[Dr~NanoOok]

المشاركة الأصلية كتبت بواسطة PuRpLe_BoXeR منجد البيشنتس هيسولنا مشكلة كبيرة خمسين شخص لمادة وحدة شي مرة كتير بس شكلو كدا من دي السنة نبدأ نجمع ناس وكدا بس ليش مسلن ما يتفقو كزا طالب ويستأزنو من صاحب مول معين ويبدأ يحطو كدا طاولات وكراسي ويعزمو ف الناس بس بطريقة دعائية انا عن نفسي لو وصلت لسنة رابعة هسويها بس الكلية هتوافق او مالهم شغل ف الحملات الدعائية

اتوكلوا على الله.. وصفّوا نيتكم.. وربنا يرزق ويسهل ويوفق !

بالنسبة لفكرتك.. ممكن تنعمل.. لكن المشكلة مو هنا

أغلب المرضى ما يجوا بحجة اننا مستشفى تعليمي واننا طلبة اللي بنشتغل عليهم وهم ما يثقوا في كده!
فتح الملفات لها عدد معين وما يستقبلوا الكل.. فما تقدر تجيب عدد مرضى كبير وعلى كيفك
لازم نظام معين وعشان يقدروا يستوعبوا أعداد المرضى القديمين والجدد

بالنسبة لعدد المرضى الموجودين.. يكونوا كثير.. لكن اللي يلتزم بحضور موعده
أو تتسهل ليه المواصلات وانه يقدر يجينا الى الجامعة.. أغلبهم ما عندهم أحد يجيبهم المشوار

صحيح النظام صعب ودقيق شوية.. لكنه بيضمن حق المريض والدكتور وسلامتهم
أن المرضى يكونوا عندهم اثبات هوية.. ومو أي أحد من الشارع بدون أقامة أو جواز سفر
لو صارت اي مشاكل لا سمح الله.. مين اللي بيروح فيها

ممكن تسمعوا من كلية ابن سينا.. انهم يقدروا يجيبوا أي أحد ويعالجوه على طول بدون اي اثبات هوية أو فحص !
صحيح ما عندهم مشاكل في توفير المرضى.. لكن ما يهم الكم على الكيف !
ومعليش.. أحس ان اغلب شغلهم فقط تكملة عدد ريكوايرمنت وبس .. لكن بنتكلم هنا عن أرواح وبشر ونهتم بصحتهم

ولكن كلنا أمل في النظام الجديد انه يمشي بشكل ممتاز

DPA
نظامهم انهم يوفروا المرضى بتوزيع الحالات لكل مرحلة دراسية واللي يحتاجوها المرضى
ويرسلوا لهم رسايل تذكيرية بالموعد ويتصلوا عليهم
لكن أغلب عدم الالتزام يجي من المرضى

وربي يكون في العون

ولا تاخدوا هم البيشنت من دحين ! بالعكس عيشوا متعة المهنة الرائعة اللي احنا فيها
بالرغم من كل شي وكل الصعاب اللي مرينا فيها
إلا اننا ما خليناها تفقدنا متعة أجمل السنوات وأروعها



__________________________________________________ __________________

المشاركة الأصلية كتبت بواسطة amiwa د.منار الموضوع يحمسسسس احب اسمع تجارب الناس دقيقة ارتّب كلامي... اول شي شفت الفيديو كان مرة حلووووو ماشاءالله ^^ عجبتني الالة الحاسبة والمقصف اللي ما فيلو عيشة خخخخخخخخ والــ red carpet اللي في النهاية خخخخخخخخخ فكرني بمرة رحت حفلة تخرج في مدرسة وكانو حاطين في الاستقبال BLUE carpet =___=" كان مرة يفّشل المهم كان الفيديو حلو ماشاءالله بس حابة اسأل كم سؤال, دحين انا سمعت شي وحابة اتأكد, سمعت انو في سنة من السنوات يطلبو مثلا 50 او 100 او..الخ بيشنت لحالة معينة, وكل الحالات يبغالها عدد معين, فمن كتر النقص بيخرجو يدوّرو على ناس زي العُّمال وكدة وياخدوهم يشتغلو عليهم و يدفعولهم فوق كدة؟! انا كنت شوية خايفة من حكاية تجميع البيشنتات, يعني مو معقولة الوحدة تنزل بنفسها تدوّر على بيشنتس احس مرة صعبة ولا؟!! وكمان, لازم الواحد يستحمل قروشة البيشنت ويفضَل حاطِطْ الــ nice face عشان خاطر تكون سمعته حلوة بينهم ويكسبلو زبائن اكتر؟ =__= أكره أحد يلعب بأغراضي زي في الفيديو وبعدين يسوو حركات تأخير و ما فيا آجي وكدة؟!! O.o بالله د.منار ما مرت عليكي مواقف كدة؟ تحكينا؟ اذا تبغي طبعا ويعطيكي العاااااافية ع الموضووووع

