رد: استفسار بسيط
وعليكم السلام ورحمة الله وبركاته
الصراحة ما عندي علم كم عددهم بالزبط بس ما شاء الله نسب كبيره بتنقبل
ومافي شي اسمو مسار السنه التحضيريه الصحيه ! إنتا تدرس تحضيري موحد مع الكل وعلى حسب نسبتك في التحضيري تخش الكليه اللي تباها
السنه التحضيريه جداً سهله مو زي ما سمعت واتعقدت منها ، بس أهم شي إنك تحرص عالحضور يعني ما تسحب عالمحاضرات وتلعب في النهايه تجي تقول صعبه ومقدر أجيب نسبه ! يعني أهم شي لا تغيب أبداً ولو جاك ظرف صعب مره تقدر تروح لمكتب أستاذك بعدين يشرحلك اللي راح عليك وطبعاً كل استاذ عنده ساعات مكتبيه يحددها ويكون متواجد في مكتبه وقتها عشان يستقبل استفساراتكم وطبعاً وأيام مجددة في الأسبوع على حسب الاستاذ ، وتاني شي كل ما ذاكرت أكثر حتعلى نسبتك أكثر يعني ذاكر أول بأول أفضل ولو واجهتك صعوبه في نقطه معينه ارجع لاستاذك في ساعاته المكتبيه زي ما قلتلك
بالنسبه للمواد تقسم لخطه أ ولخطه ب ، والكل لازم يدرسو الخطتين ، يعني اللي يدرس في الترم الأول خطه أ الترم التاني يدرس خطه ب ، واللي يدرس الترم الأول خطه ب الترم الثاني يدرس خطه أ
بالنسبه لمواد خطه أ:
فيزياء - رياضيات - مهارات اتصال - حاسب آلي * مع الإنجليزي على حسب مستوى كل طالب وممكن يعفى *
أما مواد خطه ب :
كيمياء - إحصاء - أحياء * مع الإنجليزي على حسب مستوى كل طالب وممكن يعفى *
وللإعفاء من دراسة الإنجليزي أي الغاءه من الجدول تقدر تخنبر التوفل أو الايلتس وتجيب الدرجه المطلوبه ، وطبعاً الإنجليزي أربعه مستويات والمستوى الأول ما يخش في المعدل ، والمستوى الواحد يستغرق تدريسه وانهاءه في نصف ترم
وبالتوفيق ولا تنسى الدعاء والوتر
|