[nany ju]

طبعا زي ما شفتو العنوان اليوم كان مناقشة بحثي

انا من شعبة 15 مع الدكتورة سحر رمضان

اللي حصل طبعا جيت على موعدي ولقيت 3 قبلي واحكيلكم الاخطاء اللي شفتها عشان البقية يتعلمو منها

اول وحدة كانت تناقش و جيدة ماشاء الله باين انها ماشية صح بس عكّت معاها في الجزء النظري انها مخليته عايم بدون ما تفصل بشكل واضح بس مشتها سهاله وكانت الظاهر متدربة في مدرسة وموضوعها عن تنظيم المدرسة في استقبال اجتماعات شيء زي كذا .

ثاني وحدة كانت مرة مسكينة حايسة اقوى شيء . اتدربت في مدرسة حكومية و كانت الادارة مرة ماهم متعاونين معاها حتى التقرير اللي مفروض يسلموه مختوم وفي ظرف مقفل ( طبعا هذا مهم لا تنسوه ) , قالولها تحطو مع البحث .و مرة مامشيت على الخطة بحذافيرها فقالتلها عدلي كل شيء وتعالي الاربعاء كذا مرة ماينفع .

ثالث وحدة برضها اتدربت في مدرسة واختارت موضوع كالمعتاد عن الصراع الاداري حاجة زي كذا , المهم طبعا النظري عندها كويس لكن الاستبيان الجدول مرة داخل في بعضه مع النسب والارقام وهذا اللي ماعجبها الدكتورة لانها تبغى قدام كل نسبة تحليل .

نجي لي أنا كان غلطي اني في فصل النتائج والتوصيات ما خليتهم في جدول , لا فصلت كل شيء في صفحة فقامت قالت كذا غلط و خيبتيلي املي في الموضوع لان كل اللي تهتم فيه وتسأل عنه ترى الجزء هذا ( المشكلة - النتيجة ) ,تبغاهم في جدول زي ماهي حاطة في الخطة ( مايجب عليه ان يكون - ماهو قائم - التوصيات )
طبعا سألت اسئلة في كذا صفحة تشوف فيها كلمة تسألك عن معناها وايش تقصدي منها وايش دخلها في المشكلة ...

فطبعا ً حسيت اني زعلت بس ان شاء الله ربي مايضيع تعبي لاني بالفعل حسيت اني طلعت البحث من قلبي , دعواتكم بالتوفيق

والله يسهل للي لسه باقيلو مناقشة