موظفات الأمن < من وجهة نظري

[..{ اسكــادا]

بسم الله الرحمن الرحيم

السلام عليكم ورحمة الله وبركاته

أولاً الحمد لله الذي بلغنا وإياكم رمضان وأعاننا على صيامه وقيامه والله يتقبل مننا ومنكم

ثانياً أنا كتبت الموضوع هذا تعقيباً على موضوع هنا لوحدة من الأخوات بس اكتشفت إن الموضوع قديم ولو رديت فيه راح يكون ردي طويل فقلت أكتب موضوع مستقل أوضح فيه وجهة نظري
بس أحب أقول إني طالبة في الجامعة لاني موظفة ولا أعرف أحد لا في الأمن ولا في الشؤون < من باب التوضيح فقط
بس أنا لاحظت إن البنات صايرين مو متقبلين الأمن أبدا مع إني ما شفت منهم إلا كل خير والحمد لله < لا أحسد نفسي بس

بالنسبة لقوانين الجامعة اللي على قولتكم كل يوم قانون جديد فأنا ما أشوفهم يخترعون قانون إلا وبعض البنات الله يهديهم يكونون مخترعين مليون حركة
وراح أوضح لكم أسباب قوانينهم إذا أراد ربي

أول شي بالنسبة لإخراج البطاقة من المحفظة أو من حاملة البطاقة فهم يسو كذا عشان يتأكدو إن البطاقة بطاقة حقيقة مو صورة ! < فهمتو شي ؟
طيب أنا أفهمكم وحده مره قالت لي إنو في بنت صورت بطاقتها ولصقتها على بطاقة الصراف وأدتها لأخواتها وطبعا من جوا المحفظة ماراح تبان إنها بطاقة الجامعة الحقيقية

< ما أحب القيل والقال بس عشان أوضح لكم هم ليش حطو هالقانون وهذا كلام البنت يعني أنا صراحة ماشفت اللي سوت هذي الحركة عشان كذا خذو اللي يعجبكم واتركو الباقي

الشي اللي بعده منع استخدام فيش الكهرباء
الصراحة أنا ما أدري ايش السبب اللي بالزبط يخليهم يمنعونه بس أنا ما أشوف له داعي إنك تشحنين جوالك مثلا في فيش الجامعة !
صراحة شي غريب يفترض إنك شاحنه جوالك قبل لا تجي للجامعة
معليش لاتزعلو مني بس هذا الشي الطبيعي يعني انتي مثلا لو رحتي مول بتقولين للسكيورتي بالله فين الفيش بأشحن جوالي ؟

حكاية خروج الطالبات قبل الساعة 9
هذا شي طبيعي لأن أقل محاضرة تكون مدتها ساعة وتبدأ من الساعة 8 فهم ماغلطو في هذا الشي واللي يقول البنات الصايعات يقدرون يخرجون لو يبغو في وقت ثاني أقولكم إن الأمن مفترضين مبدأ حسن النية في الطالبات فعشان كذا لو في طالبة راح تخرج بدري فيمكن مايكون عندها الا محاضرة وحده من 8-9
وبعدين لعلمكم ترا كثير من الجامعات والكليات ممنوع فيها الخروج قبل الساعة 12 (الله يجزاهم خير الأمن عندنا وربي متساهلين معانا كثير) وهذا الكلام مو من عندي قريبتي كانت تدرس في جامعة الملك سعود وحالياً معيدة وهيا بنفسها قالت لي هالكلام ولو تبغي تخرجي قبل الساعة 12 لازم تجيبي ولي أمرك وبطاقة ومشوار يعني اللي تجي مع سواق لاتحلم تطلع فتخيلو لو كنا كذا إحنا كمان يعني بدل لا تستني ساعة تستني 3 ساعات على الأقل

إبراز البطاقة عند الدخول هذي مفروغ منها

طيب عند الخروج أقولكم عشان أكثر من شي

أول حاجة إن بنات السكن لهم بوابة وحدة يخرجو منها وهم بهذي الطريقة يحاولون إنهم يضبطون البنات وانتو عارفين إن بنات السكن مسؤوليتهم على الجامعة

ثاني شي عشان بنات الانتساب يحاولون يضبطون برضو دخولهم وخروجهم
طبعا انتو عارفين انتو بنات الانتساب دوامهم متأخر فهيا تشوف مثلا الساعه 1 أو 1 ونص تلاقي بنت انتساب خارجه ! فأكيد هنا بتسألها إيش يطلعك الحين ؟
وأفتكر أول سنه ليا في الجامعة كنت خارجة عشان دوامي خلص وكانت معايا صاحبتي انتساب خرجت عشان تعطيني ورقة جابها أبوها لها فسألتها ليش طالعه الحين ؟ قالت لها إنها بتديني ورقة .

وكمان في بنات كثير ماتكتشف إن بطاقتها ضايعة لما تجي عند البوابة عشان تطلعها للأمن !

وأشياء ثانية كثير ما شددو عليها إلا عشان مصلحتنا وحتى لو كان فيهم ناس شوية شديدين أو معصبين فما ألومهم إنتو شوفو الأستاذات لما نجي نغير الجداول ولا نعدلها كيف يعصبو علينا ويكلمونا بدون نفس ، مو عاد موظفة أمن يعني كل المسؤولية عليها وبعدين كلها هذي من ضغوط العمل شي غصباً عنها
واللي يقول أنهم مو متعلمين وماعندهم شهادات مو لازم كل من أخذ شهادة صار متعلم ولا يعرف يتعامل مع الناس ومعليش أنا أشوف هنا ردود لبعض البنات الله يهديهم ما توحي لك إنها طالبة في الجامعة أبدا ولا إنها انسانه تراعي غيرها ولا وحدة واعية

وصراحة أنا أهنيهم متحملين التعب والكد عشان اللقمه الحلال وانتو ماتعرفو ظروفهم يعني هم الحين من حلاة رواتبهم ؟ الله يعينهم بس على ظروف الحياة الصعبة ويهديهم ويطول بالهم علينا شوية

وحبيت أقولكم حكاية على الطاير بدل الموضوع الثقيل هذا
مره صاحبتي كان معاها جوال كام وكنا نتفرج فيه فجات وحده ما أدري من الأمن أو لا بس يمكن من الشؤون لأنه كانت لابسة لبس عادي مو زي رسمي فقالت لنا دخلو الجوال وهيا تبتسم لأنها شافتنا وإحنا نتفرج فيه مانصور مثلا قالت كذا بدون ولا كلمة ثانية والله لا أخذتو مننا ولا خاصمت ولا شي يعني هم فيهم الناس الكويسة وكثير منهم كذا والحمد لله

الحين أترك لكم حرية التعليق بس لو سمحتو بدون الردود اللي فيها هذول مو متعلمين و الكلام اللي زي كذا لأن التعليم مو شهادة ناخذها من الجامعة وبس

وبدون سب أو شتم

وإذا حابين تنتقدو انتقدو بشويش :)

وبس والله يبلغنا وإياكم العيد وكل سنه وانتو طيبين