تسلمي اختي على المداخله هذا ما قصدته من طرح المقاله
مشاكل حقيقيه تخص النساء في مجتمعنا والامثله عليها كثيره
والسبب الرئيسي فيها العادات والتقاليد فقط لا علاقه لها بالاسلام.!!
اما باقي الاعضاء فتركوا لب الموضوع واثارتهم فقط كلمة ( ابيض )
|
حبيبة قلبي كلك زوق
انا فاهتمك
وكتيييير مننا فاهمين الكاتبة
لكن ايش تقولي على ناس مفكرة العادات والتقاليد "المتخلفة" جزء من الدين
وبس يسمعوا سيرتها تلاقيهم هاجوا
ماهمهم هيا كويسة مو كويسة مو مهم
اهم شي اجدادنا كانو يسووها
ياستي
طنش تعش وخدي حقك بيدك
وحتلاقي ناس كتير زي كدا
اخسريكي منهم واستمري وزي مافي معارضين كتير في مؤيدين برضو
____________________
طيب كيف يعني ( وش تبغى ذي)
قال النبي صلى الله عليه وسلم: ((لا نكاح إلا بولي)).
|
احنا بنستعبط يا مجبور ولا ايه؟؟؟
عارفين الرسول صلى الله عليه وسلم
وعارفين ايش الدين قال
وعارفين حديث: " أيما امرأة انكحت بدون ولي فنكاحها باطل باطل باطل"
او كما قال الرسول صلى الله عليه وسلم
احنا نقول لما يجي الرجال الكويس
ويجي ولي امر البنت يرفضوا لانو "مو من ثوبنا" او مو من "السادة" ولا عشان قبيلتو غير قبيلة البنت ولا عشان مو سعودي
هنا نقول لا
لما تكون البنت قلبها معلق بفلان ويجي ولي امرها يرفض بكل بساطة لسبب راجع برضو للعادات البالية دي هنل كمان نقول لا
لما تكون البنت متزوجة وعندها اولاد ومبسوطة بزواجها
ويجي اخوانها من ابوهااللي ما كانت تشوفهم الا فين وفين ويعرفوا انو عندهم نسب اعلى من نسب زوجها ويطلقوها عشان دا السبب
ويحرموها من حبيبها وزوجها وابو اولادها
هنا نقول لا وألف لا
يعني الدين امر بوجود ولي عشان البنت تحكم بعواطفها اكتر من عقلها فكتير من الاحيان
ممكن يتقدم لها واحد يمتلك قلبها بكلامو وبشكلو الخارجي
لكن في الحقيقة هوا عكس كدا هنا يجي دور الولي
انو يسأل عنو ويدور عالحقيقة ويجي يبلغها
مو العكس
يعني ازا حيصير يسوي العكس ايش فايدة انو يكون ولي؟
اشم رائحة مقفيه المدحدر
طيب حقه الشرعي يعدد، وما فيها شي ان عدد
ولا يعتبر ظلم بتاتاً البته
|
جاتنا فلسفة الرجال
اقرا الآية كاملة
موتقرا نص وتاكلوا النص التانية
"فانحكوا ما طاب لكم من النساء مثنى وثلاث ورباع فإن خفتم ألا تعدلوا فواحدة أو ما ملكت أيمانكم"
ربط التعدد بالعدل
فين العدل دحين؟
فييييييين وفيييييين تشوف رجال عادل
لما تشوف الرجال يتزوج وحدة جديدة ويرمي الاولى واولادها ولا يسأل فيهم كدا امر الاسلام بالتعدد؟؟
لما يروح يتزوج زوجة تانية ويترك الأولى معلقة لا هي متزوجة ولا هي مطلقة بكدا أمر الاسلام؟؟
لما يروح سوريا ولا لبنان ولا اليمن ولا مصر ويتزوج وحدة هناك
