هذه أسئلتي كلها بين يديكم وخااااااصة يلدرم

[عين الشمس]

بسم الله الرحمن الرحيم

السلام عليكم ورحمة الله وبركاته

الله يرضى عليكم تجاوبوني بمعلومات صحيحه

أبغى أفهم أشياء كثيره وعندي أسئله كثيره

س1:نظام الخدمات odusموراضي يشتغل معايه وأدخل رقمي الجامعي كاسم مستخدم ورقم السجل المدني كلمة سر ويقول أنت مستمر بالدراسه تكفون الفزعه أبغى جدولي؟؟؟


س2:المقررات الدراسيه والكتب كيف أخذها مع مين أتواصل بالضبط؟؟؟

س3:هل فيه نظام معين أو برنامج معين أقدر أتابع من خلاله المحاضرات أو أستمع للمحاضرات أو أخطط مع الدكتور؟؟؟؟؟؟؟؟؟؟؟

س4:هل فعلا ستكون الأختبارات المنتسبين في مناطقهم ما صحة هذا الخبر ومتى سيطبق؟؟؟

س5:هل يحتاج إرسال صوره من وصل التسديد للجامعه؟؟؟

س6:وش قصة نتائج الفرز من هم المفرزين وش قصة الدورات التأهيليه لا زم أحضر ولا وش القصه ؟؟؟

س7:هل هناك مقابله شخصيه ولا وش المقصود بالأعلان الي فوق بدء أستقبال المرشحات للقبول ؟؟؟؟

س8:أنا كمستجد وفي السنه التأهيليه أقدر أنزل ساعات من المستوى الثاني عللا المستوى الاول ؟؟؟

تكفووووووووون تكفوووووووون لا تطنشوني والله أني مثل الاطرش بالزفه





ترو أنا منتسب مستجد توني أنقبل بالفتره الثانيه وأرسلو البطاقه لكن ما أخذتها باقي

[M!Ss AmoOoLa]

أنت تأهيلي

ترى فاهمة الدنيا خطأ

[مشاري بن سعود]

اول شي نظام odusمو شغال الان يتفعل للمستجدين بعد العيد كلنا بالهوا سواا ثاني شي الكتب اذا نزلت الجداول فيه مكتبه دار حافظ جميع الكتب اللي ودك يرسلوها لك مع الملخصات ورابع شي تقدر تاخذ ملخصات من الموقع هذا وبامكانك الاختبار في مدينتك اذا كنت بالرياض او الدمام والاماكن سوف تتحدد بعد العيد ومايحتاج ترسل وصل التسديد بس خله معك الين يكتبولك تم التسديد في موقعك ونتائج الفرز للمنتظمين فقط والدورات التاهليليه مو لازم تحضرهاااا بكيفك ومافيه مقابلات شخصيه هذا حقت المنتظمين بعد وماتقدر تنزل مواد لان السنه الاولى تحضيريه بعد ماتخلصها الجامعه تحدد تخصصك هذا اللي اعرفه ومتاكد انشالله منه وربي يوفقك

[عين الشمس]

غرور ؟؟؟؟؟؟؟؟؟؟ الظاهر داخله غلط ؟؟؟؟؟؟؟؟

[عين الشمس]

مشاري بن سعود الله يرضى عليك ماقصرت كفيت ووفيت

العلم والعالم أنا منتسب مستجد أنقبلت بالفتره الثانيه والبطاقه ارسلوها وباقي ما اخذتها

والوضع العام أطرش بالزفه


وباقي أنتظر ردك ياااااااااااا يلدرم

[سلطان الرياض]

الآخ مشاري كفى ووفى

وإجابته شافية كافيه.. دمتم بخير,,,,

[مشاري بن سعود]

روح استلم البطاقه من الفرع اللي ارسلت منها الاوراق ترى بيرجعوها الجامعه وتتوهق

[العلم والعالم]

