جامعتنا الموقرة

[nona-5]

السلام عليكم ورحمة الله وبركاته
حأتكلم بخصوص تفعيل بطاقة المكافئات بالنسبة للطالبات. في فرع الشرفية علقت الإدارة إعلان يوضح إنو تفعيل البطاقة حيكون في بنك سامبا في شارع الأمير سلطان ولمدة أسبوع واحد فقط . ولمن رحت فرع شارع الأمير سلطان الموظفة قالتلي الإدارة غلطت وكتبت إنو في شارع الأمير سلطان وطلع في حي المحمدية !!! رحت لفرع المحمدية وصلت 10:30 ولقيت الزحمة واصلة لبرا البنك دخلت وشوفت زحمة ماقد شوفت زيها في حياتي لدرجة إني ما قدرت أتحرك من مكاني البنات هما إللي كانوا يقدموني قدام ويرجعوني ورا وكل البنات كانوا نفس حالتي. والجو كان حر وكتمة ومن كتر الكتمة في بنت داخت . لمن مديرة الفرع شافت الزحمة الشديدة وإنو في بنت دايخه خافت وقالت ما نبغاكم تسببوا لنا وفيات في البنك وجلست تقول خلاص أرجعو بيوتكم السيستم قفل وما يستقبل أكترمن 200 رقم سري وفوق في 200 طالبه وما حأستقبل أكتر منهم . طبعا في بنات كتير سابو محاضراتهم وخرجوا وفي بنات جايين من مكة وفي بنات راحوا لأكترمن فرع ورموهم على فروع تانيه. وجلست المديرة تصرخ وتزعق بأعلى صوتها ولمن شافت إنو محد جالس بيخرج قالت أنا حأدخل السيكيورتي عشان يطردكم برا وفضلت تهدد بالسيكيورتي تلاته مرات . بعدها بدأو البنات يخرجو ويخفوا بس لسه كان باقي بنات مارضيو يطلعو فجلست تسكتهم وتقولهم روحو فرع الجامعة الرئيسي وفعلوها من هناك والتفعيل لمدة شهر لكن جونا طالبات وقالولنا إنهم راحو فرع الجامعة الرئيسي والفرع قلهم روحو للمحمدية . أنا جلست أستنى لمن 12 عشان أشوف الـ 200 طالبة إللي مجلستهم فوق وفي النهاية ما نزلو غير 10 طالبات بس . طبعا أنا طلعت بابا من دوامو وضيعت ساعتين تقريبا ع الفاضي وفي النهاية رجعت البيت. لكن في حاجه غريبه سارت . وحده من صديقاتي راحت بعدي وقالتلها الموظفة إنو في 500 طالبة جالسين يفعلولهم بطاقاتهم !!! صديقتي شافت بنت نازلة من فوق فسألتها قالتلها كم في طالبة فوق ؟؟ البنت قالتها محد فوق المكان فاضي !!!!!!!!!!!!
السؤال إيش مصلحة المديرة إنها تطردنا وتضيع علينا دوامنا وتكدب علينا وفي النهاية تقولنا إنهم ما اتوقعوا تجيهم أكتر من 200 طالبة ؟؟؟
بالله هادا كلام يدخل في عقل إنسان ؟يعني معقولة بنك كبير زي سامبا طاقتو الإستيعابية 200 طالبة فقط ؟
والأسوأ من هادا قلنا للمديرة خلينا نفعل البطاقة من أي فرع من فروع سامبا قالت بالحرف الواحد ممنوع النظام ما يسمح !!!!
إلى متى هادا التسيب والإهمال والفوضى واللامبالاة وتعطيل مصالح خلق ربي ؟؟؟؟؟؟؟؟