لكل من يحلم بإدارة وإقتصاد اتفضلو هنا في مصلحتكم

[Esraa .MD]

السلام عليكم ورحمة الله وبركته

اولا كيف حالكم ان شاءلله بخير ثانيا قبل ماتقراو كلامي خليكم واثقين في نفسكم قبل ماتقرو واقرو كل كلامي
اخواني واخواتي
كل الي يحلم بإدارة واقتصاد يقول انه احلامو اتبددت او راحت
مو ملاحظين انه ماسار عندنا موضوع غير ادارة واقتصاد مافي خلاص حلمنا ضاع طيب ليش دا كلو

إحنا بإمكاننا انه نبني الأمل لا تكسرو جسر الامل اول شي هما اعطو فرصة الخيار للعلمي لانه مفكرين انه هما يقدرو واحنا مانقدر
طيب ليش احنا ما نتحداهم بدل ماتجلسو تبكو وتتحسرو وتحرقو في قلبكم وتضيعو وقتكم

ليش ماتزاكرو وتجيبو معدلات جيبو فوق 4 وقتها محد يقدر يفتح فمو ولا يقول ندخل العلمي يعني مثلا واحد طالب علمي جايب 3 وواحد طالب اداري جايب 4 بذمتكم حياخدو العلمي لا طبعا احنا نتحداهم ونجيب معدلات فوق الخيال عشان يشوفو انه احنا نستحق بجدارة انه ندخل الي نبغا على فكرة العلمي قليل الي جايبين 4 واغلبهم مايبو اصلا ادارة واقتصاد همهم كليات طبية فإحنا بيدنا نحقق حلمنا وندرس ونجتهد ونجيب اعلى المعدلات ونتحدا المناهج الصعبة ونتحدا الاسئلة الصعبة ولا تفكرو ابدا انه خلاص انتهى الحلم خلو قدامكم معدلاتكم كيف تبو تكونو في المستقبل اداريين وانتو حلمكم ضعيف من شروط انكم تكونو ادريين انه تكونو قويين وماتنهزو من كلمة وحدة يا اخواني وياخواتي احنا داخلين على اختبارات ولا توترو نفسكم بالعكس خلو طموحكم عالي وقولو داخلين داخلين غسبن عنهم لما تجيبو معدل عالي محا يقدرو يفتحو فمهم ويحدخلوكم غصبن عنهم
كلكم يلا ابتسمو واقفلو الموضوع دا وانسو وشدو حيلكم واجتهدو وجيبو معدل فوق 4 اقل شي 3 ونص وحتدخلو الي تبغو وحاولو قد ماتقدرو معدلاتكم تكون اعلى من العلمي
ترى لسا الامل موجود والامل بيد الله سبحانه وتعالى ثم بيدكم ربنا قال اسعى يا عبدي انا اسعى معاك كل يوم ادعو ربكم وخلو نيتكم صافية وزاكرو وشدو وبإذن الله الواحد الاحد ربنا مايضيع تعب احد رب العالمين مايرضى بالظلم خلي عندكم امل ترى عندنا رب كبير والله ربنا موجود مايضيع تعب احد قولو يارب وصلو عالنبي وان شاءلله مايسير خاطركم الا طيب

اتمنى اكون ماطولت عليكم او ازعجتكم والله يوفق الجميع