رد: وبكم يكتمل اصراري .. طالبة ثانوية
وعليكم السلام ورحمة الله 🙋
مريت على موضوعك بالصدفة وحبيت ادلي بدلوي عسى الله ان ينفعك بكلامي ويوفقك وييسر لك .
بالنسبة للأسئلة الي طرحتيها ...
س : بالنسبة للمقابلة الشخصية يحتاج سيرة ذاتية وما إلى ذلك ؟؟
طبعا بكلمك عن المقابلة الشخصية حقت كلية الطب ..لا مايحتاج سيرة ذاتيه ولا اي متطلبات ثانيه بس يتطلب حضورك واحب ابشرك انها شي عادي
يسير كل سنه ومايردون احد ابدا 😊
س : أولا بالنسبة للأقسام المتاحة للطالبات لديكم ؟؟
الي اعرفه بالنسبة للتخصصات الصحيه في الجامعه متاحة جميعها للطالبات ..غيره ماادري
س : صحيح أن قسم طب الطوارئ أيضا متاح للطالبات ؟؟
نعم متاح
س : سمعت عن الطب الموازي فما هو ؟
عندك في التخصصات الصحيه حاجه اسمها طب وجراحة انتظام ..وطب وجراحة موازي ..طب وجراحة موازي يعني تدرسين الطب بس بدون مكافئة .
س : التخصصات التي ترونها مناسبة للمرأة أكثر غير نساء وولادة أو أطفال ؟؟
انا من وجهة نظري كل التخصصات الطبيه مناسبه واذا دخلتي طب ان شاء الله راح تعرفين اكثر .
س : اذا كان منكم متخصص في طب الامراض الوراثية وأيضا في علم الأمراض فليتفضل ويقول كل ما عنده ليفيدنا
خليه لواحد احسن مني يجاوب عليه .
س : وأخيرا أريد نصيحة منكم تساعدني بالنسبة للمواد السنة التحضيرية والمهم اللغة الإنجليزية المعدل للسنة التحضيرية ، نسبة القدرات من كم أكثر فوق السبعين أو ثمانين والتحصيلي كل ما تريدون تقديمه لي من نصائح لأستفيد منها ويستفيد منها الآخرين ..
قبل كل حاجة الواحد اول شي يستعين بالله لان التوفيق بيد الله سبحانه وتعالى.. ثاني حاجه كويس انه عندك هدف واضح ونظرة على قدام انه ايش التخصص الي حابة تدخلينه لانه راح يساعدك انك تركزين على حاجة وحدة وراح توصلين لها باذن الله ..غيرك يدخل السنه التحضيريه وهو مو عارف ايش يبغى ويدخل في دوامه . بالنسبه للمعدل اهم شي التحصيلي ماينزل عن 80 والقدرات ماينزل عن 70 والثانويه عن90 وان شاء الله كذا القبول في الجامعه يكون جيبك . بعدها السنه التحضيريه راح تدرسين اشياء يمكن اخذتوا اغلبها في المرحلة الثانويه بس الفرق انها بالانجليزي . طبعا مادة الانجليزي تدرسين اربع مستويات وشدي حيلك فيها ويسهل الانجليزي معاك . طبعا في تفاصيل اكثر عن السنه التحضريه وعن المواد تلقينها في قسم السنه التحضيريه .
اخر حاجه حاب اقولها ان الواحد لازم يرسم هدف واضح قدامه ويحاول يوصله بشتى الطرق ويتغلب على جميع العقبات عشان يحقق طموحه في الاخر . انا بحكم اني باقيلي سنه على التخرج من كلية الطب ترى اقولك الطب مو سهل ويحتاج له جهد كبير وفيه مسؤوليه عظيمة ومايمشي فيه الا الانسان المجتهد و الي يحب الطب راح يستمتع بكل لحظه فيه وتمر عليه السنين كمر السحاب ..
اسال الله العلي القدير ان يوفقنا ويوفقك ويرزقنا ويرزقك ما نتمنى .
وصلى الله على نبينا محمد
|