طالبة مستجدة وتساؤلات عن السنة التحضيرية

[أيام الفرح]

السلام عليكم ورحمة الله وبركاته

أنا طالبة مستجدة تم قبولي في جامعة المك عبد العزير قرأت المواضيع اللتي تهم السنة التحضيرية ولكن هناك بعض التساؤلات

أولا :بخصوص انه الدراسة تبدأ 12/10 واليوم الإرشادي أو التعريفي يوم 13/10 يعني نروح يوم السبت ولا لا ؟؟ وإذا نداوم وين نروح ... ولا اليوم الإرشادي يكون أول يوم ؟؟؟

ثانيا :بخصوص اللوكرات كيف احجزها من بداية السنة ؟؟

ثالثا :كيف يتم التنقل من مبنى إلى اخر داخل الحرم الجامعي ؟؟؟ يعني المباني قريبة أو لازم باص أو كيف ؟؟؟

رابعا:بخصوص الملخصات اللي بعض الأعضاء نصحو فيها من وين نشتريها ..وهل هيا تفرق الأولاد عن البنات ولا لا ؟؟


خامسا: بخصوص المكافات لازم يكون أنا عندي اساسا بطاقة صراف ولا كيف ؟؟لأني سمعت أنه هما يعملو موعد بس مني عارفة ايش يسو بهذا الموعد ياليت تفيدوني ؟؟

سادسا:في اختبار تحديد المستوى للغة الأنجليزية ممكن إذا كانت نتيجتي أعلى من المتوسط ..فهل من الممكن أنه يتم الغاء المادة ولا لابد من اختبار التوفل وغيره ؟؟

سابعا:بخصوص موافقة ولي الأمر بالخروج مع السواق فن أقدمها ولمين بالضبط ؟؟

ثامنا: وبخصوص التصريح عشان جوال الكاميرا من وين اجيبه ؟؟

ياسعا :عادي إذا ألبس بنطلون أو هذي فيها مخالفات ؟؟

أنا عارفة أني طولت عليكم لكن أبغى أعرف كل شئ قبل لاتبدأ السنة لانه شايلة هم

وغير كده أتمنى تساعدوني واكون شاكرة لكم حسن تعاونكم

[LeLou]

المشاركة الأصلية كتبت بواسطة أيام الفرح السلام عليكم ورحمة الله وبركاته و عليكم السلام و رحمة الله و بركاته.. أنا طالبة مستجدة تم قبولي في جامعة المك عبد العزير قرأت المواضيع اللتي تهم السنة التحضيرية ولكن هناك بعض التساؤلات أهلا و سهلا بك في جامعة المؤسس.. أولا :بخصوص انه الدراسة تبدأ 12/10 واليوم الإرشادي أو التعريفي يوم 13/10 يعني نروح يوم السبت ولا لا ؟؟ وإذا نداوم وين نروح ... ولا اليوم الإرشادي يكون أول يوم ؟؟؟ عادة أول يوم ما يكون فيه دراسة و يكون زحمة لو بتروحي روحي بس عشان تستكشفي الجامعة لأنها كبيرة و تشوفي فين الغرف و المباني تبع محاضراتك.. ثانيا :بخصوص اللوكرات كيف احجزها من بداية السنة ؟؟ تروحي مبني 13 غرفة أظن ((30 أو 32)) أتمنى أحد يأكد المعلومة بس عمومًا انت روحي مبنى 13 و اسأليهم أبغى أحجز لوكر في أي غرفة هي غرفة كبيرة و مميزة و روحي هناك اسألي عن الاجراءات و الموظفة بتقول لك.. ثالثا :كيف يتم التنقل من مبنى إلى اخر داخل الحرم الجامعي ؟؟؟ يعني المباني قريبة أو لازم باص أو كيف ؟؟؟ في مباني قريبة من بعض و في مباني متباعدة و داخل الحرم الجامعة (( أتكلم عن السليمانية)) فيه golf car تلف حول الحرم الجامعة ممكن تركبي فيها.. رابعا:بخصوص الملخصات اللي بعض الأعضاء نصحو فيها من وين نشتريها ..وهل هيا تفرق الأولاد عن البنات ولا لا ؟؟ نو ما تختلف عن الأولاد و حسب الملخص اللي تبغيه و أغلب الملخصات في مكتبة الشقري،، ممكن تاخذيها من البنات و تصوريها لو لقيت احد عندها منها.. خامسا: بخصوص المكافات لازم يكون أنا عندي اساسا بطاقة صراف ولا كيف ؟؟لأني سمعت أنه هما يعملو موعد بس مني عارفة ايش يسو بهذا الموعد ياليت تفيدوني ؟؟ هما يطلعوا لك بطاقة صراف من الشؤون.. سادسا:في اختبار تحديد المستوى للغة الأنجليزية ممكن إذا كانت نتيجتي أعلى من المتوسط ..فهل من الممكن أنه يتم الغاء المادة ولا لابد من اختبار التوفل وغيره ؟؟ نو مستحيل تتلغي المادة من غير ما تختبري توفل أو ايلتس و لازم تجيبي نسبة معينه عشان يعادلوها لك.. سابعا:بخصوص موافقة ولي الأمر بالخروج مع السواق فن أقدمها ولمين بالضبط ؟؟ ما عندي علم بهذا الأمر.. ثامنا: وبخصوص التصريح عشان جوال الكاميرا من وين اجيبه ؟؟ هههههه ما في تصاريح و الجولات ممنوعة،، يمكن فيه بس ما ادري أول مرة أسمع بدي السمعة.. بس هم من السنة الماضبة صاروا متساهلين في موضوع الجوالات ما ياخذوه غير لو شافوا واحدة تصور غير كدا يقولوا لك دخليه في الشنطة.. ياسعا :عادي إذا ألبس بنطلون أو هذي فيها مخالفات ؟؟ نو ممنوع منعا باتًا و ما يسكتوا عليه و العباية ممنوعة يعني لا تفكري تستخبي.. بعضهم يلبسوه و يلبسوا فوقه لاب كوت بس أحيانًا بقولوا لك طلعي البطاقة و لو شافوا انك تحضيري يخالفوك.. أنا عارفة أني طولت عليكم لكن أبغى أعرف كل شئ قبل لاتبدأ السنة لانه شايلة هم عاتي عاتي كلنا مرينا بهذي المرحلة.. وغير كده أتمنى تساعدوني واكون شاكرة لكم حسن تعاونكم

