[Glamor Mada]

هههههههههههه سوري دوبي طليت طله على المشاركتين اللي كتبتهم هنا بهالموضوع واكتشفت اني قلت قصه حيااااتي مشالله عشروميه سطر هههههههههههه.. احس عيونك دوكتوره نانوك صارت كذا اليوم من جد حطمنا كل الارقام القياسيه ك أطول رد في منتدى..وين كتاب جينيس عننا بس هههههههههه
بس ايش اسوي والله ماعرف اختصر .. يالله على ايام المدرسه كنت اسوأ واحد في حصة التعبير بالذات في درس التلخيص >_< يعطينا الاستاذ 15 سطر يقولنا لخصولي هوا .. ارجعلو الدفتر 14 سطر ونص هههههههه

المشاركة الأصلية كتبت بواسطة hadeel a معلي عندي طلب و ياريت كلكم تردو عليه قد اي تاخدو عملي في سنه تانيه ومعلي تحكونا عن تجاربكم في سنه تانيه ؟؟

اممممممممم بحاول اقولك هيا باختصار .. عاد شوفي الاختصار حقي كيف هههههه
اول شي العملي حق الدينتال يوم واحد في الاسبوع و مدته ساعتين.. من 2 الى 4
بالنسبه ينقسم لترمين .. الترم الاول نعمل سنه كامله من الشمع زي موضوع دوكتوره نانوك اللي نزلتو ..
في البدايه اول 3 اسابيع ما قدرنا نشتغل لانه الادوات ما وصلتنا لسه بس كنا ننزل المعمل واتقسمنا 4 قروبات وكل قروب معاه دوكتور او دكتوره.. اول شي وروونا الصور كيف ننحت عالشمع وبعدها ورونا القياسات وعلطول بدات الدكتور تنحت وتشرحلنا واحنا نتفرج طبعا اللي يتفرج هيقول بسيطه وسهله.. واللاب الاول والثاني قعدنا بس نتفرج .. الين جات الادوات في الاسبوع الثالث علطول بدينا نشتغل .. اول ما مسكت الواكس نسيت كل الخطوات هههه وما كنت اعرف كيف امسك السكينه بيدي فا شغلي كان خبيصه.. لكن اول ما عرفت كيف امسكها بديت اتحكم وصارت يدي خفيفه اكثر .. بديت انحت بدون خطوات ههههه جالس اقشر اي كلام وبدون ما استعين بقياسات ولا صور ولا اي شي .. يعني من مخيلتي وطبعا خلص الوقت وانا ما كملتها .. رجعت البيت وكملتها وطلعت شكلها زي الصاروخ ذا

استمريت اتدرب في اللابات اللي بعدها واحيانا وقت البريك .. ولاحظت التحسن وفرق واضح وبديت استخدم النار .. لاني كنت انحت بدون النار عشان كنت اخاف اخربها فا قلت خليني العب عالمضمون ههههه الين جا وقت الاختبار المصيبه .. مصيبه لأنه دكتور هشام جابلنا واكس غير عن الازرق اللي عندنا طبعا لانه اختبار وعشان لحد مننا يجيب سنه قديمه ويسلمها .. فا جبلنا واكس لونو زي لون اللايم بس المشكله الواكس كان جدا جدا سيئ ويتكسر معانا واحنا بننحت ! كان يوم مأسااااوي ومحد قدر يزبط الشغل لانه كنا نوصل لمرحله ونوقف عشان خايفين ينكسر واغلب الاولاد انكسرت عليهم .. الواكس كان غريب ومليان هوا ويفتفت بسرعه .. المهم انا ما قدرت اكمل السنه عشان لا تنكسر.. فا قلت ااحسن شي اسلمها كذا وهيا كبيره ولسه مو مزبوطه عالاقل احسن من انها تنكسر عليا .. فا شوفي كيف طلعت >_<

في النهايه وقت الدرجات اخذت عليه 3 ونص من 5
طبعا العملي حق الترم الاول مقسم قسمين .. يعني نشتغل على سنتين ( السنترال و الكناين )
الكنااين مع انه عند اغلب الاولاد يعتبر اصعب .. بس انا كنت عكسهم وكان بالنسبالي اسهل مدري ليه في الاختبار جبت فيه 4 بس للاسف ما صورته وقتها
في الترم الثاني الشغل يختلف .. اشترينا ارتيكوليتر واعطونا مودل على شكل الفك وركبناه عالارتيكوليتر .. طبعا وقتها حسينا نفسنا سباكين .. وافتكر وانا بركبو وسخت نفسسسي وملابسي ههههههه ووجهي صار ابيض من البودره هههههههههه شكلي كان تحفه .. هتاخدو البودره وتحطو عليها مويا وتلخبطو الين يصير زي الجبس وتركبو المودل في الارتيكوليتر وتستنو الين ينشف ..
المودل اللي على شكل الفك هيكون مكسوره منو سنتين مختلفتين وحده فوق ووحده تحت .. واحنا نحاول نبني السنه بنفس شكلها الاصلي ( بدون الجذر حقها ) بس الكراون .. طبعا كان اصعب من الترم الاول ويبغالو دقه اكثر وبحلقة عيون وصورتها وقت الاختبار

في الاختبار مدري كم جبت لانه ما قالولنا النتيجه .. كانت الدرجات كلها مجموعه مع بعضها ومع اختبار التعريف حق الاسنان .. بالفاينل جابولنا سنتين (اسنان الكبار والصغار ) ويطلبو مننا اننا نكتب اسم كل سنه ( للكبار ولا للاطفال + فوق ولا تحت + اسم السنه نفسها ) بس طبعا لازم نكون عارفين الاسنان كلها مو بس اثنين .. ونكتب الارقام حقتها يعني في اي عمر يبدا تكوينها ؟ ومتى يكتمل الكراون ومتى يكتمل الجذر ومتى تبدا تبان في الفك .. لخخخخخبطه وارقام مرررررره كثيره وحفظها صعب .. ومني فاكرها الحين خلاص نسيتها هههههه

وتوته توته خلصت الحدوته .. الله يعينك وانتي بتقرأي هرررجي كثيييييير داري بس انتي اللي طلبتي انا مالي صلاح ههههههه