اول شي السلام عليكم
ثاني حاجة انا انا بكتبلك ردي من واقع تجربة مو بعيدة ابدااااااا عن تجربتك
بحكم انو اتقدملي الطب ع طبق من ذهب .. وطيرتو من يدي
ونفس الاحساس اللي انت حاسو تبع الشطااارة اوالتفوق وضياع السنة والندم كلو موجود عندي
بس اللي يفرق انو اخذت دروس حلفت ايمان وعاهدت نفسي ما ارجع اكرر غلطتي مرة ثانية
اهمها لما اكون من زماااااااان ابغى حاجة ونفسي فيها " زي الطب " اسويها وانا مغمضة عيوني ..لانو مافي اي بديل ح يرضيني .. لانو انا متاكدة تمااااااااام التأكد انو وقت اتخاذ القرار بتجي ببالك 10000 شغلة تثني من عزيمتك .. والعجيب انو سبحان الله تلقى نفسك بدون تفكير انجريت ورا المحبطات
وكمان لما اكون قدام قرارات مصيرية لازم استشير واستشييييير بعد الاستخارة طبعا.. اهم حاجة ماما وبابا اقولهم قولولي الاحسن بدون كلمة "القرار لكي " واهم حاجة لا تقول المحبطات اللي بتدور ببالك قدامهم ..
واخر نقطة ..انا متأكدة انو عمرك ما رح تنسى احساس الندم بعد الانسحاب من سعود .. فمهما كانت الاسباب اللي بتوسوسلك الان .. فكر انو انا ح اعيش اللحظات هذيك من جديد
وعشان اكون صريحة معاك اعتقد لو غيرت هذي المرة كمان لاسمح الله .. عمرو ما ح يكون عندك ثقة في قراراتك بعد كذا .. وهنا ح تكون المصيبة
انت ماشاء الله .. صلاة ع النبي .. قادر وناجح ومثابر .. ابدا مو صعب عليك الطب .. وانت عارف كذا ..وهذا المهم
اما حكاية التأقلم والتكيف مو عذر انك ترجع تعيد نفس السيناريو القديم .. اذا ع الراحة والله اليوم الكل خرج مكتئب
ممكن تكون الحالة النفسية اللي انت فيها عشان الغربة وبعدك عن اهلك .. بس لازم تفكر انو في بنات اتغربوا عن اهاليهم عشان يدرسوا .. ولاخرجة ولاطلعة محبوسين زي السجن .. قارن نفسك فيهم .. وتعرف النعمة اللي انت فيها
انت ليك فوق السنتين مهيأ نفسك طب طب طب .. لاتفكر انو لما تحول هندسة ح تتأقلم بسهولة
نصيحتي لك .. لا لا لا تفكر بالموضوع .. اتفرج ع مسلسلات طبية اهمهااااا er ح يحمسك بقوة <<قصدي يعيد حماسك
فكر انو بعد سنة ح تنزل المستشفى .. وهنا تعرف معنى الطب
انا عارفة انو كلامي كان قاسي .. بس والله بكتب كأنو بنصح نفسي
الله يكتبلك الخير وييسرلك طريق الصواب