سادساً - مستوى صعوبة المادة :
المادة دوامها طويل , ومستوى الصعوبة أشوفه متوسط تقريباً .
بالنسبة للجزء الأول (DC) أول أربعة شباتر , هذي تقريباً مفاهيم سهلة إلى متوسطة , ما فيها صعوبة , هي فقط تحتاج إنّك تتدرب وتدرس بشكل مستمر .
بالنسبة للجزء الثاني (AC) , مستواه أشوف من متوسط إلى صعب , لأنّ كل الأفكار جديدة وبالتالي الطالب ممكن يلخبط شوي أو ما يفهمها بشكل جيد ,
لكن إذا كنت تدرس بشكل مستمر راح تكون الأمور سهلة بإذن الله , خصوصا إنّه هذي المواضيع راح تدرسها في آخر شهرين من الترم ومثل ما تعرفون في هذا الوقت يكون ضغط واختبارات الخ .
بالنسبة للاختبارات (النصفي والنهائي) , المنسق هو الدكتور محمد عجور , وأغلب أسئلته سهلة , فما يحتاج تقلقوا من هذي الناحية .
أمّا معمل المادة , فهو أيضاً سهل لكن فيه بعض المشاكل , وراح أفصّل في المعمل الآن .
سابعاً - الـمـعـمل :
فيه معمل للمادة مرة وحدة في الإسبوع مدّته ساعة ونصف .
مكان المعمل في مبنى الكهربائية (42-أ) , غرفة (217) .
أول اسبوعين أو ثلاثة أسابيع تقريباً ما فيه دوام , وتكون فترة للتسجيل , حاول بشكل مستمر تتابع التسجيل في المعمل .
طريقة التسجيل ما تكون من الاودس , تروح عند غرفة المعمل وتلقى ورقة على الباب فيها مواعيد المعامل , تروح تسجل اسمك على الموعد المناسب لك .
المواعيد غالباً تكون من (11:00 - 12:30 ) , وموعد آخر ( 1:00 - 2:00)
المعمل له ملزمة لازم تشتريها من بدري موجودة في مكتبة خوارزم اللي بالهندسة .
درجة المعمل هي (15) درجة , (10) درجات للتقارير , و (5) درجات للاختبار النهائي .
المعمل فيه 6 تجارب , أربعة تجارب تتكلم عن الـ DC , و تجربة واحدة عن الـ AC , و تجربة واحدة عن المحولات .
الطلاب في المعمل ينقسموا لقروبات أو مجموعات , تقريباً 3 طلاب في القروب الواحد , وهذا القروب يستمر لين نهاية المعمل وتسوون التجارب مع بعض والتقارير برضه مع بعض .
طريقة المعمل والتجارب هو إنّك تفتح الملزمة , ويكون فيها جداول جاهزة وخطوات لتنفيذ التجربة , انت تتبع هذي الخطوات وتسوي التجربة وتعبي النتائج في الجداول .
بعد ما تخلص التجربة , تسوي تقرير مع قروبك , التقارير تكون جماعية وماهي فردية , يعني كل قروب له تقرير خاص .
التقارير يكون فيها رسمات الدوائر والنتائج والطرق المستخدمة والهدف من التجربة , والتقارير تكون الكترونية تنرسل على الايميل في ملف PDF .
هذا بالنسبة لأهم المعلومات عن المعمل , بالنسبة لتجربتي مع المعمل :
المعمل حقيقة سهل وممتع , وبالعكس المعمل يساعدك في تثبيت المعلومات اللي أخذتها في المحاضرات وتفهمها زيادة لما تطبّقها .
لكن المشكلة الوحيدة إنّه المشرف على المعمل سيء جدّاً , ما يشرح غير شيء قليل , وإذا شرح يكون شرحه غير جيد وغير مفهوم . وبسبب هذا المشرف كثير من الطلاب كرهوا المعمل .
لكن فيه طلاب اشتكوا لرئيس القسم وتكلموا عن هذا الشيء , ولما وزعوا على الطلاب استبيانات للمادة كثير من الطلاب أعطوا تقييم منخفض للمعمل وللمشرف .
فراح يتغيّر ان شاء الله المشرف وراح يتحسن الوضع , وما يحتاج تقلقوا في هذي الناحية .
ثامنا - مصادر المذاكرة وطريقة الدراسة :
كتاب المادة هو " Fundamental of Electric Circuits " النسخة الرابعة , للمؤلف "Charles K. Alexander" و "Matthew N.O. Sadiku"
هذا هو المصدر الرسمي لدراسة المادة , لكن فيه طريقة ثانية سهلة وجيّدة , وهي دفتر او مذكرة الدكتور محمد عجور .
هذي مذكرة يسويها أحد الطلاب اللي عند الدكتور محمد عجور , يكتب الأشياء والمسائل اللي يقولها في المحاضرة ويحطها عند مكتبة خوارزم .
هذي المذكّرة لو تذاكر منها أشوفها كافية ان شاء الله لفهم المادة وتقدر تجيب درجة عالية مع حل الواجبات اللي يعطيها الدكتور عجور .
طبعاً لو انت طالب عند الدكتور محمد عجور وتكتب معاه في المحاضرات وتكتب مسائله , ما يحتاج تجيب مصادر خارجية , ذاكر بالموجود في الدفتر وتكفي ان شاء الله مع حل الواجبات اللي يعطيها الدكتور عجور .
بالنسبة لكتاب المادة , فهو كتاب كبير جدّاً وفيه شباتر وموضوعات كثيرة وسعره في الشقري 350 تقريباً , الكتاب مثل كتاب "Calculus" اللي بالرياضيات , شباتره تغطّي ماث 110 و202 و203 و205 .