أتمنى أكون أفدتك و على فكرة استفسارات السنه التحضيرية للمستجدين ممنوع تتكتب هنا لازم في ملتقى المنتظمين..
انتبهي المرة الجاية..
و بالتوفيق لك يا عسل و لا تخافي ترى الجامعة مرة حلوة و التحضيري مو صعبة أبدًا..
تحياتي~

[صدى الأحلام]

وعليكم السلام ورحمة الله وبركاته
الله يحيكي يا اختي ايام الفرح ونورتي الجامعه :)
راح اجاوبك ع كل اطئلتك بس بصراحة في اسئلة انا بنفسي ما اعرف جوابها
1) بصراحة اليوم الارشادي ما اعرف عنو ولا شي لاني انا ما رحتو والبنات كانو يقولو انو ما منو فايدة وانتي برضو اسئلي واتاكدي
2)اللوكرات حق الجامعه كلها تحجزيها من واحد مكان وهو مبنى 13 تروحي هناك وتقوليلهم بأحجز لوكر وتقوليلهم في اية مبنى تبغية وفي بعض المباني لوكراتها تكون برسوم اشتراك في الترم وفي بعضها في السنة بس انا انصحك تاخذي لوكر لانو الكتب مرررررة تقيلة وحاولي يكون لوكرك في مبنى قريب من محاضراتك لانو الوقت في التحضيييري يادوب انك تمشي لانو بين المحاضرة والمحاضرة عشرة دقايق بس وكل المحاضرات ورا بعض
3) بخصوص التنقل بين المباني مافي باصات جوة الجامعه في سيارات القولف بس غالبا تكون مليانة واحسلك تمشي لانو زي ما قلتلك مررة مافي وقت واعبال ما تستني السيارة تجي تكون ضاعت العشرة دقايق فتمشي احسلك تفاديا لضيق الوقت والمباني في القريب وفي البعيد بس انا اتذكر لمن كنت ما راح يحطولكم المباني مررة بعيدة عن بعض بس هو الصراحة في شوية مشي ايوة صح وسيارات القولف لها زي المحطات توقف فيها وانتي تروحي المحطة وتستني الين السيارة تجي وفي سيارات تلف الجامعه كلها وفي سيارات تمشي بس شوارع معينة
4) بالنسبة للملخصات انصحك تشتريها مررررررة مفيدة بس الكيمياء مرررة ما انصحك لانو اهم شي فهمك من الاستاذة والاولاد والبنات كنا نذاكر من نفس الملخصات الي يفرق الاسئلة ما تكون نفسها وتشتريها من مكتبة الشقري او مكاتب قريبة منها وكلها في حي الجامعه يعني مو داخل جامعة البنات لا لازم تروحيها بسيارة بس يعني قصدي قريبة من الجامعه وكتب الدراسة انصحك ما تشتريها من جريير لانها مررة غالية اشتريها من الجامعه روحي مبنى 7 وهي كلية العلوم في مكتبة في الدور الارضي اسمها مكتبة الخوارزم وتبيع اغلب الكتب العلمية فقط وليست الادبية
5) المكافأة: مو لازم يكون عندك بطاقة صراف هما راح يحطو اعلان عن موعد لاصدار بطاقات الصراف عشان تنزل المكافاة في دا الحساب وهو طبعا دا الحساب بس تنزل فيه مكافاتك الشهرية بس ما يمديكي تودعي فيه ولا شي لمن يحطوا دا الاعلان ويكون طبعا حسب الارقام الجامعية تروحي وتشوفي انتي متى حطولك موعدك في اية يوم وتروحيلهم في اليوم المحدد ولو رحتي بعدها عادي وهم طبعا يحددو المكان وتروحيلهم ويسلموكي بطاقة الصراف بس