راح اعطيك السالفه من طق طق إلى السلام عليكم
أنا نفس وضعك عانيت نفس المعاناه من كثر الاتصال وارسال معاملات إلكترونية
ولا حياة لمن تنادي ...وآخر شيء قررت أروح بنفسي وانهي إجراءات التخرج
وانا ماكتبت المشاركة هذي إلا بسبب المعاناه اللي حسيت فيها وحبيت أوضح
لك وللطلاب اللي على وجه تخرج وربي يوفق الجميع وعموماً غض الطرف
لأني بدخلك وسط معمه مالها أول من آخر بس إن شاء الله تفيدك
عموما أنت عندك حلين
الأول تحضر بنفسك وهذا أتوقع صعب عليك بحكم بعدك عن منطقة جدة
الثاني تسوي توكيل ( تفويض ) لشخص قريب لك في جدة وتكتب كالتالي
نعم انا ........ حامل بطاقة أحوال رقم ........والرقم الجامعي .......
تخصص ..... مسار ..... لقد فوضت ............
لمراجعتكم وإنهاء كافة
الإجراءات المتعلقة بمسوغات التخرج وله حق التوقيع عني فيما يخص ذلك .
ويكون الخطاب تحت توقيعك وتصديق مديرك في العمل ولا تنسى الختم .
وترسله بريد ممتاز وهو بدوره ينهي كافة الإجراءات .
ولكن الأهم من هذا كله تشوف الساعات للمواد الاختياريه والحره والاساسية
وصورة من بطاقة الأحوال وصورة من جواز السفر عشان يكون الاسم مطابق
باللغة الإنجليزية والبطاقة الجامعية بالمره .
طبعاً ترسله اول شيء للشئون التعليمية مقابل كلية الاقتصاد والإدارة مبنى الأعمال
الدور الارضي يروح للموظفين بالكاونتر ويطلب الخطة بالرقم الجامعي يعطونه
ثلاث اوراق :
الاولى : الخطة الدراسية جميع المواد اللي درستها المكتسبة والمتبقية واللي اخفقت فيها
الثانية : ورقة تعديل الجدول للحذف والإضافة وتقدر تزيد عدد ساعات اكثر من 18
الثالثة : نموذج التخرج
يروح بالورقة الاولى إلى مكتب المسئول عن الإنتساب في نفس الدور الارضي للشئون
التعليمية عشان يشوف عدد الساعات المكتسبة والمتبقية ويسوي لك معادلة للمواد اللي
راح تاخذها في الترم الاخير للتخرج ويوقع عليها بعد كذا يتم ختمها من قبل الموظفين
بالكاونتر اللي استلم منهم الاوراق في البداية بالإضافة إلى تسليمهم الورقة الثانية بعد
تعبئتها حسب المعادلة ويطلب منهم يطبعون الجدول واسماء الدكاتره حسب الشعب
لأن راح يكون عندك مادة بحث وتدريب وعشان ماتتعب من اول وجديد لازم تعرف
مين الدكتور اللي انت عنده في نفس الشعبه .
بالنسبة للورقه الثالثة وهو نموذج التخرج يتم تعبئة الجزء الاول الاسم باللغة العربية
والإنجليزية والتخصص والرقم الجامعي والجوال الجزء الثاني يتم تعبئة من خلال
مكتب السكرتارية بكلية الإقتصاد والإدارة الدور الرابع ومعه الورقة الأولى
( مختومة ) والجدول واسم الدكتور اللي عنده مادة البحث والتدريب
والموظف راح يكمل باقي البيانات ويختم عليها ويعلمك وين مكتب
الدكتور عشان يتم التناقش معاه بخصوص البحث وموضوعه وطريقة
خطواته وكيف يتم التواصل بينك وبينه .
المرحله الاخيرة تاخذ نموذج التخرج ومعاه صورة من الجواز أو بطاقة الأحوال
وتسلمه بعمادة القبول والتسجيل بالدور الثاني في مكتب الإنتساب لكلية الإقتصاد
والإدارة وبعدها يتم تعديل حالتك لطالب متوقع تخرجه .
وأنا اقولك الف الف الف مبروك التخرج مقدماً وربي لا يضيع لك تعب إن شاء الله
ملاحظه مهمة : انا أكثر شيء تعقدت منه في معادلة المواد كان يقول مسئول الإنتساب
اختار مواد اختارية وحرة من كلية غير كلية الإقتصاد وكنت اختارها عشوائي ولا أدري
والسبب ابغى انهي إجراءتي ولو قالو 90 ساعه وافقت
عشان كذا حاول تتطلع على كل المواد وتشوف
وش السهل منها .
بالتوفيق للجميع