نفس الشيء في هذا الكتاب حق الكهرباء , يغطي كورسات ثانية غير مادة البيسك .
ولهذا بالنسبة لغير المتخصصين كهرباء , ما أشوف فيه حاجة لشراء الكتاب , استعين بالمحاضرات أو مذكرة عجور أو تستعير الكتاب من المكتبة .
بالنسبة للمتخصّصين كهرباء , شيء جيد لو تشتري الكتاب , لأنّه بيمشي معك في الخطة بعدين غير هذي المادة , وراح تحتاج ترجع بشكل مستمر لهذي المادة وتراجع أفكارها لأنّها بتستمر معك .
لكن المشكلة إنّه الطبعة الموجودة في المكتبات الطبعة الخامسة , والطبعة المطلوبة في السيلابوس هي الطبعة الرابعة .
فأنا أنصح في البداية إنّك تستعير الكتاب من المكتبة لين ما تشوف الوضع اللي يناسبك وتشوف الفرق بين الطبعتين .
أنا من وجهة نظري أنصح المتخصصين بالكهرباء إنّهم يستخدموا الكتاب , وبأوضّح الآن بعض مزايا الكتاب .
في بداية كل شابتر من الكتاب , فيه جزء يتحدّث عن تطوير مهاراتك الشخصية وفي العمل والوظيفة في الهندسة الكهربائية ,
ويتحدّث أيضاً عن بعض خصائص ومتطلبات الأبيت (ABET) , فشيء جيّد لو تقرأها وتطّلع عليها .
فمثلاً على سبيل المثال , هذا موضوع موجود في أحد شباتر الكتاب , يتكلم عن التواصل وأهمّيّته في الهندسة وفي العمل .
طبعاً الموضوع لسع باقيله تكملة , هذي الصورة بس جزء مأخوذ منها .
الميزة الثانية في الكتاب , إنّه برضه في بداية كل شابتر في أقوال وحكم جميلة , خصوصا للناس اللي يحبون الحكم والأمثال 
مثال لأحد الأقوال الموجودة واللي تحث على الشجاعة ومحاولة تحدي الأمور الصعبة :
بالنسبة للمذاكرة وطريقتي في استخدام الكتاب , أنا كنت طالب عند الدكتور عجور , وما كنت اكتب معاه , كنت أحاول فقط إني أفهم وأتابع معه شرح المفاهيم والمصطلحات وطريقة الحل ,
لما الدكتور عجور يكتب مسألة في السبورة , كنت بس أكتب معه راس السؤال فقط , وأنتبه معه في حل المسألة وما أكتب وراه ,
أرجع البيت وأروح للكتاب , وأشوف المسألة اللي حلها الدكتور في المحاضرة , لأنّ أغلب المسائل اللي يكتبها الدكتور ياخذها من الكتاب .
أحد مزايا الكتاب , إنّه كل مثال موجود في الكتاب , موجود بعده علطول مثال آخر مشابه له تماماً ولكن فيه اختلافات بسيطة فقط في الأرقام وشكل الدائرة .
الهدف من هذا المثال الثاني هو إنّك يساعدك على تثبيت فهمك للمثال الأول , لأنّه كلا المثالين نفس الشيء , لكن الفكرة إنّه تمارس بشكل أكثر .
مثال لتوضيح الفكرة , هذا أحد الأمثلة الموجودة في الكتاب :
مثل ما تلاحظون , هذا مثال محلول بالكامل .
بعد هذا المثال مباشرة , فيه مثال آخر مشابه له تماماً لكن مختلف قليلاً , وهذا هو :
مثل ما تلاحظون إنّه هذا المثال هو نفس فكرة المثال اللي فوق تماماً , لكن فيه اختلاف بالأرقام والمطلوب .
وأيضاً هذا المثال معطيك الناتج النهائي , لكن ما هو موضّح لك طريقة الحل , لأنّ الهدف من هذا المثال هو إنّك تمارس المسألة بنفسك وتثبت المعلومة أكثر .
فأنا هذي هي الطريقة اللي كنت أستخدمها , كل مثال يحله الدكتور عجور في المحاضرة , أعيد حله مرة ثانية , ثم بعدين أحل مثال شبيه له من الكتاب عشان تثبت الفكرة والمعلومة .
خــاتمة :
وبكذا أكون انتهيت من هذا الموضوع بحمد الله اللي قدّمت فيه نبذة وتعريف عن المادة وأبرز المعلومات اللي يحتاجها الطالب .
وأتمنّى إنّه تكوّنت عند الطالب الآن صورة واضحة وكافية للمادة وأبرز ما فيها , وأتمنّى إنّي وفّقت في الطرح وكان شرحي للموضوع واضح للجميع .
أعتذر عن طول الموضوع , ولكن لأنّه هذي المادة مطلوبة لكل التخصصات ووزنها عالي في المعدّل , فحبيت أوضّحها للطلاب بالتفصيل .
ممكن بعض النقاط ما تكون واضحة في البداية , بس بعدين مع بداية الترم وفي منتصف الترم راح تتّضح الصورة أكثر , ويفضّل لو ترجع للموضوع وتقرأه مرة ثانية .
شكراً لجميع من قرأ الموضوع , وإذا أحد عنده أي سؤال بإمكانه يتفضل ويسأل , أو في حال وجود ملاحظة أو تصحيح يتفضل بالرد .
والسلام عليكم ورحمة الله وبركاته
Al-Thaqafi - skaau.com ##