السلام عليكم ورحمة الله وبركاته
طبعا الكل اللي دخل اختبار ie255 شاف المهزلة اللي صارت واللي ماكان متوقعها لأنه أكيد ذاكر الاختبارات السابقة وشاف أمثلة الكتاب وتعب ولما اختبرنا اليوم تفاجأنا 18 سؤال من أصعب الاسئلة وأمثلة ماشفنا زيها في اختبارات سابقة وفي امثلة الدكاترة والمراجعة وفوق كذا طوييييلة يعني والاختبار ساعتين واقل وياليت بدأ في وقته المحدد واصلا اسهل سؤال يبغاله 6 دقايق على ماتدخل الارقام في الحاسبة وتفتح "البوكلت اللي فيها النسب" وتطلع الارقام وووالخ غير ان بعد ماتسوي ذا كله ممكن تغلط فتضطر انك تعيد كل اللي سويته مرة ثانية وغير ان بعض الاسئلة كثير تفاجأ انو مالقي الجواب مهما سوا وغير انو بعض الاسئلة يحتاج 10 دقايق وتغلط فتضطر تتركه عشان يمديك تحل باقي الاسئلة تحس ان القاعدة في الاختبار (يا انك تحل السؤال صح من اول مرة وبأسرع وقت ولا مستحيل ترجع له ) انا شفت واكيد انتو شفتوا الاختبارات السابقة اللي تنحل في ساعة وحدة من سهولتها وانها جات حسب اللي تعلمناه (مافيها لف ودوران كثير) لكن الميجور ذا كأنهم يقولوا ((أتحداك تحل)) ماني عارف ايش الفايدة !!؟ وياليت تعلموا من غلطة الميجور الاول وايش صار لا بالعكس زادوا الاختبار صعوبة وكأنهم ناوين لنا ولا يبغوا درجات عالية حتى مع الاجتهاد واضافة فوق كذا اللي نعرفه ان اختبارات باقي المواد يجي فيها سؤالين او 3 تحتاج شوية جهد وذكاء عشان تميز الطلاب لكن ذا الاختبار 90% لف ودوران واستنتاجات يبغالها ساعات عشان تفكر فيها والاغلبية طلع من الاختبار وراسه بينفجر 
المهم
لازم كلنا نتفق انهم يعدلوا اوضاع درجاتنا
1-(بونس لا يقل عن 10-8 درجات) ولا يمشونا ب 3 درجات زي الميجور الاول 
أو إعادة للميجور (بأسئلة أسهل واقل ) .
2- مانرضى ان الغلط يتكرر في الاختبار النهائي .
الهمة الهمة ياعيال لازم كل الشعب تتفق ويبلغون الدكاترة والمنسق واذا ما اتفقنا بنشوف اختبار نهائي اصعب واصعب من الميجور الاول والثاني ويطيح المعدل لأنو ماتكلمنا ولا تعدلت درجاتنا وكأننا ولا شئ واحنا مو ناقصين عندنا مواد ثانية نذاكرها
وتذكروا نجتمع نقف نتفرق نسقط !!