وبعد كدا يرجع على بلده ويقعد مع زوجته اولاده وهي هناك مو داري عنها ويمكن يرسل لها نفقة وغااالبا لا
وهي معلقة هناك ويمكن حامل بابنو وهو مو سائل فيها
هو دا التعدد اللي امر بيه الاسلام؟؟
بابتي يشتغل فهيئة الاغاثة ويحكيني لما تجيه حرمة عندها اطفال وزوجها راح اتزوج وتركها وحتى نفقة ما يرسلها تشحت فلوس عشان تأكل عيالها وهي عارفة ابوهم حي يرزق في حضن وحدة تانية
هوا دا التعدد في الاسلام؟؟
لما يجي للهيئة رجال ويقول ابغى مساعدة وتلاقي في دفتر العايلة حرمتين تلاتة وعشرمية ولد
ولما يكون حارس مدرستي اللي راتبو 1800 متزوج 3 سعودية ومصرية وسورية وعنده 19 ولد وبنت
هودا اللي امر بيه الاسلام؟؟
دا كلو مانتو شايفين فيه أي ظلم؟
جاوبوني هوا دا ديننا؟؟
هي دي المرأة المعززة المكرمة فمجتمعنا؟؟؟
ولا انتو شايفين اخواتكم وبناتكم وعماتكم واعتبرتوا انو نساء السعودية هي عبارة عن حدود العايلة زي ما قال Da vinchi؟
طيب بدون عاطفة
واحترامي للجميع
الأجنبي يتزوج السعودية ليه ؟!
ربما حرص من الدولة رعاها الله
عمرك سمعتي - الا فيما شح وقل وندر و أنا لم اسمع أبداً - ان بريطاني ولا احد الجنسيات المنتازة
تزوج سعودية أو حتى فكر ؟!
|
أول شي نجاوب على سؤالك
وحدة من معارفي متزوجة من امريكي واكبر اولادها عمرو 25 او 26
يعني من زماااااااان متزوجة
عندنا استازة في الجامعة متزوجة من امريكي برضو
وحدة كمان من معارفي كانت تدرس بكندا واتزوجت كندي
وليش مختصر الموضوع على بريطاني والجنسيات الممتازة على قولتك؟
ايشبو المصري ولا السوري ولا الفلسطيني ولا الاردني ولا اللليبي والجزائري ولا المغربي ولا السوداني؟
مو عاجبك يعني غير البريطاني؟؟
بالله عليكم ما تستحوا لما تقولوا على العرب اجانب؟؟؟
"لا فرق بين اعجمي ولا عربي الا بالتقوى"
كانوا يشوفوا الاعاجم اقل من العرب
يتفاخروا بانهم يتكلموا لغة وحدة
ودحين نقول اجنبي عشان ماعندو جنسية خليجية
ايش التفكير دا ؟؟
وبعدين المجتمع والدولة ايشلهم في جنسية الرجال اللي راح اتزوجو؟؟
ان شا الله لو بتزوج تشادي ولا صومالي ولا حتى لو ابن الحجة اللي عند الجامعة
ازا كنت انا وحدة قنوعة ومستعدة اتزوج رجال من اي جنسية
المجتمع مالو ومالي؟
وحدة اعرفها فيها جدتها باكستانية
ودايما يسافروا باكستان واتقدملها واحد باكستاني عايش هنا
دكتور ممتاز
ابن ناس
كل اللي حواليه يشهدوا باخلاقو وتربيتو
يخاف ربنا
حالتو المادية ممتازة
وفوق كل دا
يقول للقمر انزل وانا اقعد مكانك بالصلاة عالنبي
يعني كامل مكمل والكمال لله ما شا الله تبارك الله
والبنت وامها حيموتوا عليه
في تلاقي سعودي بدي المواصفات؟
جا ابوها بكل بساطة يقول لا
ليه؟؟
مايصلي؟ ماشي بالحرام؟ في شي غلط؟
كل ذنبو " مو سعودي"
ايش العقل دا ياهوووو؟؟
