" ابعتذر عن كل شيء إلا الهوى ما للهوى عندي عذر"..

[على البال]

اسمحيلي يالغرام العذب يالوجه السموح
ان لزمت الصمت أو حتى لبست الاقنعة

اعترف لك ما بقى من عالي الهمه سفوح
انحدر كلي مثل طفل تحدر مدمعه

من يبي بالله يفتح لي غلق صدره وابـوح
ضاقت الدنيا بشاعر طيب قلبه ضيعه

ما قبلنا الحظ قولي وين ابارحل ويـن اروح
الصبر ياهو يعذب و الاماني موجعة

اه يا جود الحزن وياي و الفرحه شحوح
ضايع بهمومي الغبرا بوسط المعمعة

اشتكي لوسادتي دنياي واسمعها تنوح
كنها بعضي وبعضي وين هو من هو معه

ايه انا و العالم المغرور و الياس اللحوح
خايض حرب الرياح اللي تسوق الاشرعة

مختلط في عبرتي حبر الشقى ودم الجروح
ومستوي في نظرتي غرب الوجود و مطلعه

عودي المبري بقى به من عطايا الوقت روح
وفصل خامس حاير بين الفصول الاربعة

وراس مالي ذكريات حلم وأمال طموح
لا صديق ولا رفيق ولا طريق واتبعه

نوب اسافر في سديد الراي ونب في جنوح
مختفي صوت الحقيقه كيف وش لون اسمعه

سامحيني دام هجري واضح كل الوضوح
واسمحيلي بالرحيل بلا تذاكر وامتعه



..يتبع