عبايات آخر زمن

[dr_love]

يعني لازم تدخليني هادا المول اللي ما أعرف راسه من رجوله ولا أوله من آخره ياكترها الأسواق اللي في وسط البلد عندك سوق العلوي وسوق باب مكة وشارع قابل وسوق باب شريف وسوق الكندرة كل اللي تبغيه موجود عندهم ... دحين انت ايش اللي حارق رزك وزعلان كل الحريم بيدخلوا هادي المولات وانت هالكني بأسواقك المعتقة والقديمة دي أسواق حالتها بالبلا والبلا لاحقها .. ضربت يدي كف بكف وقلت أمري وخيرتي لله .. هيا تعالي ندخل من دي البوابه وربنا يستر لانروح نضيع في المول ده ومانعرف من أي بوابة دخلنا وأنا عارف برضوا انو ماحرجع البيت إلا وركبي تطقطق وح احتاج بعد كده أجيب المزيتة حق المكاين عشان أرش على مفاصلي ورجولي كمان حتورم وتبقبق من كتر اللفلفة والدوران في المول ده لكن ايش أقول حريم تعجبهم الزبرقة وكتر الأنوار اللي تبهرهم والشئ اللي ينباع في أسواق وسط البلد بـ 100 تلاقيه في المول ده بـ 1000 يللا أهل العقول في راحه (وكل مين في سوقو يبيع خروقو) .. المهم وأنا ماشي جنب ام فتو الا مالاقي إلا وكوعها خابطني في جنبي واسمعها تقول (عسى عينك تنعمي يا بعيد) حرام عليكي ياحرمه كتمتيني هوه ايش في ؟ من ساعة ما دخلنا المول وانت عيونك مبحلقة في الحريم , ياحرمة حرام عليكي أنا عيوني مو في الحريم أنا عيوني في الفضائح والشئ المقزز والمقرف اللي لابسينو بعض الحريم . ايش لابسين الحريم لابسين عبايات حسب الموضة . هادي فوضه مو موضة هادي عبايات هادي، العباية اللي أعرفها بتكون للستر والحشمة لكن هادي اسمها قلة حياء ومسخرة قال عبايات قال كأنها فساتين سهرة مطرزة ومشكشكة بالألوان والصور وعليها كتابات مخجلة وصور في الظهر وسلاسل على الخصر وفي منها محزقة ومخصرة تبين تقاطيع الجسم وفي منها كأنها جلابيات ومنها على شكل مشلح هادا غير انه في بعض البنات بالمرة بايعينها بيكتبو الاسم ورقم الجوال والايميل خلف ظهر العباية بنفس لون وتطريز العباية لا والمصيبة أنهم ماشيين يتقصعوا فيها في المول بطولوا وعرضوا ولا عندهم فكرة لا عيب ولا حياء وهادا كله من تحت راس هادي الفضائحيات العربيه اللي بتجيبلنا مصممات الأزياء التافهات اللي من جماعة (وئف تا ائلك) اللي ماوراهم إلا خراب عقول بعض الحريم والبنات لكن السؤال اللي ابغالو جواب فين أهلهم عنهم فين الأب وفين الزوج وفين الأم وفين الأخ لما يشوف بنته والا بنتها والا اخته والا زوجته تخرج السوق بالشكل الفاضح ده فين الغيرة فين الرجولة والا خلاص شالو برقع الحياء يا آباء يا أمهات يا أخوان يا أزواج بناتكم وزوجاتكم أمانة في رقبتكم وكل راع مسؤول عن رعيته .. المهم سحبت أم فتو من يدها وجينا خارجين وسألت رجل الأمن اللي كان واقف بيراقب حركة المول .. لو سمحت كيف أقدر اروح لبوابة رقم 3 لانه السياره واقفة هناك رد عليا وقال العباية بالمرة حلوة!!!؟ طالعت في الراجل وقلت أحد جاب سيرة العباية أخدت بعضي ومشيت وقلت في نفسي من كتر ماشاف أشكال وألوان العبايات انسطل وحسبي الله ونعم الوكيل وعيشوا كتييييير تشوفوا كتييييير
يقول الله عز وجل في كتابة الكريم «يا أيها النبي قل لأزواجك وبناتك ونساء المؤمنين يدنين عليهن من جلابيبهن ذلك أدنى أن يعرفن فلا يؤذين وكان الله غفورا رحيما» لكن مين يفهم؟

المصدر

==================


صدقت يابو فتو

وللأسف شر البلية مايضحك

[candy 1989]

اللي استحو ماتو..دا اخر الزمان قليل اللي يتمسكو بدينهم و حياءهم..

الله يهدي الجميع..

يسلمووووو على المقال الحلو,,ربي يوفقك..

[الراقي]

هالأيام اللي متحجبه ولابسه هالعبايات والحركااااات فيها فتنة أكثر من المتبرجة
روحت المول هاليومين مررره متعبه نفسياً للشباب من اللي نشوووفه .<< فاكرين الجمل اللي دخل صالة الافراح وشااف اللي ما ينشااف وش صار فيه

[ام تالا]

بصراحه انا لمن اشوفهم استغرب فين اهاليهم
الله يحمينا يارب
صارت الملفته للنظر اللي متستره ولابسه عالراس

تقبلو مروري

[me 4 islam]

ع قول مامتي الناس بتروح المولات عشان تتمشى وتتعشى مو تشتري

وربي يسترنا بسترو الجميل

:)

[عطلجية]

والله احنا البنات لما نشوف هذول البنات نفغر فيهم كيف عاد بالأولاد

من جد فتنه الله يسترنا

[سنسونا]

شكرا على النقل القيّم
والله يهدي أي بنت مقصرة في أمور دينها

[امل الكون]

الله يستر علينا دنيا واخره
اذا انا البنت انفتن فيهم لمن اشوفهم كذا فما بالك بالشباب الله يهديهم
شكرا لصاحب الموضوع وعلى نقله الموضوع
تحياتي لك

[الراقي]

والله احنا البنات لما نشوف هذول البنات نفغر فيهم كيف عاد بالأولاد

اذا انا البنت انفتن فيهم لمن اشوفهم كذا فما بالك بالشباب

..

[امل الكون]

الراقي عجبك الكلام يحقلك والله
انا يوم الاربعاء اللي فات رحت الردسي مول وشفت وحده تفتن وبقوه
وربي انا واخويا فتحنا فمنا ونطالع الين ماراحت الله يستر عليها

تحياتي لك