[pharm.D]

طيور الأمل

اهم مواد الكليه الفارماكولوجي والثيرابيوتيكس , هذه المواد الي بتفيدك مستقبلا لا توضفتي

ادا حفضتي الأدويه في سنه ثالثه في مادة الفارماكولوجي , وفهمتي الباثولوجي في سنه ثالثه , سهلت عليكي مادة الثيرابيوتيكس في رابعه وخامسه

لانو في الثيرابيوتيكس بتاخدي الأمراض وعلاجها , فادا انتي فامهمه الادويه كويس من ثالثه , خلاص لا جيتي تاخدي المرض وعلاجه ما راح تتعبي كتير , وفي سنه سادسه خلاص انتي بطبقي كل الي اخدتيه , فراح تنحفر وما راح تنسي شي ان شاءالله لا تخرجتي

الي يدخل سنه سادسه ومعلوماته على قده , هذا الي راح يضيع , ولا توضف حيكون ناسي كل شي

لكن عموما في اغلب التخصصات تقريبا , العمل هو الي راح يعلمك , فلمن تتوضفي في اي مكان اول سته أشهر راح تكوني كأنك متدربه , حتلفي على جميع الأقسام في المستشفى وتسترجعي كل المعلومات

هذا شي طبيعي ما ينخاف منه

بس بصراحه صحيح في كم هائل من المعلومات , بس في مواد ما راح تفيدك كتير لمن تتخرجي , فحاولي تركزي وتفهمي المواد الي بتفيدك في صميم عملك , وباقي المواد طبعا عشان الإمتياز

الماستر ماله علاقه بالفارم دي ,

نضام الجامعات والاعادة :

دارسه 5 سنوات في الجامعه ,, تتعيني على الدرجه الثانيه
دارسه 6 سنوات في الجامعه ,, تتعيني على الدرجه الثالثه
وانتي في كلية الصيدله حتدرسي ست سنوات يعني تتعيني على الدرجه الثالثه

الفرق بين الثانيه والثالثه تكون في الراتب بس ,


بالنسبه لوزارة الصحه :
الي بنسمعه حاليا انك لو توضفتي في وزارة الصحه , وكملتي سنه فيها , يعادلولك شهادتك بماستر ويوضفوكي على درجة ماستر , تفرق في الراتب


بالنسبه للبعثات لو تبغي تطلعي تكملي بره :
الأسهل انك تدوري على جامعة تعطيكي ماستر ودكتوراه
بحكم درساتنا سته سنوات ,, ممكن في جامعات تعتبر شهادتك ماستر وتكملي دكتوراه على طول , ودا اصعب شويه ومو كل الجامعات تعترف بشهادتك انها ماستر
ثالث شي في جامعات بره ما تعاملك على انك فارم دي , وفي جامعات تعتبرك فارم دي وتعادلك المواد الي عندك بلي عندها , وبعدين يضيفو عليكي مواد ما اخدتيها تعتبر عندهم ضروريه في الفارم دي , تكمليها في سنه او اثنين تقريبا وبعدين تنقلي على طول على الدكتوراه


وأي سؤال ثاني من عيوني
وبالتوفيق