[Eng. Abdullah Saeed]

المشاركة الأصلية كتبت بواسطة mr.101 في الاسبوع الماضي وأنا مقفلة معي وقلت هذا باخليه اسبوع راحة خاصة انه جاء بعد الاختبارات وقبل الاختبارات النهائية ... فجأة .. آتاني اتصال غريب من رقم ما اعرفه << ملاحظة الرقم ما كان مميز رديت : هلا والله رد علي : مرحبا قلت : من معي رد : افا ما عرفتني يا mr.101 قلت : يعني لو عرفتك باسألك من انت ؟؟ قال: معك نيوتن قلت : يا ولد انت فاضي تآذي خلق الله قل من انت لا ادخل لك مع السماعة الحين قال : وش فيك ما تصدق انا نيوتن مكتشف الجاذبية قلت : والتـــ (كلمة مشفرة ) , يا بتاع التفاحة , ما ضيعنا إلا انت وقوانين إلا مثل شنب خويك انشتاين قال : لولا قانون الجاذبية ما طارت الطائرات ولا الاقمار الصناعية اللي تتفرج منها التلفزيون , ولولا قانون الحركة لما كان .... فقاطعته مسرعاً : خلاص خلاص يبو انت اكوس واحد بس لا تنسى انه بفضل الله ثم فضلك قال : صح , طيب المهم ترى انا جاي لك بعد شوي وقفل السماعة بعدها .... انا قلت يا دا النيلة الحين ذا يدخل علي وما يلقى ولا كتاب فيزياء يقول تسبوني وانتم اللي ما تذاكرون ولا تقرأون .. فرحت ادور في الدولايب عن اي كتاب فيزياء ورحت ادس الملخصات علشان ما يرج رأسي ويقول ليه تعتمدون على الملخصات ][ قدوم نيوتن ][ بعد ساعة دق الجرس وفكيت الباب وإذا به السيد نيوتن عند الباب ... دخلته المجلس وقلت انتظر شوي ورحت ادور عن شيء اضيفه به ... فجأة التفت واذا بنيوتن عند باب الثلاجة جالس و مطلع منها تفاحة وقاعد يتأمل فيها .. قلت له : هيه ترى تفاحنا مو للتفكير والفلسفة وتقعد تقول ليه حاطينه في الثلاجة وليه استقرت في اسفل الثلاجة ولم تستقر في اعلاها ,, ترى هذا تفاح للاكل . نظر إلي و قال : تدري انه ما ضيع العالم إلا أنت واشكالك , انت تدري وش فائدة هذا الاكتشاف ؟ لولا هذا الاكتشاف لما طارت الطائرات ... قاطعته : وما شفنا تلفزيون وما قدرنا نتصل خلاص فكنا . قال : المهم , انا ابي اخذ لفة على بيوت الطلاب باشوف وش حالتهم وكيفهم مع الدراسة . قلت : مشينا ][ نيوتن حول بيوت الطلاب ][ بعد ان مررنا بأغلب بيوت الطلاب وجدنا اغلبها قد اطلقت صافرات الانذار وأوصدت الابواب واعلنت حالات الاستنفار واصبحت البيوت اشبه بمحمية وكل ما طالب سب نيوتن انا اسكر اذن نيوتن علشان لا يسمع السب ... سألني نيوتن : هي الحرب العالمية الثالثة بدأت ولا ايش ؟؟؟ ليه كل هالاستعداد وحالات التأهب والطوارئ ؟؟ قلت له : ببساطة انها حرب الاختبارات النهائية الاولى , وبعض الطلاب قام بتوقيع اتفاقيات مع بعض الدول . رد نيوتن باستغراب : دول ؟؟!! ومن هي ذي الدول ؟؟؟ ابتسمت وقلت : أقصد بالدول يعني مدرسين خصوصي قال : آها , طيب اللي ما أخذوا مدرسين خصوصي ؟؟!! قلت : اشتروا بعض الاسلحة من أشهر الدول المصدرة للاسلحة . وقتها انلحس مخ نيوتن (فوق ما هو ملحوس اصلا) وقال : اش هالاسلحة ؟ ومن هي هالدول اللي تبيع اسلحة , لازم نبلغ عنها منظمة الامن الدولي . قلت : اعقل بس , مسوي فيها ابو التفكير وابو القوانين وما تفهم التشبيهات ... المقصود بالاسلحة الملخصات واشهر المصدرين للاسلحة : أشرف بركات , جمال السعدي , يوسف زويل قال :اما يا mr.101 عليك تشبيهات غريبة ... ووقتها خرج صوت عصافير بطن نيوتن معلنة عن جوعه ... فنظرت إليه وقلت : احسن خلك لو انك اكلت التفاحة بدل ما تفكر ليه طاحت ما كنت جيعان الحين قال لي : تبغاني اعيد عليك وش فائدة الاكتشاف ؟؟ قلت له : ارحمنا خلاص والله عرفنا , بتقول لي طائرات واتصال وبث اقمار صناعية .. وسكت قليلا وقلت له : إلا على طاري الاقمار الصناعية لا يكون انت اللي قطعت البث عن الجزيرة اول ايام كاس العالم ؟؟ استغرب نيوتن من كلامي ,, لكني قطعت استغرابه بسرعة وقلت له : يلا مشينا المطعم بس ترى امزح معك ... ][ نيوتن و المكأفاة ][ أخذت العم نيوتن معي وفي الطريق قلت له : شف يا نيوتن ترانا اخر الشهر وفيه زنقة وننتظر المكأفاة لذا بنتعشى في مطعم بخاري نص حبة شواية قال نيوتن : غريب امركم يالطلاب تأخذون مكافاة ولا تصرفونها على العلم وتجوون اخر الشهر تقولون ما معنا شيء ؟؟!! صفطت السيارة على جنب وقلت وانا معصب والشرر يتاقدح من عيناي : شوف مشينا لك هرجة التفاحة لا تجي ترج راسنا بالمكافاة , هي المكافاة تكفي اصلا مصاريف طالب جامعي ؟؟؟ وانت تحسب الاسعار الحين زي الاسعار ايامك بدرهم تشتري الدنيا ؟؟ الحين حتى البيبسي بريال ونص ... وغير كذا معطينا بطاقة ما تصرف إلا من سامبا ؟ طيب تخيل انا مرة تعطلت السيارة او ما في بنزين وما معي فلوس ولازم اسحب وما حولي سامبا .. وش اسوي ؟؟ اشحت واقول للناس قدر الله علي اني طالب جامعة وبطاقتي ما تسحب إلا من سامبا ؟؟ خاف نيوتن وقال :طيب طيب خلاص آسف ][ نيوتن في مطعم البخاري وقصة السنة التحضيرية ][ وصلنا المطعم وطلبنا نص حبة شواية وبدينا نأكل انا اضرب في الجرجير مع الرز والاخ نيوتن يضرب في البصل .. شوي ونيوتن يسألني : وش أخبار الجامعة ؟؟ وكيفكم معها ؟؟ فتنهدت تنهيدة اشبه بتنهيدة قيس عندما فارق ليلى وقلت : يا نيوتن لا تقلب المواجع , طحنا في هالسنة التحضيرية ما ادري التحطيمية وبدينا نخبص وتحطمنا وماتت احلام الطلاب شوي إلا و نيوتن : يقول لي انطم , انا انطردت من المدرسة وقالوا لي انت غبي وفاشل وما يأست وما تحطمت وقررت ان اسكت الجميع وأنتم على كم درجة ضاعت عليكم قلتم اتحطمتم وخلاص فقدتم الامل وبتسوون فلم هندي وتنطون من عمارة 70 دور ... قلت له : أنت ما تدري يا نيوتن .. قال : إلا ادري ونص بعد , انتم تعرفون ليه فاشلين مع احترامي لكم ؟؟ لانكم مأخذين الدراسة على انها حشو في الدماغ فقط معلومات بس تحشون في رؤوسكم معلومات وبس تحفظون وتروحون مباشرة تطبقون من غير ما تعرفون كيف جات ذي وليه ؟؟ طول عمركم ما استخدمتم عقولكم وتبغاني اثبت لك ؟؟؟؟ قلت : ياليت قال: شف عقلك وعقل أغلب الطلاب .. انا اجزم لو فكينا رأس واحد منكم راح نلقى المخ بقراطيسه وعليه ورقة التسعرية باقي ما انشالت اصلا بعدنا نظر لي وامسك بفخذ الدجاجة وقال : انا قررت .. قلت له : يرحم امك لا يكون قررت تطلع قانون من فخذ الدجاجة تكفى فكنا ما حنا ناقصين ترى .. طل فيني وقال : انت غبي ؟ انا قررت اني باروح بكرة مكانك الجامعة وانت غيب قلت له : قدام والريوس مفصول بس ليه... قال : باشوف التعليم عندكم كيف ؟؟ ][ نيوتن في الجامعة ][ دخل نيوتن أثناء حصة الفيزياء ودخل بعده المدرس الذي أول ما بدأ بالكلام بدأ شخير الطلاب يعلو .. نظر نيوتن وإذا بالفصل أغلبه نائم والمدرس كاتب مثل ويشرح ويحله فجأة وقف نيوتن وسأل المدرس سؤال في المثال فتغير وجه المدرس واخذ يشرح ونيوتن النشبة يناقشه ويحشر فيه ... بعدها صرخ المدرس وقال: لا احسن قول الكتاب غلط نيوتن : لا يا دكتور بس ... قاطعه الدكتور : لا بس ولا ما يحزنون اصلا انت ما انت مذاكر لو انت مذاكر ما كان سألت السؤال الغبي حقك .. اش اسمك انت ..؟ نيوتن تورط وقال احط اسم mr.101 احسن وقال له : Mr.101 يا دكتور فرد الدكتور : هيا اقلب وجهك برا انت غايب عندي .. غضب نيوتن ورجع البيت ولقاني نايم فشاتني برجله وقال قوم .. نظرت فيه وقلت : وش جابك بدري ؟؟ قال : دكتورك , طردني وغيبني علشان سألته .. قلت : يا فرحة امك يا بتاع التفاحة .. طيب الغياب هذا الحين من يشيله عني قال: المشكلة اكبر المشكلة في التعليم وطريقة التدريس , ليه الواحد يعلم طلابه على الحشو وما يحاول يثبت لهم كلامه بحقائق علمية امام اعينهم واثباتات من الواقع وليه ما يحببهم في الحصة .. قلت : اسكت بس , تراك في السعودية يالاخ ... بعدها قام نيوتن وقال خذ كتبك وخذ ثوبك ومشكور على الضيافة انا ماشي .. قلت لهم : اصبر يابن الحلال , ابيك في كلمة رأس .. قال : طيب عجل علي قلت : ما ينفع بسرعة ذي يبي لها تضبيط قهوة وجلسة قال : ليه قلت : أبيك تعطيني نصائح لان الاختبارات قربت قال : تم , أصلا انا لاجل العلم لو تبي اعطيك روحي قلت له : لا ما ابي روحك ابي مخك بس ][ نصائح العم نيوتن ][ قال لي نيوتن : شف يا ولدي باعطيك ثلاث نصائح جوهرية .. قلت له : كلي عيون ما ادري اذان صاغية قال : اولا لازم تعرف النجاح اولا واخيرا بيد الله عزوجل , وهو اللي بيده التوفيق لذا احرص على طاعته وابعد عن معصيته ولا تكون من اللي يعرفون الله وقت المشاكل ... وحاول تتقرب له بالاعمال الصالحة وادعوه بهذه الاعمال ... ثانيا : حاول ان تستمتع بالمادة عند المذاكرة ... قاطعته وقلت : شف فكنا من هاللي يجي يقول لك اصرخ باعلى صوتك وقل انا احب المادة الفلانية واكتب في كل مكان انا احب المادة الفلانية .. ويجيك الواحد قبل ما ينام يقعد نص ساعة يقول انا احب المادة ذي , انا احب المادة ذي , وبدل ما يقولها كان يمديه فهم مسألتين بالقليل ... قال لي : انا قلت لك كذا ؟؟ انت ليه ما تصبر وتفهم علي ... اللي انا اقصده انه لما تذكر اجعل الدرجات هدفك الثاني اما الهدف الاول هو العلم وان تصبح عالم وان تغير العالم بما تكتشفه وحاول ان تربط ما تذاكره بالحياة وما تشاهده في الحياة .. مثلا حاول تربط قوانين الفيزياء بما تراه ,, والاحياء بجسمك , وهكذا حاول ان تجعل هناك رابط بين حياتك وبين ما تذاكره وسيسهل عليك ... طبق هذه القاعدة في كل المواد واستمتع بالمذاكرة ثالثاً : لا تيأس مهما كان ولاتترك المثال الذي تعرفه بل حاول مرة واثنين وثلاثة وعشرة , وكل مرة ابتسم اكثر ولا تجعله يهز ثقتك بنفسك وبقدراتك وكل ما صعب ابتسم اكثر .. قاطعت نيوتن وقلت له : إلى متى ابتسم ؟ طيب افرض ما فهمت باقعد ابتسم لما ينشق وجهي او اصير زي القرة الضاحكة .. رد نيوتن وهو مبتسم : ابتسم وان صعب عليك فقم وتوضأ وصلي ركعتين وادع ربك (يا معلم ابراهيم علمني ويا مفهم سليمان فهمني ) وأشرب عصير ليمون وأهدأ ثم ارجع وفكر وستجد انك وجدت الحل ... بعدها سكت نيوتن وقال هذا ما لدي وقام ليخرج فقمت معه لاودعه .. فنظر لي وقال :ترى أدل طريق الباب واعرف من فين انت رح ذاكر وابدا من الحين ولا تقعد تقول بعدين بعدين ... قلت : أبشر يا بتاع التفاحة انتهى

ياريتني نيوتن ياشيييخه ^_*
بصراحه ابدااااع ماشاء الله