[قانع]

المشاركة الأصلية كتبت بواسطة lelou أنا العبارة عمومًا ذكرتني بالناس إللي كل سنة و لا كل 6 شهور تغير كنبها و مطبخها و عفش بيتها كله و ما إلى ذلك.. تقريبًا نفس تفكير مديرتنا.. و حابة أعلق على الأسئلة اللي ذكرتها أ/قانع من وجهة نظري المتواضعة.. من وجهة نظري،، الواحد يمتع و نفسه يآكل و يشرب،، بس مو معناته كل يوم أكل غالي و من مطاعم و فنادق 5 نجوم أو يجيب لنفسه أكل يأكل 5 أنفار و في النهاية الباقي مصيره للقمامة.. هناك الكثيرين ممن لا يجدون لقمة خبز و لا شربة ماء،، فــ لله الحمد على النعمة التي نحن فيها.. // الله الله دي جاتني ع الجرح.. إيوا يا جماعة الله جميل يحب الجمال.. هذا يعني من وجهة نظري الواحد ما يخرج من بيته بمنظر يؤذي عين من ينظر إليه.. بمعنى ما يخرج بلبس مقطع أو متسخ أو غير مكوي،، و هو عنده في البيت غسالة و مكواه و ملابس كويسة.. و لا يخرج و شعره منكوش و هو عنده مشط و كريم شعر و كلبسات و ربطات شعر بالنسبة للإناث.. و لا يخرج من بيته وجهه مو مغسول و كشرته أعوذ بالله.. أو غير مغتسل و عنده يشتري شامبو و شآور جيل و مزيل عرق بدل ما يأذي الخلق برائحته.. الواحد يهتم بلبسه و شكله و بالنسبة للبنات لا مانع من الميك آب الخفيف و للرجال بعض الطيب و هذا شي مستحسن أنه الواحد يكون شكله لائق على الأقل غير مؤذي للعين و ملفت للانتباه.. لكن دا مو معناته أني ما أتعطر بعطر بأقل من 500 ريال و لا أحط على جسمي بلوزة بأقل من 800 ريال و لا ألبس حذاء إلا بسعر خرافي و إلخ.. و اللي يدخل على جسمي ما ينعاد و إذا دخلت فيه بيت ناس ما أدخل فيه بيتهم ثاني.. الواحد يوازن،، يشتري بعض الأشياء الغالية للمناسبات الكبيرة و أقل سعرًا للخرجات العادية و هكذا طبعًا على قد ما الميزانيات تسمح.. و بالنسبة للبنات إللي مستحيل تحط فستان على جسمها أكثر من مرة أو تروح بيه كذا مناسبة،، لو ميزنياتك تسمح أقل شي تصدقي بالفستان أو أعطيه لأحد قريباتك إللي ميزانياتها على قدها،، بكذا تكوني كسبتي الأجر و أفدتي غيرك.. و دا الكلام ينطبق على جميع الملابس و المكياج و أي حاجة،، لو صالحة للاستخدام أدوها غيركم بدل ما ترموها.. خلاص كفاية كثرت هرج في دي النقطة .. يعني ما يكون واحد عنده ملايين و قاعد في بيت حالته مزرية و أثاث الله العالم بحاله،، و أدوات مطبخ لها 30 سنة.. اللي عنده فلوس إيوا يشتري ملابس و أثاث كويس،، بس زي ما قلت سلفًا مو لدرجة انه كل سنة أو نص سنة يتغير و كذا.. لأنه حتى لو ميزانياتكم تسمح تصدقوا،، هذا اللي ح ينفعكم،، أما الدنيا كلها دار فناء.. و الله أعرف واحد قبل فترة بسيطة في نص شعبان تقريبًا توفى الله يرحمه بسبب المرض الخبيث عافانا الله و إياكم.. و كان بيته مغيرين العفش و البوية و الجبوس و البيت متغير من إلى و اتوفي و ما نام في بيته ليلة واحدة.. على الأقل اللي ما يقدروا إلا يغيروا كل سنة يتصدقوا بيه،، رغم أني مو مع تغيير الأثاث كل سنة و أستاء جدًا من دي الناس.. التجديد حلو،، و ممكن نغير اكسسوارات المجلس أو ترتيب الكنب أو نعمل حركات بسيطة و بعد كم سنة نغيره أو ننجده مو كل سنة يتغير.. كل واحد ينظر و يراقب نفسه،، إذا شاف نفسه غير اللي حواليه في الشغلات دي هنــالك سيكون نوع من التبذير.. و المعايير بالنسبة ليا،، تكون الشغلة تنطبق عليها أحد دي الأشياء:/ 1/ غير صالحة للاستخدام البشري.. 2/ قضت عمر طويل و إن كانت لا زالت صالحة للاستخدام ممكن الواحد يمل خصوصًا في الأثاث أو الملابس.. 3/ يكون في إمكانيات مادية بدون تفريط،، يعني ما أروح أتسلف من فلان و علان و أغرق نفسي في ديون عشان أغير كنب أنا أقدر أصبر عليه كمان زيادة إلى أن يفرجها الرب.. دي وجهة نظري المتواضعة و أعتذر على الإطالة،، رغم أنه هناك الكثير الكثير مما يحمله القلب في هذا الموضوع بالذات.. طبعًا ما ذكرت نقطة الناس اللي ما تعبت في الفلوس فبالتالي مو حاسين بقيمتها و قاعدين يبذروا فيها يحسبوها جات من الشارع << قلبي شايل كثير في دا الموضوع.. و أعتذر كمان على الرد الحاد لكن بجد أنا دا الموضوع قلب عليا الكثير من المواجع و الله المستعان.. دمتم بحفظ الله و رعايته||~

شكرا لك اخت لولو

على التعقيب والتفصيل

والموضوع وضع لتبادل المفاهيم فيما بيننا