[Mirinoxd]

بسم الله أنا أبدأ :))

كيمياء \ دكتورة إيمان حجازي, طيبة وشرحها تمام مرا ولو ما فهمتي تعيد لين تفهمك وماتحب انها تخلص النقطة الا والكل فاهم, بس دا الشي راح يؤدي لشي تاني وهو تأخر ف المنهج
ف ممكن تضطروا تاخدو كم محاضرة اضافية دا الشي راجع للشعبة نفسها, دكتورة عادلة وكلامها دايما يحفزني, تراجع معانا وتطمنا, احيانا تكون سريعه حبتين بس نبهوها وهي حتمشي حبه حبة معاكم.
اللي تنحط مع ايمان لاتخاف وان شاء الله تفهم معاها مزبوط.

أحصاء \ دكتورة أريج عبدالعظيم, سعودية وصغيرة ف السن وكانت من طالبات عبدالعزيز, الاحصاء منهج سهل ولو كنتي مركزة معاها راح تفهمي, تتطرق لكل النقاط بس في الي احسن منها, طيبة وتجاوب على اسئلة الطالبات
وتعيد الشرح عآدي, وتسوي مراجعات قبل الأختبارات, بس انا عني ما كان يقنعني جوابها ليا لما أسألها ف اشياء مافهمتها, يعني تحسيها هي كمان شويا متلخبط عليها المنهج, عكس سماح سندي الي اشوفها متمكنة ماشاء الله عليها وبرضو دعاء بوقري. بس عموما ازا انحطيتي مع أريج عبدالعظيم برضو مرا كويس و حتفهمي معاها الدروس كلها ان شاء الله.

أحياء \ دكتورتي الأصلية منى علي محمود, طيبة مرا وتعيد كتير وكانت سريعه ولما طلبو منها البنات تمشي حبة حبة تماشت معاهم وغير كدا كانت كل محاضرة ترجع تراجع معاهم كل الي اخدوه في المحاضرات الي قبل, انا نقلت من عندها بعد 3 اسابيع للدكتورة سالينا صديق, لو كانت انقليزيتك مو كويسة ما انصحك بسالينا أبداً لأنو شرحها كلو أغلبو انقليزي وسريعه سريعه مرا وكانت تخلص لنا شابتر شابترين في أقل من ساعه, مع إن المحاضرة مدتها الأصلية ساعه ونص, أنا عني كنت استفيد منها ف حاجة وحدة وهو نطقها للكلمات, لأنو دكتورة منى مصرية ونطقها للكلمات الانقليزية مو بيرفكت فمرات كنت اضيع معاها, عكس سالينا الي كانت انقليزيتها ممتازة فدا الشي ساعدني انو تترسخ الكلمات بسرعه ف راسي والاثنين مرا كويسات لكن يعتمد على لغتك لانو لو انقليزيتك مو كويسة مرا حتتوهي مع سالينا.

أيوا وحبيت أعلق على نقطة

ومهم مهم مهم انه في الأختبارات تختبري مع شعبتك القديمه

دا الشي ماصار مهم لأنو الاختبارات صارت الكترونية ف كنت اختبر ف أول قاعه احصلها قدامي فما يفرق لما تحولي انك تكوني ف نفس شعبتك حتى لو هما نزلو جدول للشعب.

يديكي العافية.