بنات انا ابغا اسأل عن دي المواد نبذه بسيط عنها ومدى صعوبتها
اسس التصميم ،، مباديء التصميم الداخلي ،، علم المنسوجات ،، سيكولوجيا النسيج ،، تقنيات الحياكه ،، التصميم الزخرفي ،، المبادئ الفنيه للجرافيك ،، نسيج التريكو ،، خامات الديكور ،، رسم حر وتواصل مرئي
،، الألوان والأزياء ،، رسم الباترون ،، تكنولوجيا التراكيب النسجيه
|
أسس التصميم : مادة من قسم الفني وتعتمد على الأستازة اذا كانت كويسة حتحبي المادة
تدرسي النقطة والخط والألوان مع تنفيذها ع الكرآسة حلوة المادة بس زي
ماقولتلك تعتمد ع الأستازه .
مبادىء تصميم داخلي : برضو حلوة بس تتعب شوويا بس 
لو تخصصك أزياء تدرسي المادة
بإختصار اما لو تخصصك داخلي تدرسي المادة بالتفصيل وتدرسي عن الألوان
الإضاءة الأسقف والأرضيات وزي كدا وبعدين تعملي مشروع تأثيث فراغ من إلى
وتعتمد ع الدقةة كتييير بس لما تخلصي تحسي انك أنجزتي شي 
يعني تفرحي بالغرفة اللي صممتيها من أثاث من أرضيات
وإختبارها نفس الشي تصممي فراغ بس بشكل مبسط .
علم المنسوجات : زي الكيمياء تدرسي الخامات زي ( القطن - النايلون - الكتان - ... ) ومن ايش
تصنع وكيف تعرفي انو هذا قطن أو كتان بأكثر من طريقة وتدخلو معمل كمان ، حلوة المادة بس
تعتمد ع الحفظ ولازم تفرقي بين كل خامة وقت اختبار العملي وعن نفسي استفدت
من دي المادة كتييييير 
سيكولوجيا النسيج : دي المادة زي علم النفس تدرسي عن الملابس اللي تناسب الأشخاص
زي مثلا الطفل والمراهق وكبار السن وكمان عن الألوان وتأثيرها على النفس
وزي كدا حلوة المادة وتستفيدي منها .
تقنيات الحياكة : أحححلى مادة ومررررا ممتعةة أول شي تدرسي الغرز اليدوية اللي هيا السراجة
والنباتة وووو .. وبعدها تتعلمي ع الماكينة وغرزها وبعدين تتعلمي كيف تسوي المرد
وكيف تركبي السوسته والأزارير وكيف تسوي الحردات زي حردة الرقبة
وحاجااات تانية وحتستفيدي منها كمان 
نسيج التريكو : برضو مرررا حلوة المادة وسهلة تتعلمي ع السنارة وخيوط القطن وتتعلمي غرز
بس أساسها العدلة والمقلوبة وفي الأخير تسوي مشروعك زي ما انتي حابه ممكن
شنطة - طاقية - حزام - ...
خامات الديكور 
: يعتمد على حسب الدكتورة واختاري دكتورة كويسسسة والا حتكرهي حياتك
بسبب دي المادة 
بإختصار تدرسي كيف تنفيذ الخداديات والستارة واللحاف وشرشف السرير يعني كيف تخيطي
أثاث البيت وكدا .
وباقي المواد دا الترم حأدرسها ان شاء الله
أما مادة المبادىء الفنية للجرافيك من قسم الجرافيك والقسم مافتح يعني حيجي بدالها مادة تانية
الا اذا فتحوهـ دي السنه
وبس ان شاء الله استفدتي ( كل المواد سهلة لاتشيلي همها وتجيبي الـ a+ بالراااااحة )
بالتوووفيق