[المليحة]

وعليكم السلام ورحمة الله تعالى وبركاته رزان ،،
الرياضيات ما يحتاج لغة تقريبًا ، ليش ؟ لان الشرح بالعربي والحل أغلبه أرقام نادر يكون فيه كلمات يعني
طبعًا فيه مصطلحات لازم تكوني عارفتها زي function يعني دالة وهكذا ولكن لا تخافي الأستاذة راح تقلكم معناها بالعربي وإذا نسيت تقول عادي تسألوها،، ومن كثر ما تكرر المصطلح في المحاضرات راح تحفظينه إن شاء الله ،

الرياضيات ، لازم تحضري كل محاضراتك وتكوني معاها لما تحل المسائل لو ما فهمتِ اسأليها عادي بأسلوب لبق وحتجاوبك إن شاء الله ، وأيضًا اكتبي معاها أي ملاحظات مهمة تقولوها
لما ترجعي البيت ، عيدي حل التمارين الي حليتوها وحلي واجب الجزئية الي أخذتوها ولخصي في دفتر مثلا القوانين وطرق حل المسائل واية ملاحظات،،الخ

، الواجب محد يفتش عليه ولكن لمصلحتك حليه درس بدرسه ليش ؟ عشان الأسئلة الي توقفي عندها ممكن تبحثي عن شرح لها في النت أو اليوتيوب أو تروحي لأستاذتك نفسها او أي أستاذة رياضيات تحضيري في ساعاتهم المكتبية وتسألينهم وراح يشرحون لك ، هذا من حقك كطالبة ،

قبل الاختبار بفترة ، حلي مسائل الوورك شوب وهيا مسائل محلولة يتكرر منها كثير حليها قبل ما تشوفي الحل :) وراجعي الملخص الي سويتيه وممكن تشوفي مقاطع أبو جبل في اليوتيوب ، عنده فيديو لجزئية كل دوري ويعطي طرق حل مختصرة أحيانًا ،

الفيزياء تقريبُا نفس فكرة الرياضيات ، بس الأسئلة المحلولة اسمها تست بانك ، نفس فكرة الوورك شوب لكن اختلاف مسميات فقط :) + الفيزياء يبغاله تطلعي على نماذج أسئلة مهمة؛ يتكرر منها كثير

الحاسب والاتصال ما يحتاج لها مذاكرة يوم بيوم زي الماث والفيزياء ولكن انتهييي تهمليهم ، ذاكريهم كويس ، اختباراتهم مرا سهلة حرام تضيعي درجاتك في المادتين هذي

تقريبًا ما في شيء من فئة الصعب جدًا في التحضيري، نفس أفكار الثانوي بس بالإنجلش ، ولكن يشرحون لكم بالعربي ويختبرونكم كله اختياري ، فسهالات إن شاء الله ، :)