السلام عليكم ورحمة الله..
أولا أحب أباركلكم من القلب على التخصص.. ودخول كلية طب الأسنان ^_^
من أروع وأمتع التخصصات على الاطلاق باذن الله..
أهم شي تعرفوه.. تعيشوه.. تحبوه بداخلكم..
وحتقدروا تبدعوا فيه كتيييييييييير إن شاء الله .. فمجال الابداع فيه كثير ماشالله
وكثير من خريجات جامعتنا.. مثلونا أحسن تمثيل بالخارج ولما كملوا دراساتهم العليا
وفعلا عملوا حاجات جديدة.. باختصار "ابدعوا" في طب الأسنان ^^
وبعد كده.. باذن الله كل شي حيسهل ويهون قدامكم..
مافي أحلى من الطموح والحلم.. اللي مهما واجهتنا من مصاعب وآلام..
نقدر نتخاطاها باذن الله ومعونته.. ومن ثم حلمنا اللي يقوينا !
~
طيب حتقولولي..
كتير مننا دخل الأسنان وهو مو عارف اي شي فيه
ومتخوفين كثير منه وايش ممكن نقابله فيه.. أو أعتقد اني اتسرعت وندمت اني دخلت هذا المجال
اول وأهم شي لازم تحطوه في بالكم ..
بما أنكم استخرتوا الله في دخول هذا القسم.. وربنا أختارلكم الخير أكيد
إذن ليطمئن قلبكم.. ودائما اتذكروا هذا الشي =)
واذا كان قلبك مطمئن.. مرتاح من الداخل.. فهذه هي الخطوة الأولى والأهم
بعدين يجي دور معرفتك للتخصص وبكل جوانبه..
أنا أول لما دخلت طب الأسنان.. قعدت أدوّر على النت و أسأل اللي اعرفهم داخلين المجال دا
و بأي طريقة عشان أحببّ نفسي ..
وسبحان الله ^_^ حبيييييييييييييييت تخصصي جدا جدا 
وهذه كلمات كتبتها.. حبيت أشارككم هي هنا مره تانية
وكان ردي لاحدى الدكاترة الجدد بالتخصص.. وكانت مترددة بالدخول فيه..
وهيه هي مشاعري تجاه تخصصي الأسناني الحبيييب
_________________________________
"سبحان الله.. جيتي تسأليني هذا السؤال.. وأنا عشت هذه التجربة بالتفصيل
وتقريبا أكثر من العديد من بنات الأسنان..
ليش؟ طيب أنا أحكيكِ
أول سنة بالجامعة.. وقبل ما أدخلها.. كان طموحي الطب البشري
لكن قدّر الله لي اني ما أقدر ادخله.. ودخلت العلوم الطبية التطبيقية أول سنة
وما كنت حاطة في بالي طب الأسنان أبدا
لكن لما جا وقت التحويل.. حطيت طب الأسنان من الرغبات
وتوكلت على ربي
وسبحان الله قبلوني في التخصص !
مع ان التحويل للأسنان ولأعلى كلية مرره صعب وما توقعته يصيرلي
لكن خييييره من ربنا وحكمته
وأكون صريحة معاكِ.. بالبداية ماكنت فرحانه بالقسم وما كنت أعرف عنه اي حاجة << وهذا سبب عدم حماسي ليه وحبي بالبداية
لكن لأني استخرت ربي.. وهو اخترالي هذا الطريق.. حاولت أرضى بقسمته ليا
وحاولت أكتشف عالم الأسنان
قبل ما أداوم بالجامعة.. صرت أقرأ وأسأل عن طب الأسنان قد ما أقدر
الين لما بيدت سنة تانية.. وصراحة بنات الأسنان كانوا قمممممة في التعاون والمحبة.. وما حسسوني حتى اني محولة عندهم وجديدة عليهم
وبسنة ثانية ماعندنا غير مادة واحدة أسنان والباقي كلها مواد طب بشري
<< يعني عشت حلمي الأول بالطب البشري الحمدلله ^^
وهذه المادة الأسنانية خلتني أتعرف على عالم الأسنان وحببتني فيه أكتر وأكتر
وما تجي نهاية سنة ثانية إلا وأنا حابتها من قلبي !
وان الأسنان صار هو عالمي وحياتي!
حتى لو تلاحظي ردودي السنة اللي فاتت بالمنتدى.. حتشوفي قد ايش حبييييت الأسنان
,
واللآن وبعد ما خلصت سنة ثالثة أسنان
وهي السنة اللي تعتبر البداية الحقيقية في طب الأسنان
عشقت تخصصي ! نعم بمعنى الكلمة.. حبيت الشغل العملي و فكرة انه حيكون عندي عيادة خاصة بيا في سنة رابعة والمرضى الخاصين لي
و الشغل اليدوي والمهارة فيها
فطب الأسنان هو فن من جد !
ومين يعرف طب الأسنان ويعيشه.. حيحبه
ولأن أغلب الناس ما تعرف ايش هو طب الأسنان وانه فقط مخصص للأسنان وبس وانه ممل
أبدا مو كده.. وتصورهم عنه خطأ
احنا بنهتم بكل منطقة الرقبة والرأس وكل مافيها..
وكل الأمراض المتعلقة بيها.. وليس معالجة أسنان وخلعها وبس!
وفيها الكثييييييير من المعلومات والعوالم الخاصة بيها
وعشان كده احنا بندرس 6 سنين زي البشري بالضبط
وعلى فكرة احنا بندرس مواد الطب البشري بالاضافة لمواد تخصصنا
وبكده حنكون ملمين بكل المعلومات وحنصير دكاترة نعرف كل شي
<< بعكس البشري اللي ما يعرفوا اي شي عننا وعن عالمنا الخاص 
وهذه مقدمة بسيطة مني..
معليش اعذريني اذا طولت بالكلام.. لكني لما اتكلم عن الأسنان
فما أقدر أكتب كلمة ورد وغطاها.. هذا عالمي وحياتي.. كيف ما احب اتكلم عنه !"
_________________________________
فحاولوا تقروا وتدوّروا عن طب الأسنان بكل مكان عشان تتعرفوا عليه..
وصدقوني كل لما تعرفوه أكثر وأكثر وتدرسوه.. حتحبوه أكتر
^_^
~
طيب نجي دحين لبداية المشوار.. وسنة ثانية طب أسنان
كيف حتكون؟ وايش حندرس ؟ وكيف النظام ؟
اتفضلوا هذا الموضوع اتكلمت فيه بالتفصيل عنها =)
~
مين هو طبيب الأسنان ؟! وكيف طبيعة عمله ؟
موضوع مبسط عن عمل طبيب الأسنان
~
وهنا موضوع يفيدكم ويعطيكم نبذة عامة عن كلية طب الأسنان
~
طيب ايش حنلبس ؟ اللاب كوت ولا شي غيره ؟
كل الأجوبة اللي تحتاجوها حتلاقوها هنا باذن الله
~
المصطلحات الطبية..
ايش هي ؟ وكيف حندرسها؟
اتفضلوا هنا ^^
~
أول يوم دوام.. شكلي حضيع في الجامعة الجديدة اللي ما أعرفها 
ولا تخافوا ^^
هنا خريطة للمباني حقتنا من الداخل.. قسم الطالبات
~
وأي استفسار أو سؤال عن طب الأسنان ..
اتفضلوا وشاركوني هو .. وباذن الله ححاول أرد عليكم وعلى قد ما أقدر وعلى قد ما أعرف ^_^
~
ولا تنسوني من صالح دعائكم أحبتي ..
^_^