[رفّات حُلم]

أهلًا
مبروك
محدثتك من السّليمانية.
أوّل شي حتدرسي 5 مواد التّرم الجاي ان شاء الله : ثقافة1، برمجة1، اساليب الكتابة، حوسبة، واحصاء.
* ثقافة1 : أسهل مادة، مافيها لا مشروع ولا شي الا اختبار
أمسكيها قبل الاختبار بس بكم يوم وخلاص
أهم شيّ .. الثقافة مادة سهلة ما تنحفظ بس أفهمي كل كلمة .. الدليل ايش يعني؟ ايش تستفيدي من الدليل؟
كل كل كل شي لا تسيبي ولا شي ..
لانه يجي من وسط السطور
فرّقي بين التعريفات .. وآخر شي تمرني ع أسئلة =)
محاضرة المادة ساعتين في الأسبوع.
مرجعك في المذاكرة: الكتاب فقط، والأسئلة ( حق السنين الماضية ).
أنصحك بـ أ/ صدّيقة الدّقس ( ما يفرق، بس محاضرتها ممتعة جدًا، يعني تحسّي شي تستمتعي فيه .. مو جايته عشان تحضير )


* برمجة1 : هذه أسهل برمجة حتدرسيها .. أساسيات البرمجة بس =)
هذا أساسك في كل المستويات اللي بعد .. حتنضاف أشياء أكثر تطورًا مستقبلًا ..
بس لازم أساسك صح
طبعًا هيّا حتكون 3 ساعات في الأسبوع محاضرة نظرية، وفيه محاضرة ساعة ونص عملية..
بالنسبة للنظرية أنصحك بـ د/ سمر بابروك ..
حقيقي مافي زييييها
اكتبي كل شي معاها، ويبالك كل ما ترجعي من المحاضرة تراجعي + تطبّقي اللي أخذتيه.
بالنسبة للعملية حينزل لكم كل أسبوع شيت حيكون تطبيق على النظري..
الأفضل انك تقرأي السؤال في البيت وتفكّري في خطوات الحل على الأقل بس الطريقة ..
مو تكتبي الكود!
حتجي المعمل وانتِ فاهمة خلاص ايش فيه، وتكتبي الكود
حقيقي المعمل مهههههههم ..
لا تفكري تاخذيه من احد من البنات او النت وخلاص توريه أستاذتك، انت الخسرانة!
طبعًا المعمل ممكن يكون عليه درجات وممكن لا ع حسب توزيع الدرجات.
بالنسبة في برمجة 1 ما كان عندنا سكشن بس رجّعوه لنا في برمجة 2 فما اعرف كيف عندكم او لا
السّكشن عمومًا تطرح لك مشكلة وتقولك ايش حتعملي بس بدون كود غالبًا..
فيه واجبات عليها 30 درجة حاولي أول ما ينزل ع طول تبدأي تحلّي .. الواجب عادة عميييييييييييق ..
ويحتاج وقت، وماله داعي تحرقي أعصابك على واجب ما زبط في آخر لحظة ..
بالمناسبة فيه نظام في الكلية
يقارنو واجبات البنات والأولاد اللي في مستوى واحد ، واللي يلاقو حلهم زي بعض أو نسبة التشابه عالية يعطوهم يا صفر يا ناقص شي ( أقل من صفر )
فيه فاينل للاب وكان فيه ككويز للاب كمان..
المذاكرة من سلايد، الكتاب مههم مرة ويفهّمك أكثر
وترا أحسن حل في دي المادة تمسكي لابتوبك وتكتبي أكواد .. وتفهمي!


حوسبة: المادة تفهمي فيها عن الحاسب، تاريخه، التشفير، ايش يتكون، الانترنت .. اشياء كتيييييييير !
المادة مو فهم 100 % بين فهم وحفظ ..
درجاتها تقولك هيا الاستاذة اول ما تدخل عليكم!
عمومًا فيه لاب في المادة تنحل فيلو الاسئلة اللي نهاية كل تشابتر..
الاسئلة مرة مهمة ..
واهممم شي ذاكريها اول باول
يعني اقل شي كل ما تخلّصي تشابتر امسكيها واحفظي الكلام وافهمي!
فيها واجبات كمان :d
المذاكرة من الكتاب * مولازم السلايدز لو بتذاكري الكتاب *


اساليب الكتابة العلمية: دي بالنسبة ليا المادة الحفظية * وانا انسانة ما احب احفظ *
اهم شي ترجمي الكلام، وافهميه
يتذاكر بس من السلايدز، بس طوييييييييلة حقيقي.
يعني منجد طويلة وكلامها حفظ وكتير
الصراحة لازم ينحفظ كلامها اول باول عشان ترتاحي..
فيه واجبات للمادة .. وفيه عرض .. فيه كمان تقرير وعرض في نهاية السنة تقدميه ( ريبورت مدري ايش وحتكوني دارسة الطريقة )
المادة لااازم تحفظيها
لا تقولي بيجيني صح وخطأ واختاري وفراغ!
تجيب شورت انسر تقولك اكتبي كذا كذا :(
طبعًا اللي تدرس المادة وحدة ما تتغير، سابين وزوجها
اهم شي في المشروع كمان اختاري مجموعتك كويس، لانها تسال الكل..
اهم شي احفظي اول باول،
تعرفي الاحياء كيف؟ كنت تحفظي ولما تقلبي الورقة تحسي انك نسيتيه
هذا زي كذذذا فانا صراحة كنت اجيب ورقة احفظ كل الشرايح بعنوان واحد واعيد فيها وبعدين اكتبها في الورقة
وخلاص بعدين اراجع منها.


الاحصاء : بالنسبة ليا مادة حلوة .. هيا 5 تشباتر ( 3 منها احتمالات، و2 بس ابعد شويا من دا الشي )
يقولولك فيه 3 كتب ممكن تاخذيها مرجع وتذاكري منها والله ما منها فااااااايدة كتبهم دي.
لا تفكري تمسكيها..
عندهم سلايدات بس صراحة مو مرتبة مرة يعني حتزودي عليها..
اهم شي واللي مرة مهههههههم الواجبات.
اختباراتهم نسخة من الواجبات بس يغيرو الارقام
اهم شي افهمي في كل حالة ايش تعملي.
ما اقولك لا تكتبي مع الاستاذة! اكتبي وادرسيه لكن اهم شي الواجبات
كمان فيه معمل ساعة وحدة في الاسبوع .. تدرسي كم برنامج، وتطبقي عليه اشياء احصائية ..
فيه واجبات في العملي تطبقيه ع البرنامج وتصوري لها التطبيق ( برنت سكرين ) وتطبعيه..
امممممم كان فيه اختبار نهائي عملي بس، بسيط :)

طبعًا التوزيع يختلف، وانا قلتلك بعض الاشياء..
اكتبي التوزيع من البداية عشان تكوني ع بينة :)
تتخصصي في الكلية بعد دا الترم عندك 3 اقسالم: it, cs, is
المواد كلها في الكلية 61 ما عدا الثقافة في مبنى جنبه 420
الكلية كلها تعتمد ع التعلم الذاتي ترا .. يعني اي شي ما فهمتيه من دكتورتك عادي تعلمي بنفسك
مقاطع الفيديو والشرح كتيرة
وانصحك في البرمجة بشبكة عبدالله عيد
الدوام حسب جدولك بس مافي اي محاضرة تقريبًا تتعدى 2 - 3
بالتوفيق