ولا يهمك أحكيكي عن تجاربي "^^
هههههههههههه هي سنة واحدة بس.. لكن شفت فيها أشياء كتيييير :p

بالنسبة للمرضى والتدوير عليهم.. صحيح الكلام دا
وخاصة في المرضى حقون طقم الأسنان الكامل.. مررره صعب اننا نلاقيهم ويقدروا يجوا العيادات
لأنه يحتاج 4-5 جلسات .. واغلبهم كبار في السن وما يقدروا يجوا كل اسبوع

أغلب البنات ينزلوا صالة الانتظار بالمستشفى الجامعي ويسألوا أي أحد يحتاج طقم اسنان أو حالات
وبيلاقوا والله

أنا عن نفسي ما قدرت اروح واسأل هناك "^^
لكن رحت وسألت في صالة الاتظار عندنا في عيادات الأسنان.. وكان وجهي زي اللقمة لما سألت.. كنت مكسوفة !
لكن بعدين اكتشفت انه شي عادي
مو اني بشحت أو بطلب حسنة من أحد.. بالعكس أنا هنا بعرض مساعدتي للناس واللي ما يقدروا يسألوا بنفسهم أو ما بيعرفوا كيف وفين يروحوا عشان يتعالجوا وياخدوا هذا الشي

وكمان أنا بكده يسهّل على نفسي توفير المرضى وأخلص حالاتي بشكل أسرع

هي بالأخير وجهات نظر.. وكل واحد حسب ما يفهمها ويحطها بباله.. وابدا ما أشوفها عيب
وللأمانة.. محد من الناس أعطانا كلمة مو حلوة أو شي.. بالعكس احترمونا زي ما احترمناهم

ومو حلوة نستعمل كلمة "زباين" مع المرضى حقونا
بالعكس لازم نتعامل معهم بشكل حلو.. زي ما اتعلمنا من ديننا
يكفي كلمة حلوة وتعامل حلو وليك أكبر الأجر ^_^

النية.. النية .. دايما صفّوا النية وربي يرزقكم ويسهلكم

كم من أيام ما عندي حالات ولا مرضى.. لكن لما تساعدي صحباتك وممكن تبدّي صحبتك اللي محتاجة أكثر منك وما اشتغلت
ربي يرزقك من عنده.. وتكون كالمعجزة !

ما أنسى أيام فعلا يأست فيها.. لكن تذكرت انه ربي ما يضيع تعب أحد
وهو العالم بنيتي ومساعدتي لغيري.. وحيجازيني بالأخير أنا عارفة

مره تابعت مع حالة تحتاج طفم كامل.. لكن ما عندها ملف ولا تعرف شي
روحت وفتحت ملف لها.. وضيعت يوم كامل عشان أساعد.. وأنا كنت في أشد الحاجة لحالة أشتغلها ولا تضيع درجاتي ولا عاد في وقت لأننا صرنا بنهاية الترم
وبالأخير وبعد التعب دا كله كم يوم.. وتحويل لدكاترة وأقسام ثانية .. طلعت الحالة ما ينفع أنا اشتغل عليها وتحتاج علاجات أخرى الأول

بالبداية زعلت وأحبطت.. وقلت أنا كده خلاااص ما حشتغل كل طقم أسنان كامل وما عاد يمديني

بعدها واحده من صحباتي تقولي انه في حالة ممكن نشتغل عليها انا وهي.. لكن مع بنات سنة خامس
ولازم نروح بالعيادة في اليوم حقهم..
طبعا مع بعض التضحيات في المحاضرات وبداية المعمل عشان نقدر نلحق الوقت مع عيادة سنة خامس
لكن بالأخير قدرت أخلص الحالة هذه بشكل جميل.. وبقدر كل التعب إلا اني الحمدلله رااااضية وسعيدة بالانجاز

أكثر ما اتعلمته من دخولي الجامعة ..
أنه انجازاتي.. المعلومات اللي عندي.. مساعدتي لغيري.. هي اللي أفرح بيها وهي اللي تعبّر عني
وليس مجرد درجاتي !

,

ولسى عندي هرج كتييير "^^
المره الجاية إن شاء الله =)





وفعلا.. وورا بعض جاتني حالات كنت محتاجتها و حالات صعبة نلاقيها
ومرضى مررره متعاونين وتعاملهم رائع.. للآن علاقتي معاهم حلوة .. فالحمدلله

لا يصير يهمنا بس الدرجات .. بالأخير كله حيمشي ومجرد درجات دنيا
لكن لما نخلص.. ونستشعر قيمة اللي بنعمله ! ربنا يرزقنا شعور رااااااائع وبسعادة مافي زيها

__________________________________________________ __________________

المشاركة الأصلية كتبت بواسطة dr.HmaDa انا الحمد لله بأدرس بأوكرانيا حاليا وللحين ماعندنا مسألة تجميع البيشنتس أسأل الله الموفقية للجميع

باذن الله نوصل لمستوى الجامعات الأجنبية.. وفي يوم حتكون الريادة لنا كعرب يارب ^_^

شكرا لتواجدك