقلش.. المهم رحت للدكتوره وحكيتها اللي صار وقلت لها ايش درست وكذا .. هي اتفأجت وقالت لي ليش الموظفه تتكلم من راسهم؟؟ اعطيني اسمها.. المهم كلمت الموظفه قدامي وهزأتها وقالت لها تتصرفون من راسكم وتحددون ع كيفكم بأي صفه؟؟.. الدكتوره اخذت رقمي الجامعي وقالت لي حتتعادل لك في يومين ولا تداومين محاضرات الانقلش!!! وفعلا اتعادلت كل 4 مستويات
تخيلوا لو واحد طيب رضي وسكت عن حقه؟؟
لا تسكتوا عن اي ماده درستوها لا احياء ولا رياضيات ولا فيزيا ولا....... حتى لو كان اسم الكتاب المختلف.. جننوا الموظفين وروحوا للدكاتره الماده نفسها وراح يزبط وضعكم باذن الله..
حتى لو اضطر احد يروح للرجال ويكلمهم (الرجال اسرع في المعاملات).. لا احد يجي يقول والله ما عندي واسطه ماني متكلم.. لااااالاااا.. الواسطه مالها دخل في المعادله.. كل ماطفشتهم كل ما اتعادل اكثثر
.. روحوا ومعاكم توصيف الماده والدرجات.. طولوا بالكم مررره ولا تيأسون..
اي استفسار انا موجوده لا يردكم شي. يارررب اجرائتكم تتسهل وتجيبون اعلى الدرجات يارب *قلب*.. اعرف وضعكم ضغط وتعب لكن ادعوا ربكم كثيررر والله كل شي حيتسهل..