مشاركة جيدة يا شادن ..
وأعتقد جيلنا وجيل آباءنا تقريباً تمرد ولو قليلاً على العادات والتقاليد ...
ففي عائلتي مثلاً
البنت كان مكانها الوحيد البيت وممنوع عليها الخروج لعمل ولا دراسات جامعية وغيره
لكن اليوم الحمد لله أختي باقيلها 3 سنوات وتتخرج طبيبة
والولد مثلاً ... كان عيب عليه يدخل المطبخ ولو لكاسة موية ولا يخدم نفسه ... والحمد لله دحين أنا أعرف أطبخ وتقريباً عايش العزوبية بمعاناتها و أنا مع أهلي
ما علينا دحين من العادات والتقاليد والعرف الأخلاقي للفرد السعودي .. ﻷنه ماله تأثير على الفوضى الحاصلة في شوارع جدة
يعني
يا عااااالم يا ناس ياهوووووو ... عمركم شفتو كوبري وتحته نفق وبينهم دوار ... ولا وكمان مسارين فقط وموقعهم في نقطة الوصل بين أكبر تدفق للحركة المرورية في جدة- شارع الستين وطريق المدينة وطريق الملك عبدالله وكوبري المينا ...
يعني تخيل حادث صغير في داك الدوار يقفل أم الشوارع دي كلها
طيب بالله طلو لمنطقة البلد وما جاورها تخطيط المنطقة لابد يتغير ...
وعلى ما قريت في جريدة الشرق اﻷوسط ... إنو منطقة الرويس حيتم تخطيطها وتحسينها وإقامة عدة مشاريع فيها
نجي لموضوع عشوائية الشعب ... بصراحة ... لا تعليق (مو ﻷنه ما عندي تعليق) لااااا وإنما ﻷنه أعجز عن وصف اللي شفته- أخطاء أخطاء أخطاء تراكمت فوق بعضها البعض .. وودي أقول لو كل واحد صغير كان ولا كبير أعتبر إنو المكان الموجود فيه ملكه وفعلا حس بدا الشي داخل نفسه ماراح يخرب ولا يوسخ ولا يهمل المكان دا ...
أديكم مثال ... سكّان عمارتنا اﻷساسيين بيحافظوا على العمارة وبعتنوا بنظافتها وتجديدها وأي خراب يتعاونوا في إصلاحه حتى لو خارج شقتهم - ليش ؟- ﻷنه دي عمارتهم وهما حاسين إنو دي حقتهم .. لكن المشكلة بدأت دحين لما كثروا المستأجرين من سعوديين وأجانب صرنا نشوف القمايم في اﻷدوار والبساس في الدرجان والله يكرمكم البزارين يعملوها في المصاعد غير المراهقين والخراب اللي بيعملوه في المصاعد والمواقف واﻹزعاج - ودا كلوا ليش؟- ﻷنه مش حقهم مجرد مستأجرين و وبكرا بيطلع
تبغوا مثال ثاني ... شوفوا الشباب لما تكون السيارة اللي معاه مشتريها من راتبه كيف يخاف عليها وكيف لما يستأجر سيارة من شركة تأجير ...
وزي ما يقول المثل: (( جلد مو جلدك ع الشوك جرّه ))
على جنب:
كان ودي أقلكم ع اللي شفته اليوم عند مستوصف بدر الدين ...