بنوتات العربي ممكن سؤال ؟؟؟

[rnoona]

السلام عليكم ..
كيفكم ؟
أنا حابة آخد مادة أسلوب وتحليل نصوص كمادة حرة من قسمكم ..
والشعبة الوحيدة اللي مو متعارضة مع جدولي هيا شعبة ga بس مو مكتوب مين الاستاذة ..
فهل في وحدة فيكم تعرف مين تدرس دي الشعبة ؟ وكيف المادة بشكل عام ؟
علماً بأني تخرج الترم دا ان شا الله وابغى مادة حرة ترفعلي المعدل ، يعني
تنفع دي المادة ولا لأ ؟ ..
أتمنى تردو عليا ف أسرع وقت قبل ما يقفلوا الحذف والإضافة ..
بستناكم لا تتأخروا عليا ..
وشكرا

[Apple]

//


وعليكم السلام ورحمة الله وبركاته


طيبين الحمد لله، إنتِ أخبارك ؟؟

ما شاء الله

ياللا مبآرك التخرج << قبل الناس كلها ^^


والله على حسب إنتِ تحبي الأدب ولا لأ ؟

وكمان المادة يحتاج لها جهد

يعني تكليفها جامد وهيك

إذا مو غاويه شقى لا تاخديها

أتوقع الشعبة مع أ. زمزم

والتانية مع أ. فوزية وكلهم جديدات


××

عشان لا تخافي بس

أنا الحمد لله أجتزت المادة بإمتياز

والمادة أقل شي أقول عنها مشوقة ورائعة

ودكتورتنا كانت أروع

لكن أنا ما أنصح بالمادة كمادة ترفع المعدل فقط من غير ما تتوقعي إنك حتكرفي

هدا الكلام مع دكتورتنا (وعمومًا قسم العربي)

وما أقدر أفتيك إفتاء تام لأني ما جربت الأستاذات اللي ماسكين المادة هدا الترم


خدي مادة تعرفي إنها بسيطة ومفيدة وممتعة فنفس الوقت

عندك قرآن ، سيرة (تاريخ) ، فن إقناع ، مدخل علم النفس ، مدخل علم اجتماع

اعذريني طولت << حسيت إني أنا اللي كاتبة الموضوع

وأتمنيت صراحة قرأتي بعض المواضيع قبل ما تكتبي الموضوع

الكلام هدا عدتو قريب عشرة مرات أنا وطالبات وطلاب القسم

تعبتونا ترى ^^ وتعبكم راحة

خدي راحتك :d

ربي ييسر أمرك ~


//

[قمة الأمل]

أستغرب من طالبات الأقسام الأخرى يآخذوا من قسم العربي مواد حره
أنصحكم لالالالالالا تآخذوا شي هههههههههه مافي ماده بذيك السهوله وتكون ماده حره لرفع المعدل!!!!!
اللهم العروض والقافيه بحكم تجربتي لكن تختلف من طالبه لطالبه ع حسب قدراتهم والباقي من المواد لا أعلم ولا أعتقد في شي يصلح إنه يكون لرفع المعدل

^
^
^
^
معليش طولت بس حبيت أفيدك وامكن متأخر بس يالله امكن تشوفي والماده عربي شتان بينها وبين الانجلش امكن اذا تآخذي نصوص لغويه وانجليزي من قسمنا إذا متاحه للماده الحره

[rnoona]

Apple :

سلام
أنا أحب العربي وخاصة الادب والنقد بس ف نفس الوقت ما ابغى
أجازف وأخربها على آخر ترم .. عشان كدا خلاص حآخد مادة تانية والله يعين ..
عقبالك التخرج ان شا الله
ما طولتِ ولا حاجة خدي راحتك ..
وتسلمي على الرد ..

[rnoona]

قمة الأمل :
لا تستغربي ولا حاجة .. صح إني بدرس english بس مرة أحب تحليل ونقد النصوص بالعربي تحسي ليها نكهة غير ..
وبالنسبة للسهولة من جد مافي مادة سهلة بس على الأقل أكون شوية
مستمتعة بالتعب اللي بتعبو ولا ؟
أضفت دحين مادة من قسم المكتبات يمدحوها البنات وان شا الله تكون تمام ..
مشكورة على ردك