المعدل طااااااااااااااااااااااااااااح

[المايسترووووو]

السلام عليكم
والله يا شباب مدري ايش أقول
لكن والله أنا مرة متضايق بسبب أنه معدلي كان 3.79
وذحين نزل 3.38
وأنا لسا ما تخصصت والصيفي هذا بأنزل e مستوى ثاني
فما أدري كيف أسوي
وأنا أبغى أتخصص إنتاج
ما أدري هل أقدر أرفع المعدل أو لا
الله يعين إن شاء الله
أبغى نصائحكم
ومشكورين

[heso]

شد حيلك الترم الجاي و نزل مواد سهلة ..
زي
ee201
ie201

و شد حيلك فيهم و ان شاء الله ترفع المعدل و ترجعه 3.8
بالتوفيق !!

[فارس@@]

شد حيلك
وإن شاء الله ترفع المعدل
بس هل هذه المواد ترفع المعدل
ie 201
ee 201

[برشلوني]

نزل بالصيف مادتين ترفع معدلك والترم الجاي نزل 14 ساعه وارفع المعدل

واللي كاتبه الله لك من التخصصات راح تدخله

[AhmadASG]

لا تشيل مازال عندك فرصه كبيره رتفع والنزله ماهي قوية ... اهم شي نصيحه من مجرب لا تحاول تنزل ساعات كثير حتى ترفع المعدل او تحاول تاخذ صيفي ... امش عادي وهدي الوضع حتى لو ماتنزال الترم العادي الا 12 ساعه لكن اذا ركزت فيها وجبت فوق 90 بيرتفع المعدل فوق 4 حتى

وبرضو اذا اخرت التخصص ماراح تخسر كثير ... حاول تخلص من المواد العامه فانت لازم تاخذها سواء تخصصت الحين او بعدين واعتقد الانتاج مايطلوب معدلات عاليه فان شاء الله تدخل القسم وتنبسط :d

والله الموفق

[heso]

المشاركة الأصلية كتبت بواسطة فارس@@ شد حيلك وإن شاء الله ترفع المعدل بس هل هذه المواد ترفع المعدل ie 201 ee 201

لو شديت حيلك فيها تجيب فوق 90 بالراحة .
خصوصا ee 201 ما تطلب جهد كبير قد ما تطلب الفهم مع الدكتور أول بأول و أسأل مجرب :)

و بالنسبة لـ ie 201
تشد حيلك في كل كويز اللي بالكبيوتر و تجيب اقل شي تلاتة اكسيد داه بالنسبة للجزء النضري
اما العملي فتسوي الواجبات و انتا التيم حقك اول باول
تضمن كده درجة فوق 85 .

[خافي الأحزان]

نصيحة مجرب

عشان ترفع معدلك نزل مواد قليل تحت 10 ساعات وبدع فيها وبترفع المعدل إن شاء الله

إذا خربتها ونزلت ساعات كثيرة ممكن تحوس مع المواد وتجيب درجات طايحة أو ممكن ترسب في مادة لا قدر الله ويطيح أبو المعدل

[حلمي بروفيسور]

نصيحتي لك
نزل مواد كثير وسهلة وانت وحظك ياتجيب درجات حلوة وتلقى معدلك وصل للاربعة ولا تخبص وتلقى معدلك يطيح لاقدر الله هذي الطريقة تنفع ل الناس الغير صبوره >>>زيي

[صقرر]

مافي شي اسمه سهل في الهندسة ولا تاخذ بنظرية " نزل مادة سهلة ترفع المعدل "

كل مواد الهندسة اذا ذاكرتها اول بأول حتجيب درجة عالية وانا اضمن لك ذلك

خذ صيفي ونزل المواد الي تبيها حتى ولو كانت صعبة وذاكرها وبإذن الله حتجيب الدرجة العالية

وحتدعيلي

تحياتي

[heso]

انا معاك انو ما في شي صعب و كله يعتبر سهل ..
لكن في شي اسهل من شي يعتبر و السهولة تفرق من مادة لأخرى و تفرق من شخص لآخر حسب قدراته و ميوله الشخصيه ..

و انا اللي شفته سهل قلتلك عليه :)
أما اللي انتا تشوفه سهل محد حيعرفه غيرك طبعا و محا تعرفه الا لما تنزل المادة و تشوف علاقتك بيها كيف و مدى استيعابك ليها ...


اللهم لا سهل الا ما جعلته سهلا !!