عرض مشاركة واحدة
منتديات طلاب وطالبات جامعة الملك عبد العزيز منتديات طلاب وطالبات جامعة الملك عبد العزيز
قديم 03-02-2014, 02:32 AM   #19

MNKOSHA

جامعي

الصورة الرمزية MNKOSHA

 
تاريخ التسجيل: Oct 2009
كلية: كلية الآداب والعلوم الانسانية فرع كليات البنات
التخصص: Psychology
نوع الدراسة: متخرج - تعليم عن بعد
المستوى: متخرج
البلد: جــــدة
الجنس: أنثى
المشاركات: 56
افتراضي رد: بشأن اعتماد و قبول شهادة -التعليم عن بعد- لدى هيئة التخصصات الصحية(تحديث مستمر)

السلام عليكم جميعًا
حابة أشكر أول شي صاحب الموضوع الرائع هذا
جزاك الله كل خير
ثاني شي اش حكايتهم مع الإسبوعين ذي؟؟ كل ما أحد كلمهم قالوا له بعد اسبوعين. أنا للآن رحت الهيئة أكثر من مرة وكل مرة يقولوا لي بعد اسبوعين
بس سببهم في التأجيل على حسب ما قالوا لي أو بالأصح على حسب ما قال لي المسؤول عن التعليم عن بعد هناك ـ نسيت اسمه الصراحة ـ المهم قال لي
انه شبب التأخير والتأجيل هوٌ نيته في عرضه على اللجنة اللي تجتمع كل بعد فترة بعد ما يعمل دراسة على الموضوع وبعدها يعرضها ـ مع العلم انه هذا الموضوع ليه فترة طويلة جدًا يعني من بعد ما اتخرجت السنة اللي فاتت (دفعة 13) ـ قلت له طيب كويس يصير متى ممكن أجيكم ؟ قال لي بعد اسبوعين حيكون في اجتماع للجنة و ح أعرض عليهم الدراسة بس ممكن آخذ نسخة من أوراقك عشان أرفقها في الدراسة؟ قلت له طبعًا ، أوراقي كانت هي وثيقة تخرجي و كشف الدرجات تبعي. المهم صور نسخ ودبسها سوى و قال لي شكرًا و راجعينا بعد اسبوعين بالكثير مع اني ما اوعدك لانه افتكر في شي زي كذا اتقدم فيه طلب قبل كذا و اترفض فحطي فبالك! سألته عن السبب يعني؟ هل في خلل في دراستنا هل في مشكلة؟ في نقص؟ احنا المفروض زي الانتظام بس من بيوتنا ودواماتنا !! قال لي صراحة ما أدري اش مشكلتهم مع هذا الموضوع أنا شخصيًا أشوف أنه أفضل من الانتساب بكثير، وللآن مو فاهم ليش مو معترف بيه هنا !
قلت أوك شكرًا و طلب رقمي لأنه قال لي انه ح يتصل عليًا أكيد سواءً كان جوابهم الرفض أو القبول. خرجت من عنده مبسوطة و متأملة خير على كلامه من غير حتى ما أطلب رقمه لأنه كان هوّ اللي اقترح انه ياخذ رقمي بالأساس وقال انه ح يتصل و حتى أنه دون الرقم على وثيقتي اللي عنده اللي قال حيستخدمها في "الدراسة" تبعه. يعني مافي مجال انه يضيعه أبدًا.

انتظرت و انتظرت و انتظرت و أعطيته فرصة شهر كامل ولسا ما جاني منه أي خبر . بعدها كان عندي ظرف و اضطريت أسافر قبل ما أروح للهيئة ثاني، و قلت خلاص جات من ربنا يمكن فرصة عشان ما استعجل الموضوع و خليها بظروفها ولما أرجع يصير خير إن شاء الله.

رجعت بعد يمكن شهرين و نص ، مازال ما في أي خبر ولا اتصال. طبعًا أنا في اللحظة دي فقدت الأمل في انه يتعب نفسه و يتصل عليا أصلًا بس كنت أشيك على موقع الهيئة لأنه كان قال لي إنه لو في أي خبر ح يكون نازل في الموقع .

المهم.. قررت أروح لهم بس قلت قبل ما أروحلهم أروح للجامعة أول شي
رحت للجامعة و اتكلمت مع أ/ سلافة اللي استغربت الموقف جدًا تم التواصل ـ بعد تععب ـ مع عميد التعليم عن بعد وبعد قرابة اسبوعين رد علينا بخطاب موجه من وكيل الجامعة للشؤون التعليمية أ.د عبدالرحمن بن عبيد اليوبي إلى وكيل وزارة الخدمة المدنية للشؤون التنفيذية وكان الخطاب محدد باسم طالب موجبه انه التعليم عن بعد لقسمنا معترف به. وعلى ما سمعت من الجامعة انه الخدمة المدنية وافقت عليه و انه القرار ح يوصل للهيئة خلال "اسبوعين" بالكثير . انبسطت و طلبت نسخة من الخطاب قالت لي الخطاب راح من أول واتعملت معاملة على أساسه. بس قالت عندي صورة سكان منه ح أرسل لك هيًا على ايميلك.