هوا دا الولي اللي اتكلم الدين عنو؟؟
هيا دي الشروط اللي اتكلم الاسلام عنها عشان "الولي" يختار الزوج المناسب؟؟
عشان مو سعودي؟؟
انا من حقي انو اولادي ياخدوا جنسيتي
مهما كان جنسية ابوهم
ومهما كان سبب زواجي بيه
زي ما الرجال بيتزوج من اي جنسية واولادو ياخدو الجنسية
وبعدين لما شباب البلد يتزوجو من برا تسيبونا لمين؟؟
احنا كمان من حقنا يكون لينا زوج واولاد وعايلة حتى لو كان "اجنبي " زي ما بتقولو
ودا مررررا مو عذر
حرص مين اللي تقولوا عليه؟؟
يعني العوانس في بيوتهم من حرص الدولة؟؟
ونعم الحرص والله
الصراحة استدلاخ واضح للعيان البيان من الكاتبة
طيب ليه مكة والمدينة ورحلة دينية
عشان تكسب قلوب القراء، لأن أغلب الشعب محافظ وملتزم- دخيله ذا الشعب -
ومن المعلوم ان الي ما تبغى الحجاب
ما راح تدور الفندق الي عند الحرم
|
أهاااا
يعني المسلمة غير المحجبة ما تدخل الحرم؟؟
انا ما راح اناقشك في نظرتك دي
بس ياريت تقول من وجهة نظري "انو اللي ماتبغى الحجاب ما راح تروح تدور على فندق عند الحرم"
لانو مرررررررة مو من المعلوم طيب؟
دا اول شي
تاني شي
الكاتبة زكرت موضوع العباية كنوع من المقارنة فقط لا غير
وواضح ايش مقصدها بس في ناس منت داري كيف تفكر
وواضح كمان انو هي قالت موضوع الحرم عشان تبين انو مهما كان قصدها شريف ومهما كان باين واضح زي عين الشمس انو ما بتسوي شي غلط ما تقدر تستأجر غرفة حتى لو كانت عند بيت رب العالمين
تالت شي
بما انو مو واثقين من البنات وخصوصا المسلمات غير المحجبات والمفروض انو ما يسـتأجروا فالفنادق والشقق عشان خايفين على اخلاق شباب بلدنا المساكين اللي عيونهم مغمضة والملائكة لنازلة من السما
فكمان عشاننا خايفين عليهم
لازم نمنعهم من استئجار الفنادق والشقق المفروشة الا لو كانوا من الملتزمين دينيا ولازم تكون لحيتهم مقدار قبضة اليد
ايش رايكم؟؟؟
مو فكرة حلوة؟؟
يا حبايبي خالتي استشارية اطفال راحت عالرياض عشان عندها مؤتمر وراحت معاها ستي
ما رضي ولا فندق يستقبلهم لمجرد انهن نساء
خالتي عمرها فوق الاربعين وستي فوق الستين
كويس انو جات ادارة المؤتمر وانو ابن عم خالتي كان موجود
ولا كانوا ناموا بالشارع
عالموم القانون دا اتلغى من فترة
والحمدلله تقدري تستأجري في اي فندق ببطاقتك
____________
عزيزي مجبور
ازا بعد المقال دا
وبعد الكلام اللي قلتو
وانت لسه مو عارف احنا بايش نطالب
فمافي شي اقدر ازيدو
وبالمناسبة
احنا ما نطالب انو نكون رجال
ولا حتى نكون اشباه رجال
عارف ليه؟؟
لاننا نسوى الف رجال ورجال
ونقدر نوقف فوجه ألاف الرجال
واحنا اللي طلعناكم" يارجال"
بس للاسف جزء كبير منننا مدفون تحت العادات والتقاليد البالية
فلا تعتقد اننا اشباه رجال