السلام عليكم ورحمة الله وبركاته .
كيفكم بعد ماخلصتو تحضيري ؟ 
موضوعي باين من عنوانه طبعا كلنا اكيد سكنّا وقفل التسكين .
انا قلت اسوي موضوع للي اختاروها اول رغبه نتجمع ونفيد بعض
كل شخص اختار دي الكلية ليش ؟، و ايش القسم اللي حاب يختاره مستقبلا ..والاسباب؟
واذا احد عنده معلومات عن اي قسم من اقسامها او سمع عن تجربة احد فيها كمان يقولنا :)
لاني بصراحة دخلت مواضيع قسمهم ، حسيتها شبه خاملة يمكن لظروف الاختبارات وكدا .
المهم ...
*الكلية تحوي هذي الاقسام :
تقنية مختبرات / اشعة تشخيصية / علاج طبيعي / تغذية اكلينيكية (هذا للبنات)
اما للاولاد نفس الاقسام ، بدون التغذية .
*مدة الدراسة :
التحضيري + ثلاث سنوات دراسه + سنة امتياز = 5 سنوات.
طبعا دوام البنات في كلية العلوم الطبية التطبيقية حيكون مع الكليات الطبية، مو في الشطر .
*الخطة الدراسية :
تلاقوها في موقع الجامعة لكل قسم حاطين الخطة كاملة
المختبرات:
http://mlt.kau.edu.sa/pages-الخطة-ال...المختبرات.aspx
الاشعة :
http://rad.kau.edu.sa/pages-خطة-دراس...ة-تشخيصية.aspx
العلاج الطبيعي :
http://pt.kau.edu.sa/pages-خطة-دراسية-علاج-طبيعي.aspx
التغذية الاكلينيكية :
http://nut.kau.edu.sa/pages-الخطة-الدراسية.aspx
*بالنسبة للجداول :
جداولهم ثابته تنزلك المواد ، يعني مافي حذف واضافة وما اضافه .
هذي المعلومات اللي عندي واذا كان فيه خطأ ياريت تصححولي .
* الاسباب الشخصية الي خلتني اختارها:
اول شي انا اميل للاقسام الطبية ، احسها تشدني ، مع انه الحمدلله نسبتي حلوة وتدخلني طب وهذا من فضل ربي ، ولكن فيه اسباب كثير تخليني اتراجع عنه واحب الطبية تطبيقية اكثر :
اول حاجة انا انسانه ماعندي استعدااااد اذاكر يوميا .. كذا ما احب ، لكن وقت الجد جددد اروح امسك الكتب وما ارحم نفسي . ادري انه متعب لكن كل واحد وطريقته 
وبكذا الطب ماحيناسبني ابدا . ثاني سبب خلاني اختارها وهو الاهم اني ف هذي الاقسام مارح اتعامل مع المريض بشكل مباشر . يعني الاغلب يكون مع الاجهزة وهكذا .
انا محتارة بين الاشعة و المختبرات ..
هذي الفترة مقررة المختبرات ، لكن الله اعلم لسى قدامنا 3 شهور يمدينا نفكر كويس.
اللي عجبني في المختبرات انه لها ماجستير . يعني لو واحد حب يكمل يمديه .
اخر شي ان شاءالله ننقبل كلنا في الكليات اللي نفسنا فيها ،
واستناكم :)
|
وعليكم السلام ورحمة الله وبركاته
أولاً مبرووووووك خلصتوا السنه التحضيريه وان شااء الله تكونوا مبسوطين من درجاتكم ^^
ثانياً بالفعل المواضيع اللي في قسمنا شويه خامله بسبب ضغط الاختبارات معليش سامحونا
-
انا قسمي مختبرات طبية وطبعاً كل اللي كتبتيه عن الكليه صحيح ماعدا شويه اختلافات بسيطه في الخطة ..
احب اقولك انك اخترتي الشي الصح وان شااء الله باذن الله الكليه تعجبك بس استخيري كويس وقرري ايش تبغي اشعه ولا مختبرات؟
وأي اسئله او استفسارات احنا موجودين ان شاء الله, بالتوفيق يا رب 3>