بعد اسبوعين رحت للهيئة سويت مجنونة وعملت كإني أول مرة أطلب التصنيف، و أنا في الاستقبال اقدم الطلب استلم الموظف وثيقتي عشان يشيك عليها ويعطيني رقم الانتظار وكذا. جلس يتأمل وثيقتي وبعدين لف على الموظف بجانبه وقال له "هوً في تصنيف التعليم عن بعد؟!" رد عليه "مدري والله حولهم على ـ وقال اسم موظف ما أذكره ـ و هوً لسا يتأمل في الوثيقة" . اخذ اسمي وقال لي انتظري الين ما ينادوا عليكِ.

... جاء دوري رحت لموظف جلس يتأمل مرة في أوراقي ومرة في التلفون ومرة في المكتب الزجاجي تبع الإدارة لنص دقيقة يمكن بعدين قال " التعليم عن بعد لسا ما تم اعتماده !! " قلت له كيف ما تم اعتماده وانتوا ليكم فترة تقولوا اللجنة ح تعتمده و الآن عدا كم شهر والمفروض انه المعاملة تمت وخلاص غير كذا معايا خطاب لوزارة الخدمة المدنية بدا الموضوع !!! ـ صراحةً.. ما كنت أبغً اجيب موضوع الخطاب لأنه اعرف انه ماراح ينفعني الآن ع الأقل لانه اذا ح يثبت شي بس ح يثبت أنه الجامعة معترفة بينا و ليس الخدمة المدنية ـ . المهم طلب مني الورقة و بعد ما قرأها قال "والله يا أختي أنا ما أدري عن دا كله أنا بس أعرف انها ما اعتمدت لسا وتقدري تسألي عن دا الموضوع استاذ ـ و قال اسم المسؤول عن التعليم عن بعد عندهم ـ . سألته فينه و قال هناك في الغرفة الزجاج يتكلم تليفون. عرفت وقتها ليش كان يتأمل الباب ذاك من أول. المهم طلبت منه يناديه أول ما يخلص وصراحة ما قصر أول ما خلص مكالمته الطويلة ناداه لعندنا وجاء أخيرًا. شرحت له الوضع وقال لي بكل جلافة مافي اعتماد من جهتنا لسا. (و مشى) ما أعرف اذا كان مشغول فعلا ومشي و أنا اتكلم عشان كذا أو لسبب ثاني صراحة المهم انه حاول يتجنبني وناديته ثاني وووو المهم كلمته عن الخطاب ورد عليا برضه بأسلوب أبدًا مو جيد انه لسا ما وصلهم وقال لي انه احنا من زمان ماشيين في ذا الموضوع حوالي السنة ونص ما راح تجوا انتوا تذكرونا بيه !!
قلت له أنا جيتك قبل كذا وما كان هذا كلامك اخذت أوراقي وقلت انك ح تعرضها ع اللجنة اللي جاية بعد اسبوعين من ذاك الوقت وأخذت رقمي وقلت ح تتصل عليا !!!
قال ايوا أنا في عندي أوراق أح أخذتها عشان الدراسة مدري أوراق مين. قلت له أوراقي ! قال لي طيب؟ قلت له طيب كيف تقول من سنة ونص شغال عليها ؟؟ اي دراسة دي اللي تاخذ سنة ونص و الجهات الرسمية كلها موافقة عليها؟؟ ليش واقفة عند الهيئة ؟ ليش مو سامحين لنا واحنا معترف بينا ؟
طبعًا ما عرف يرد وصرف لي بحكاية انه الموضوع يباله وقت وما اعرف ايش وقلت له طيب الين متى؟ يعني كل بعد فترة لازم اجي لعندكم ؟؟ قال نتصل عليكٍ قلت له معليش المرة اللي فاتت اخذته وما شفت منكم اتصال، معليش تعطيني رقمك هذه المرة؟ بما انك انت المسؤول عن التعليم عن بعد وكذا فالافضل اني اتواصل معاك. (رفض) انه يعطيني رقمه وقال لي "وعد مني ليكٍ أول ما ينزل القرار ح أنزل الخبر في موقع الهيئة بإعلان كبيييير عشان كلكم تشوفوه وترتاحوا " .
المهم و الين اليوم ذا ما شفت لا اعلان كبير ولا صغير في موقعهم المتواضع. و دخلت أدور يمكن في أحد كاتب شي عن الموضوع ولقيت موضوعكم وحبيت فكرته وقلت أشارككم اللي صار معايا. أنا عارفة انه كلامي كان بالتفصيل المملللل وأعتذر إذا طفشتكم.


المهم صراحة أنا أحس دول ما يجيبهم إعلام ورقي هذول يبغالهم اعلام مسموع ومنطوق يعني برامج في التلفيزيون زي (يا هلا، الثامنة والبرنامج الجديد بدون شك) ح يكون وقعها أفضل بكثير من جرايد زي عكاظ وغيرها.
ما اعرف بس قلت ممكن نقدم على دي البرامج بأوراقنا الكاملة والخطابات اللي معانا و يمكن كمان بعض الإحصائيات عن الدفعات المتخرجة واللي ليا يدرسوا واللي ح يتخرجوا و كم عدد الناس اللي ح يتخرجوا لمصير مجهول ما هم عارفين فين يروحوا بعده !

وبس..
أعتذر ع الإطالة .

 

توقيع MNKOSHA  

 

أشكر المدير العام على التعديل
نقرتين لعرض الصورة في صفحة مستقلة

 

MNKOSHA غير متواجد حالياً   رد مع اقتباس