كارثة في مجتمعنا

[أسير]

من الكوارث العظيمة في مجتمعنا :

- إنك تلقى الشباب متسمرين في الأسواق و طايحين عند عارضات العبايات المخصرة - لا و بعد يستنكروا و يقروا بإنها تسطل الشباب - و مع ذلك تلقى أخواته و زوجته - و يمكن والدته - من الناس اللي ما يخرجوا إلا بأحدث موضات هذي العبايات ( و المصيبة إنه معاهم !! ) .

- إنك تلاقي ( مواطن ) مو عاجبته أحكام يفرضوها و يفتوا بها علماءنا و إذا أحد ناقشه قال بكل تبجح هذول علماء سلطان و فاهمين الدين من ذيله ، وإذا ناقشته في إحدى الفتاوى قال مين أفتاها ؟ تقول له الشيخ فلان ( و يكون من الشيوخ الكبار المجاز لهم بالفتوى ) فيستخف بك و بالفتوى و بالشيخ اللي قالها و يتمسك بفتاوى شيوخ ( مستوردين ) أو ( ممثلات تائبات) .

- إنك تلاقي شاب أخواته يعرفوا ربهم و يتمسكوا بالعفة و الحجاب و أخينا يبغاهم و يلح عليهم يكونوا زي الـ ( القماري ) اللي تارسين الشوارع و الأسواق .

- إنك تلاقي صرح كبير مثل فندق خمسة نجوم مشهور جداً في الرياض تقام فيه الخيم الرمضانية و الجماعة في الفطور و السحور ( خليطي ) و أنواع الرقص و الغنا و الفجور و يمكن فيه حجز للمواعيد كمان بدون احترام أو تقدير لحرمة الشهر و رب الشهر .

- إنك تلاقي البني آدم كل ما اتعلم و اتطور و أخذ الشهادات زاد جداله في أحكام الدين و صار مفتي زمانه و صار يبغى (يقولب ) الدين وأحكامه حسب مزاجه .

- إنك تلاقي شبابنا و شيابنا صاروا يشككوا في الأحاديث الواردة عن رسولنا صلى الله عليه و سلم و الواردة عن زوجاته و يلصقوا بها كل جوارح الحديث عشان تكون المحصلة هي : ( الحديث ضعيف أو ناقص !!) .

- إنك تلاقي واحد يطلب ربنا يرزقه كل شي و يعيش في هنا و نعيم و يسعى للأكثر و هو مأمل ربنا يزيده و هو في المقابل ما يقدم لربنا حتى ركعة .

- إنه في بلدنا كثيييييييييير مسلمين ينقصهم الإسلام !!.

ما نقول غير : لا حول و لا قوة إلا بالله .

تحياتي ..