السلام عليكم ورحمة الله وبركاته
كيفكم بنات؟
ان شاء الله اليوم افيدكم عن اختبار القبول للتصميم الداخلي بجامعة الملك عبدالعزيز كلية التصاميم والفنون
طبعاً عند الرغبة في دخول تخصص تصميم داخلي
لازم اول شي لما يفتحو التسكين (تحديد القسم) نهاية السنة
انك تختاري كلية التصاميم والفنون، طبعا كل الاقسام تتفتح لك
وتختاري رغباتك الاولى والثانية...الخ الترتيب حسب اللي تبغيه
انصحك انك تحضري دورات الجامعة حقت تحديد التخصص
وتسألي زميلاتك لما يجي وقت التسكين لانه كل دفعه فيها اختلافات بسيطة.
بعد ماتختاري كلية التصاميم والفنون وتنقبلي فيها بإذن الله لازم تسجلي في الاختبار، تروحي بنفسك الكلية وتسجلي اسمك عندهم في الشؤون.
عشان كذا ضروري انك تتابعي حسابهم بالتويتر حتى تعرفي متى تروحي تسجلي ومتى موعد الاختبار. لانه التسجيل وقته محدود، والاختبار عادة يكون بداية السنة الدراسية الجديدة. (يعني بعد ماتخلصي التحضيري لو انتي مستجدة)
وهذي الحسابات اللي لازم تشيكي عليها باستمرار عشان تشوفي اخبار مواعيد التسجيل بالاختبار ومواعيد الاختبار.
تويتر
interiorkau
cartanddesign
والان نتكلم عن الاختبار
الاختبار قسمين عملي ونظري، النظري اسئلة اختيارية وصح وخطأ اختياري. بس قبل ماندخل بالنظري بتكلم عن العملي لانه اهم بكثير ويركزوا على مهاراتك فيه اكثثثثثثثر.
ضروري ضروري ضروري، اتعب واقول مهم انك تتدربي على الرسم
لو انتي ما عندك مهارات رسم لا تخافي، يمديكي تتدربي لكن لازم من الان تمسكي ورقة وقلم وتتدربي كل يوم ولا تتكاسلي، لو اسبوعين كاملة بس تتدربي على الرسم راح تشوفي مهاراتك اتحسنت. ولو انتي عندك مهارات رسم من البداية مرة كويس، بس برضه تحتاجي تتدربي على رسم الكنب.
اوكي "طيب نتدرب على رسم ايش بالضبط؟؟"
١. رسم المنظور بنقطة
٢. التظليل
٣. انواع التظليل
٤.الاشكال الثلاثية الابعاد (مكعب، كرة، شكل مخروطي) وتظليلهم
٥. رسم الكنب (اي شي قدامك ارسميه، وارسمي شي جديد كل يوم، حاولي قد ماتقدري وصدقيني بعد فترة بتشوفي تحسن، لا تحطمي نفسك)
٦. مراعاة الاضاءة عند التظليل او الرسم بشكل عام
نصيحة: افتحي جوجل او pinterest وابحثي عن الظل والضوء وانقلي، ابحثي عن المكعب والكره وانقلي منهم، لانه الرسم بدايته غالبا النقل. وبكذا تتحسني، هذا فيديو ممكن يساعدك..
https://youtu.be/v8M4yoc0ZbY
اما المنظور فعندك فيديوهات من اليوتيوب عن المنظور بنقطة (منظور نقطتين غير مطلوب بس اتدربي عليه احتياط)
شوفي هذي الفيديوهات لمنظور نقطة وطبقي منه اكثر من مرة، وابحثي زيادة اكتبي بقوقل ويوتيوب (رسم منظور بنقطة تلاشي واحدة)
https://youtu.be/30tzJG6EOTo
https://youtu.be/v9TYIrGs-6I
ايش جانا في الاختبار عملي؟
١. ارسمي منظور بنقطة تلاشي واحدة لغرفة من اختيارك (لازم تتدربي قبلها وتحفظي طريقة رسم غرفة نوم او معيشة او اللي يعجبك والكنب اللي فيها؛ افضل تبرزي الخامات زي مثلا الارض خشب باركيه حتى يكون مميز ويشد النظر عن الباقي، والوان متناسقة زي مثلا الوان متكاملة تجذب النظر وبنتكلم عنها بعدين)
٢. يجيبولك شكل دايموند (راح يغيروه يجيبولك خماسي امكن بس خذي فكرة) ويقولولك كبريه ضعف. فكبريه حسب اللي تشوفيه.
زي كذا لكنه اعقد شويه وجوته نسخ من نفس الشكل
٣. يجيبولك شي قدامك ترسميه زي مثلا كرسي، ولازم تضللي وخذي بالحسبان الظل والنور وكذلك الخامات لو كان في شرشف فوقه مثلا.
وبس هذا اللي جانا بالعملي. بنات اهم شي تتدربوا تمااااااام، ارسموا اشياء من واقع الحياة واتدربوا كثير على المنظور بنقطة وارسموا غرف تحبوها حتى تحفظوها وترسموها بالاختبار من ذاكرتكم.
الان نجي للنظري
1. Geometric constructions الاوجه والمساقط
٣. ماهي افضل ارضيات المطبخ، يجيكي خيارات
باركيه سيراميك فينيل الخ، فلازم تعرفي افضل نوع ارضيات لكل غرفة
٤. الالوان الحيادية والالوان المعاكسة او المتممة (ابحثي كثير بيجيكي مثلا سؤال: اللون الاحمر متمم للون الازرق - الاصفر - الاخضر. تختاري الاخضر. ابحثي اكثر عنهم واحفظي الالوان المتممه والثانوية والرئيسية الحيادية.. الخ مرة مهم.
٥. اضافة الالوان الحيادية تقلل من حدة اللون.
٦. يجيبولك مكعب مفكوك في سؤال واختيارات كثيرة، طبعا المكعب له ستة اوجه، في بعض الخيارات فيها اكثر من ٦ اوجه او حتى طريقة توزيعه غلط فانتبهي لكل النواحي. (شوفي موضوع سماح عن الاختبار بيساعدك
http://www.skaau.com/vb/showthread.php?t=830871 )
وذي صورة بتساعدك كمان
٧. اتذكر سؤال "تنوع الاضاءة بشكل كبير غير مناسب"، الاجابة خطأ، هوا كثرة الوانها غلط اما تنوعها فهوا شي مرغوب.
٨. كان فيه سؤال شكل وجنبه اضاءة وانتي تختاري وين اتجاه الظل
وفيه سؤال شكل ويقولك كيف تشوفيه من فوق
٩. وفيه غرفه مأثثه وخيارات الشخص المناسب لهالغرفه.
١٠. الاسقاطات! مهم جدا جدا جدا، يعني مثلا يجيبولك شكل زي المثال اللي تحت باليسار، ويحطولك سهم على جهة معينة منه ويقولولك ايش تشوفي من ذي الزاوية وفي خيارات. اختاري الصح. وذا المثال:
انصحك انك تبحثي اكثر عنه واتدربي انك تعرفي المساقط من جميع زوايا النظر اكتبي بقوقل isometric drawing with orthographic view
اوكي بكذا خلصت من اللي انا متذكرته وساعدوني البنات على تذكيره من دفعتي.
ولكن.. يتبع!!!