[haneen k]

بسم الله الرحمن الرحيم


السلام عليكم و رحمة الله و بركاته ...

اليوم ابغى اتكلم عن العقوبة الي ظلمت كل طالبات الانتساب , بسبب حملة من بعض الطالبات المراهقات :) , حملة free hug او الحضن المجاني , وبسببها انحرمنا من الدخول الى الجامعة الا في يومين الاحد و الاربعاء ...

اسمعوا ايش صارلي اليوم , روحت الجامعة ابغى اسجل في دورة على موقع شطر الطلاب , روحت و عملت اختبار الذكاء الي هوا IQ

الدرجة المطلوبة 110 بس درجتي كانت 105 , فرق 5 درجات < بس مالي نصيب خيرة .

كنت مرة مبسوطة لانو المركز دا هوا الوحيد الي يعمل دورات لطالبات الانتساب بس اهم شئ درجة الذكاء و الاختبار مافيه اعادة :) .

و سالت الموظفة وقالتلي فيه كذا قسم يعمل دورات بس للاسف , و لا قسم يعمل لطالبات بسبب القرار الي طبقوه على طالبات الانتساب .

انا انسانة طموحة و في غيري كثير طموحين , ناوين يكملوا الماجستير , و تكون لهم مكانة في المجتمع .

انا عارفة انو في معاهد كثيرة عندها دورات و الكل يقدر يستفيد منها , بس في دورات الجامعة عاجبتني و تفيد كل طالب او طالبة ناوي يكمل الماجستير او في التوظيف < و انا زي البحر احب الزيادة .

اولا - في دورات مجانية و غير انها مجانية مافكتروا لمن اجتمعتوا و حطيتوا العقوبة انو في ناس كثير على قد حالهم و ممكن يستفيدوا منها .

ثانيا - في شروط في الماجستير في بعض التخصصات شوفوا ايش مطلوب ( طبيعة التخصص ونوع الوظيفة ومدى ارتباطها بحقول إدارة الأعمال والدورات ) < في آلية توزيع درجات المفاضلة .

ثالثا - الامن ما شاء الله في كل مكان في الجامعة بذات وقت اختبارات الانتساب , ليش لمن اروح اراجع او ابى اسال عن شي ما اشوفهم بدي الكثرة .< وقت دوام طالبات الانتظام .

رابعا - المفروض العقوبة تشمل البنات الي منظمين الحملة مو تشمل الجميع و الكل ينظلم عشان شئ احنا مالنا فيه , لا احد يقولي الطالبات كثير في الجامعة , وماراح نقدر نمسكهم كلهم

فين الامن عنهم ليش مااشوف 4 ولا 5 عند البوابات زي وقت الاختبارات , ليش ما اشوف امن كثير في الممرات زي وقت اختبارات الانتساب < حتقولوا حتى لو حطينا امن راح يروحوا اماكن مافيها امن

تقدروا تجيبوا امن يكونوا سريات كانهم طالبات و تكثروا منهم في كل مكان بذات في الاماكن الي تكون فاضية < لانو الاماكن الفاضية دي تكثر المصايب فيها

^انتوا ادارة امن و اكيد عارفين شغلكم ما يحتاج طالبة تعلمكم .

ياليت تراجعوا القرار الي طبقتوه , لانو الدورات دي من حق كل طلاب و طالبات الجامعة .