حسب ما فهمت لحد الآن انو القبول ما يوقف على النسبة
اللي فهمتو انو القبول يوقف على عدد المقاعد المتاحة وهادي أصعب :)
مثال :
فلو كانت المقاعد المتاحة مثلا 10
وكانو الطلاب المتقدمين عددهم مثلا 50 ..
فراح ياخدو أعلى درجات ( نسب موزونة ) لـ 10 طلاب ...
خلونا نسميم مثلا الطلاب العشرة الأوائل هههههه
=> فلو كانت أعلى الدرجات ( العشرة ) أقل وحدة فيها 90
راح تكون النسبة الموزونة اللي وقف عندها القبول 90
( والأفضل نقول " أقل نسبة انقبلت السنة الماضية " بدل ما نقول " النسبة اللي وقف عندها القبول السنة الماضية " )
=> ولو كانت أعلى الدرجات ( العشرة ) أقل وحدة فيها 70
راح تكون النسبة اللي وقف عندها القبول 70
وكدا يعني
ولو كلامي اللي فهمتو غلط يا ليت أحد يصححلي :)
وهادا معنى الكلام اللي يقولك نسبتك الموزونة ( الآن ) ما تحدد انك مقبول أو لأ إلا بعد ما يقارنوها مع نسب الطلاب التانيين
يعني حتدخل ( غصبا عنك ) في منافسة مع الطلاب التانيين للفوز بالمقاعد المتاحة ( المحدودة )
فلو كانت نسب المتقدمين لقسم من الأقسام مرتفعة .. معناتو التنافس على المقاعد المحدودة راح يكون شديد .. بالتالي بشكل عام لازم نسبتك تكون مرتفعة زيهم عشان تفوز بالمقعد
ولو كانت نسب المتقدمين لقسم من الأقسام منخفضة .. معناتو التنافس ما راح يكون شديد .. بالتالي بشكل عام نسبتك مو لازم تكون مرتفعة عشان تفوز بالمقعد
ممكن الواحد مثلا يتواصل مع القسم اللي راح يقدم عليه ويستفسر منهم عن عدد المقاعد المتاحة لهادي السنة ...
بالتالي يقدر ياخد فكرة عامة عن درجة شدة/عدم شدة التنافس اللي راح يكون على هادي المقاعد
حوسة الله يعين :)
طبعا اللي بيحصل انو الطلاب عادة بيسألو كم كانت آخر نسبة وقف عندها القبول السنة الماضية للقسم الفلاني
فتتكون عندهم فكرة عن قوة التنافس بين الطلاب السنة الماضية
لكن حسب علمي مافي أحد بيسأل عن عدد المقاعد المتاحة لذيك السنة مقارنة بالمتاحة لهادي السنة
أنا اللي أفكر فيه دايما انو لازم تكون نسبتي الموزونة مرتفعة قدر المستطاع عشان تكون ...
إما ( على الأقل ) مقاربة جدا لنسب بعض الطلاب المرتفعة
أو أعلى منهم ( وهوا الأفضل ) لضمان المقعد
وبما انو معدل البكالريوس أو الماجستير ثابت ما يمكن رفعه
بالتالي اللعب كلو صار في ملعبك من حيث انك تجيب درجة ف القدرات مرتفعة
طبعا مع مراعاة الشروط التانية حسب القسم اللي بتقدم عليه
( فبعضها ما يشترط قدرات لكن فيه اختبار مفاضلة .. وبعضها يشترط خبرة .. وبعضها يفضل التخصص القريب للقسم عن التخصص البعيد .. وبعضها يشترط درجة انجليزي مرتفعة نوعا ما إلخ )
ويمكن الاطلاع على متطلبات وشروط الأقسام من خلال هادي الصفحة :
http://graduatestudies.kau.edu.sa/co...g=AR&cid=98743
بس طبعا ما ننسى مسألة المقاعد المحدودة .. وقوة التنافس اللي حيكون عليها .. وعدد المتقدمين
الخلاصة من كلامنا اللي فوق :
الحكم النهائي في هادي العملية كلها لعدد المقاعد المتوفرة
ربنا يحققلنا اللي نتمناه