لسع ما يكون فيها ولا شي الين ما تروحي البنك وتفعليها ولازم بنك سامبا والي في الجامعه ماينفع تروحي اي فرع بره الجامعه المهم لمن تروحي البنك لازم تجهزي اربعه ارقام عشان تكون الرقم السري لبطاقتك وهما كمان يطلبوكي حاجات تجيبيها معاكي لمن تروحي البنك والله مني فاكرة ايش بالظبط اظن صورة من بطاقة الاحوال والبطاقة الجامعية واصل بطاقة الاحوال واشياء زي كدا مني فاكرتها بالظبط وانا انصحك تروحي البنك عشان تفعلي البطاقة متأخر يعني بعد اسبوع او اسبوعين لانو البنك حيكون مرررة. زحمة وسرا والدنيا مررة حر ايوة صح موعد اصدار البطاقة ما يكون اول ما تدخلي الجامعه يكون بعد شهر او شهرين وتنزل فيه مكافأة الشهر او الشهرين الي ما استلمتوها يعني احنا حنبدا دراسة شهر عشرة والبطايق احتمال تاخذوها شهر 11 او 12 لمن تطلعي البطاقة حتنزلك كمان مكافأة شهر عشرة يعني الشهور الي ما استلمتو مكافاتها
6) اختبار الانجليزي ما يلغولك المادة الا اذا اختبرتي اختبار التوفل او اختبار الابتلس وتجيبي النقاط او الدرجات الي تطلبها الجامعه بس غير كدا مستحيل يلغولك المادة ابدا
7)بصراحة مافهمت سؤالك هذا انا ارجع مع سواق .. انتي من السكن؟ اذا من السكن حق الطلاب ما يمديكي تخرجي مع سواق الا اذا كنتي في سكن خاص
8) بصراحة ما اعرف بس اول مررة اعرف انو في تصريح لجوالات الكاميرا
9) اااااه جينا للبناطيل الي اختلفو فيها العلماء ههههههه البناطيل ممنوعه بس مصرحة لطالبات كلية العلوم لانو عندهم معامل بس لازم كمان يلبسو فوق البناطيل اللاب كوت بس بصراااحة اغلب بنات التحضيري وبنات الجامعه كمان كانو يلبسو بناطيل ويلبسو فوقها اللاب كوت ومحد يدري هي من اية كلية. بس احيانا يعملو تفتيش عند البوابة ولمن يعرفو انك تحضيري ولابسة بنطلون وحتى لو معاكي لاب كوت يسحبو بطاقتك ويقولولك انتي مو الكليات الي مصرح ليها انك تلبسي لاب كوت وكمان البناطيل الاستريتش مرررة ممنوعه لجميع طالبات الجامعه ولو شافوكي ع طول تنسحب بطاقتك حتى لو كنتي من كلية العلوم فاذا تبي تلبسي بنطلون لازم تلبسي فوقو اللاب كوت
اذا تبي اي استفسارات تانية انا حاضرة يا قلبي واتمنى اني اكون افدتك ^_^

[RHF]

أولا :بخصوص انه الدراسة تبدأ 12/10 واليوم الإرشادي أو التعريفي يوم 13/10 يعني نروح يوم السبت ولا لا ؟؟ وإذا نداوم وين نروح ... ولا اليوم الإرشادي يكون أول يوم ؟؟؟

احسلك تروحي الجامعة يوم الاتنين ، وحلو لو حتروحي الارشادي تتسلي ، وتستفيدي شوية ، ولو ما روحتيه برضو مش مشكلة

ثانيا :بخصوص اللوكرات كيف احجزها من بداية السنة ؟؟

زي ما وضحتلك الاخت ، في الشؤون تسألي

ثالثا :كيف يتم التنقل من مبنى إلى اخر داخل الحرم الجامعي ؟؟؟ يعني المباني قريبة أو لازم باص أو كيف ؟؟؟

