رد: طازه .. توه جاتني رساله عن دورة اساسيات الطب !!
أول حاجه السلام عليكم ورحمة الله وبركاته
ثاني حاجه
زي ماأنتوا عارفين أحنا طلاب دفعه
med08
بنحاول نقدم اللي عندنا سواء أولاد أو بنات
لسبب بسيط جدا
أنو احنا قبل فتره وجيزه كنا مكانكم
زينا زيكم
ونحس باللي تحسوا فيه
الخوف والضياع
ونفس الوقت الحماس
أحنا لما فكرنا نسوي الدوره بالنسبه لقسم الفيميل
أول حاجه عشان تستفيدوا والحمدلله بشهادة من حضر الدوره كانت مفيده ولسى في ناس طالبه تحضر من الأسبوع الثاني
والحمدلله هذه نعمة وفضل من رب العالمين انو وفقنا
ثانيا الدوره كمان للي حضرها شاف كيف أحنا بنحاول نطمنكم ونحاول نوضح لكم أي أستفسار أكاديمي أو غيروا لما أحد يسأل
ثالثا الأنسان لما يحاول يساعد الناس
ويحاول يدي اللي عندوا المفروض الناس إما تقبل أو ترفض المساعده بأدب
رابعا وهوا الأهم وهوا اللي خلاني أرد ردي هذا وخصوصا في هذا الموضوع
بالنسبه لسعر الدورات المقامه
سواء من قسمنا أو من عند الاولاد
هيا أسعار جدا جدا رمزيه ووالله احنا مابناخذ منها ولا ريال والدليل أنو دوره الاولاد أهو صارت مجانيه لنو الجامعه أتكفلت فيها وبالنسبه لنا أحنا أشترينا فيها الأشياء اللي تحتاجوها خلال الدروه وجزء منها حيكون للحفل الختامي يعني برضوا ماأخذنا منها ولا ريال
وأنتوا طبعا لما تدخلوا المجال الطبي حتشوفوا أسعار الدورات كيف
خامسا: الجهد والوقت والنوم والدوام مع الأخذ بعين الأعتبار أنو أحنا في الصيف
وحتى وأنا بكتب ردي هذا أهلي خرجوا يتمشوا ومارحت معاهم
قاعده أحضر
ووالله أحنا من قلبنا مبسوطين وفرحانين أنو نسوي اللي نسويه
يعني مو شي مزعجنا ولا كان ماسويناه
كل هذا لسبب أنو عشان تستفيدوا
......
طيب النقطه اللي حابه أوصلها
أنو كفايه لما جانا طلب انو الأولاد يبغوا دوره زي اللي عملناها للفيميل
طلاب دفعتي ماقصروا ولا توانوا في تقديمها جزاهم الله كل خير
مع ضيق الوقت
وكمان مسؤولياتهم الأجتماعيه اللي تلغت أكيد
إلا أنهم عملوها وهيا على قدر كبير من التنظيم
وأكيد تحتوي على معلومات مفيده أن شاء الله
.....
فياريت قبل مانحكم على حاجه نفكر
وقبل مانقول حاجه نفكر
وبما انو احنا أطباء المستقبل
مفروض ردودنا
وتفكيرنا يكون أفضل وارقى
من الرد والتفكير السريع
وكمان الواحد يقابل الحسنه بالحسنه
أو لا يقابلها بسيئه
.......
عذرا على الأطاله
ولكن تقديرا لجهود من قام بالدوره لقسم الميل
قمت بالرد
|