 تجربتي مع دكاترة وأستاذات كلية رابغ بصراحة كلهم رائعات وتاج عالراس بالاخلاق وحسن التعامل والتعاون مع الطالبات ابتداء من د/ وداد إلى جميع الاستاذات الله يجزاهم خير الجزاء وشهادتي في حقهم مجروحة ..
د/ فاطمة الغامدي ( ثقافة اسلامية 2 ) الشرح كانت بتأشر وتضع اسئلة مهمة وجاء في الاختبار مثل ماقالت بس في الذاكرة تفتتي الكتاب تفتتيت لأنه يغلب على طابع الاسئلة التاريخية
د/ حنان القحطاني (ثقافة اسلامية 3 ) شرحها رائع وكانت تستفيض بالمعلومات وكنا نسئلها وتجاوبنا في أمور خاصة وكذا مرة كانت المحاضرات تجنن كل شي معانا والاختبار كان حلو بس كان في اسئلة كثيرة لادلة من السنة وتكملينها وهذي ماركزت عليها كثير لذلك درجتي مش أوي بس الحمدلله الاكيد لو إني خصصت وقت أكبر ودراسة بتركيز كان جبت الفل مارك ..
أ/ تغريد بليبلة ( محاسبة ادارية ) جدا رائعة تعاون واخلاق وشرح وتلخيص بالنسبة للاسئلة ما أعرف أنا حذفت المادة في الايام الاخيرة لان كان عندي ظروفي تحتم عدم وجودي في جدة يومتها ..
أ/ آمال العمودي ( محاسبة مالية ) اخلاق وتعامل جدا راقي لكن مشكلتها هادية وماتوصل المعلومة بشكل سريع وواضح أنا بصراحة ذاكرت من محاضرات د/ فاطمة كامل تابعة لجامعة عبدالعزيز فرع السليمانية ..
أ/ مرام البكر ( إدارة اعمال ) حبوبة وطيبة شرحت المادة واسئلتها جات سهلة ..
أ/ نسرين حسن ( موارد بشرية و انتاج وعمليات ) مرة روعة وطيبة وتشرح والاسئلة سهلة وكلها من البور ..
أ/ سلمى سراج ( نظم موارد بشرية ) حضرت لها كم محاضرة سنترا الاسئلة ماخرجت عن مذكرة المادة وكانت جدا واضحة وسهلة خصوصا انه الخيارات كانت جدا مستبعدة من الصحة ماعدا الخيار الصحيح يقول انا هنا اختاريني ..
أ/ مروة حلواني ( نظم معلومات ادارية ) اخلاق وحبوبة وروعة مرة خصوصا اذا اخذتي معاها المادة فيس تو فيس انا حضرتها ترمين لانه ترم لظروف حذفتها وذا الترم رجعت اخذتها تاني بس على ارض الواقع المادة احلى وهيا بصراحة ماقصرت السمستر ذا وكانت الاسئلة سهلة روؤس اقلام ومن البور بالزبط ..
د/ مارثا عنز ( قانون أعمال ) أمممم بصراحة تجيها تصانيف بس عموما عسولة وكانت تأشر وتحط اسئلة مهمة بس كنت احسها مضيعة عن المقرر شي مو معانا تشرحه وشي معانا تطنشه يعني حفلة بس اذا ذاكرتي بتركيز تجيبي درجة حلوة خصوصا انه المواضيع فيها تشابه كبير وكلها تعدادات ونقاط بس اسئلتها كويسة ..
وبس كذا ان شاء الله أكون افدتكم بتجربتي المتواضعة ..
|
احلى تجربة والله انتي الوحيددة اللي فهمتي قصدي من دا الموضوع
وكمان البنات ماقصروا بس انتي الوحيدة اللي كتبت عن استاذاتك من كل ناحية
انا متاكدة انك حتفيدي الكل زي ماافدتيني ..
موفقة