الحرم الجامعي = اعتبري نفسك في كباين هههههه ، اقصد زي الحوش الكبيييرررر ، وفيه مباني ، ازا فيكي حيل امشي على رجولك ، وازا مافيكي حيل ، اركبي قولف كار ، وطبعن مافي باصات

رابعا:بخصوص الملخصات اللي بعض الأعضاء نصحو فيها من وين نشتريها ..وهل هيا تفرق الأولاد عن البنات ولا لا ؟؟

في المكتبات اللي قالو عليها ، وبعضها موجودة في النت
وازا كانت الشباتر موحدة نفسها حقت الاولاد ، اكيد مافي مانع ،،
اما لو كان المنهج يختلف قليل عن الاولاد ، الافضل تاخدي حقت البنات


خامسا: بخصوص المكافات لازم يكون أنا عندي اساسا بطاقة صراف ولا كيف ؟؟لأني سمعت أنه هما يعملو موعد بس مني عارفة ايش يسو بهذا الموعد ياليت تفيدوني ؟؟

مممم اول شي ، حينادوكم يوم ، يعطوكم ظرف باسمك شخصيا ، تروحي فرع سامبا ، اللي داخل الجامعة و حيكون زحمة مرة ، المهم تدخلي عندهم و يعملولك بطاقة وتاخديها في وقتها ،
وطبعن لازم تسحبي الفلوس اول باول ، حيكون في ورقة عليها تعليمات يفضل تقريها مزبوط


سادسا:في اختبار تحديد المستوى للغة الأنجليزية ممكن إذا كانت نتيجتي أعلى من المتوسط ..فهل من الممكن أنه يتم الغاء المادة ولا لابد من اختبار التوفل وغيره ؟؟

لا حتضطري تدرسي من المستوا اللي نزلك في الاودس


سابعا:بخصوص موافقة ولي الأمر بالخروج مع السواق فن أقدمها ولمين بالضبط ؟؟

موافقة مين ؟؟؟ تدخلي و تخرجي على كيفك ، ولا احد داري عنك اصلن
الخروج يبدأ من 9 الا كم دقيقةة
مو فاضين يشوفو كل طالبة تروح و تيجي مع مين

( الا لو كنتي في سكن الجامعة ) .

ثامنا: وبخصوص التصريح عشان جوال الكاميرا من وين اجيبه ؟؟

مممممم لو شافو معاكي جوال كاميرا ، حيقولولك دخليه عشان ما ناخدو خخخخخخ
لو كنتي تقوليلهم ما ابا و مدري ايش ، وقتها حياخدوه
انتي كمان قدامهم لا تطلعيه
على فكرة لا تشتري جوال تاني ، لانك محا تستخدميه ، وحتشوفي كل البنات في الجامعة ماشين بجوالات كاميرا

ياسعا :عادي إذا ألبس بنطلون أو هذي فيها مخالفات ؟؟

ممممم لو مسار علمي ، عادي تلبسي بنطلون و عليه لاب كوت
ممكن يدققو ، وهو ممنوع ، قبل فترة وحدة من الشؤون قالت مسموح مع بلوزة طويلة لاكن للاسف ما اتأكد الموضوع دا
احسلك تاخدي معاكي لاب كوت ،
وترا لو لابسة بنطلون وعباية ، برضو تنحسب مخالفة و ياخدو بطاقتك



ان شاء الله اكون افدتك ، واي سؤال ، خدي راحتك

[الرٌواء]

لوسمحتوا لاحظتكم تتكلمون عن ( اللوكرات )

ممكن افهم وش هي ياليت تفهموني

[LeLou]

المشاركة الأصلية كتبت بواسطة الرٌواء لوسمحتوا لاحظتكم تتكلمون عن ( اللوكرات ) ممكن افهم وش هي ياليت تفهموني

اللوكرات هي الدولاب أو الصندوق إللي تحطي فيها أشيائك..
يسموها صندوق الطالب..
تراها مرة مفيدة أريح لك من شيلة الكتب..
إذا تبغي تحجزي زي ما قلت في مبنى 13 و سعر الايجار 20 ريال في السمستر الواحد و 40 في السنة..

بس أنصحك لا تاخذيه بالسنة لانه ممكن تتغير عليك المباني و تصير كل محاضراتك بعيدة جدًا عن المبنى اللي فيه اللوكر..
خذيه بحيث يكون قريب من أماكن محاضراتك..

و بالتوفيق~

[أيام الفرح]

مشكورين لكل من جاوبني ورد عليا بجد ساعدتوني

الله يوفقكم يارب ..