[عبدالله الAL-HARBIحربي]

البارحه من ضيقة الصدر محسوس
غابت علي الشمس بطراف قمه

رجلي على جمرة وكبدي على موس
عامين والثالث على اخر متمه

صديت عن وادي به الحبل ممسوس
وعن وجه ابن عما يهين ابن عمه

ماقلت جعل الروس تفدالها روس
اقول وجهن تمدحه لاتذمه

لكن بيت النمل والذر والسوس
ماهوب بيت اللي كبيرا معمه

ادري مسيري عكس والدرب معكوس
وادري سلاح الداب نابه وسمه

ماكل جاسوسن نسميه جاسوس
لو نعرف اللي كلفه بالمهمه

الناس نبت ضروسها ريش طاؤوس
تفاخرو لين انكر العبد عمه

تنومسو في شي ماهوب ناموس
مثل الصلاه اللي على غير يمه

اللي معه ثروت سنادات وفلوس
ويرهن مقابلهإ كرامه وذمه

يعطيك فالحسناء نداوات ودروس
ويصرفلك الاخلاق من راس كمه

ان عاف ماكن الطمع فيه مغروس
وان طمع في حاجه نسى ابوه وامه

مانوس يالوادي ولا انته بمانوس
مهم ولا فيك حاجه مهمه

اللي على جالك يصيدون جاموس
واللي وراهم ياكلونه بدمه

ذيابتك نجسه وفيرانك نجوس
من طحت بين ايديه وداك فممه

اصنام تبنيها نصارى وهندوس
على قبور الانبياء والاءممه

يامملكت صدري من القوس للقوس
من لا يهمك لاتشيلين همه

جد الولد منحوس وابوه منحوس
جاء من ظهره وقال لبليس سمه

اهون علي اعيش منفي ومحبوس
ولا ينبعث ريح الخيانه واشمه

مانيب دايم رايق اخلاق وهجوس
اما ضويت بكراثه ولا جبتلي مطمه



مدغم ابو شيبه