[! سلطـــان !]

السلام عليكم ورحمة الله وبركاته

اليوم كانت زيارتي لوزارة التعليم العالي ومقابلتي لمعالي وزير التعليم العالي د : خالد العنقري

اولا وقبل كل شيء كلمة حق لازم اقولها بهذا الرجل بغض النضر عما سوف تسفر عنه النتائج

كان قمة بالاحترام والتعاون وقمة بالانصات ..( ما يقاطعك مثل بعض المسؤولين الي رحنا لهم قبل كذا )

وقرأ الاسماء ولا قال جب لي توكيل ومدري وشو !!!!!

وقلت له في غيرهم كثير ما قدرنا نتوصل لهم .. وما كان منه الا ان هز برأسه علامة ع تفهم الامر وقال ( ان شاء الله خير )

طبعا وصلت الساعه 12 تقريبا وللامانه جميع من بالوزارة محترمين

طبعا بيني وبينكم انا رحت وماكان عندي امل اقابل الوزير بس قلت احاول رحت للاستاذ عبد الله الراشد ( المشرف العام على مكتب معالي الوزير )

وما كان موجود كان في موضف بمكتبه كلمته بالموضوع وقال ( شكوى مره وحده ) يقولها بأستغراب

الضاهر ماسبق واشتكى طلاب ع جامعتهم .. المهم قال معالي الوزير اليوم الصباح استقبل المراجعين وما اعرف اذا كان بيستقبلهم بعد الظهر مره ثانيه ولكن زور قسم السكرتاريا واسأل هناك

وفعلا ذهبت وسالت والحمد لله اخبروني بأنه سوف يقوم بأستقبال المراجعين ولكن متى الله اعلم قال انزل الدور الاول وخذ لك رقم وانتظر بصالة انتضار المراجعين ..

وانتضرت الى الساعه 3 تقريبا واذ بالفرج يأتي ودخلنا جميعنا لمكتب معالي الوزير الخاص بالمراجعين

وانتظرت الى ان جاء دوري وذهبت وقلت السلام عليكم رد السلام كان بالكرسي المقابل مراجع انتهى منه والتفت فيني وقال سم ... قلت له سم الله عدوك وانا ماسك الخطاب وباقي الاوراق

وجلست اسرد عليه بأختصار زبدة الي قلته يا دكتور خالد حنا ما نبي واسطة او شفااعه او نريد تخصص غير موجود نريد حقنا فقط نريد العدل فقط مد يده وقال لحظة يعني بطل بربره وخلني اقرى

وقرأ الخطاب كامل وللمعلومية انا اضفت بعض التعديلات ع الخطاب اضفت له ما تفظلت به الاخت خجل واضفت حركة العمادة الي سوتها امس من تغيير التخصصات بالموقع .

قرأ الخطاب فقط وكتب عليه كم سطر وقال خلاص روح مع الموضف قلت له يا دكتور اسمحلي بكلمة وحده انا من سكان الطائف وقطعت اكثر من 700 كيلوا عشان اقابل معاليك رغبه صادقه مني بالعلم والتعلم بس ما ابي اتعلم شيء هم يجبروني عليه ابي اتعلم الي انا ابيه . قال خير ان شاء الله .

قلت له طيب شلون يكون الوضع الان الدراسة بدت وحنا معلقين قال انا سمعت منك ولازم اسمع وجهت نظر مدير الجامعه

انا راح اتخاطب معه واسمع وجهت نظره قلت له في اوراق ثانيه ما شفتها قال بشوفها بشوفها روح مع الموضف وان شاء الله راح نتصل ع جوالك او انت اتصل بعد كم يوم

قلت له بيض الله وجهك ونتشرف بوجود انسان بقدرك .

الله يستر بس وما يفرون مخ الوزير بكلام غير صحيح عشان يقوون موقفهم .

رحت مع الموضف الى الصادر خذوا الاوراق واعطوني ورقه للمراجعه ومكتوب فيها بخط عريض ( الوزير )

اللهم يا مسهل الامور سهل أمرنا ...

وسامحونا ع القصور .