الجواب الأول : مثل ما قال الأخ مشاري النظام لم يفعل

وبالنسبة للجدول الدراسي تحصل عليه بعد ما يفعل النظام وبعد ما تنزل الجداول في الخدمة الإلكترونية

الجواب الثاني :بالنسبة للمقررات ومعرفة أسماء الكتب والمطلوب والمحذوف تحصل عليها من خلال الخطط والمفردات الموجودة في مواقع الكليات أو بعد ما ينزل جدولك الدراسي في الأودس تجد أسفل الجدول مكتوب باللون الأزرق مفردات المواد هذه كلها تفيد بإسم الكتاب المطلوب ومؤلف الكتاب وتاريخ طبعة الكتاب والمحذوف من الكتاب إذا كان هناك محذوف

أما بالنسبة لمكان توفر الكتب فيوجد الكثير من المكتبات التي بجوار الجامعة تقول بتوصيل الكتب الى أي مكان تريد ما عليك سوى الإتصال على أحد هذه المكتبات وإعطاءهم أسماء الكتب وخلال يومين تكون الكتب بحوزتك مهما كان موقعك

ومن أشهر المكتبات مكتبة خوارزم العلمية وهي المتعهد الرسمي للجامعة

مكتبة دار حافظ ومكتبة دار الهدى

الجواب الثالث : أذكر لما كنت في أول مستوى دراسي لي بالجامعة قبل ثلاث سنوات كان هناك سيديات توزعها الجامعة وهي عبارة عن شرح للمناهج للفصل الأول فقط ولا أعلم هل إستمرت لكن أعتقد إنها إنقطعت


الجواب الرابع :الفصل الماضي والفصل الذي قبله والذي قبله ثلاث فصول متواليه كان هناك إختبارات للمستجدين فقط في بعض المناطق وهي :
المرة الأولى مركز في أبها ومركز في الشرقية
المرة الثانية والثالثه مركز في أبها ومركز بالشرقية ومركز بالرياض

الجواب الخامس :لا تحتاج نهائي أن ترسل صورة من وصل السداد

الجواب السادس :الفرز إذا كنت منتسب لا علاقة لك فيه وبالنسبة للدورات التأهيلية مثل ما ذكر من قبلي غير ملزمة الحضور فأنت بالخيار تريد تحضر أهلا وسهلا ما تريد الحضور الله معاك وموفق خير

وهذه الدورات مدتها إسبوعين تعقد مرتين بالفصل الواحد ما عدى الفصل الصيفي تعقد مرة واحدة وما يقال في الدورة الأولى هو نفس ما يقال بالدورة الثانية ووضعت دورتين لأتاحة الفرصة لأكبر عدد من الطلاب بالحضور حيث أن الدورة الأولى تكون في بداية الفصل الدراسي والدورة الثانية تكون في نهاية الفصل الدراسي والطالب الذي يسجل في الدورة الأولى لا يحق له أن يسجل في الدورة الثانية والعكس كذلك

وتعتبر هذه الدورات مهمه نوعا ما خاصة مع الطلاب المستجدين والدورة هي عبارة عن شرح للمقررات كاملة بحيث كل مادة تدرس ست محاضرات

والطالب بالخيار ليس شرطا أن يحضر الدورة كاملة يمكنه أن يحضر الإسبوع الأول أو الأخير أو يوم واحد أو ما يحضر نهائي كلا على حسب ضروفه

الجواب السادس : خاص بالمنتظمين

الجواب السابع: ليس هناك مقابلة شخصية والأعلان يخص المنتظمين

الجواب الثامن : الطالب المستجد ينزل جدوله تلقائي من الجامعة ولا يستطيع أن يضيف أو يحذف علية ولايستطيع أن يعتذر عن الترم إلأ بظروف خاصة

أتمنى أن أكون أفدتك

[Albaraa]

جزاكم الله خير على إجابتكم

[ماجد عبد الله]

شوي شوي ع الاادمي...المهم لا تستعجل كل شي بتعرفه بوقته...استانس بالصيفيه وعقب العيد يمديك ع همك