استفسار بسيط بخصوص القرار اللي حيتنفذ من قبل وزارة التعليم العالي

[لوديا]

السلام عليكم.. ومسائكم معطر بالسعادة والرضا بإذن الله..


أخواني قريت أمس في جريدة عكاظ إنه وزارة التعليم العالي أصدرت قرار بحصر الوظائف الأكاديمية لطلاب برنامج خادم الحرمين الشريفين للابتعاث الخارجي، و لن يقبل توظيف موظفي الحكومة ومن هم على رأس العمل من حملة الشهادات العليا!!!


الشرط الثاني فيه نوع من العدل لأن الموظف الحكومي ضامن مستقبله الوظيفي والأحرى إنه يترك الفرصة لغيره من هم أولى بالوظائف الأكاديمية.. لكن الشرط الأول اللي لحد الآن ماني مستوعبته أو أنا فاهمة الشرط خطأ!!
كيف يعني قصر الوظائف الأكاديمية على طلاب الابتعاث ؟؟؟ طيب واحنا حملة البكالوريوس والماستر من جامعات وطنية ايش مصيرنا؟؟؟

يعني لو الشرط زي ما انا فهمته حيكون مصيبة والله ، لأنه لا وزارة التربية والتعليم حتوظفنا لأن شهاداتنا غير تربوية وشكلها وزارة التعليم العالي حتكمل الناقص...

يا جماعة أحد ينورني هل الشرط صح زي ما انا فهمته ولا هما يقصدوا حاجة ثانية؟؟

وجزاكم الله خيرا..

[سمارت غيرل]

يا ريت تعطيني رابط الخبر .. لو سمحت

[fresh water]

لا حول ولا قوة الا بالله

[لوديا]

اهلين اختي سمارت الخبر قريته في الجريدة الورقية ودخلت عالموقع تبعهم ولقيته الحمدلله في الأرشيف ...

http://www.okaz.com.sa/new/Issues/20...0706515300.htm

ان شاء الله يكون بس مجرد قرارات في الهوا وإذا كان صحيح نحاول قد ما نقدر إننا نعترض ونرفض لعل صوتنا يوصل للمسؤولين..

[همة همة همة]

طيب وخريجين وخريجات بكالوريوس دراسات اسلامية ولغة عربية الوطنين..فين يروحون ؟
هل يدرسونهم في الخارج مواد دين اسلامية ويبعدونا احنا الي درسنا في السعودية ويحطونهم بدالنا ..مثلا ؟؟!!

الاولى نحن الي في السعودية .. مو كل من درس برى اتقن التدريس او العمل ..البعض ماراح ..يدرس ..بنات الاحياء عدا االاحياء العام لا يتم توظيفهم في التعليم العام ..والحين يبغون يكملون ماجستير عشان يلقون امل انهم يتعينوا محاضرات او معيدات ..سدوا عليهم الطريق ..يالله يارب الفرجة منك ..

لا خبر ان شاء الله لا يفع على ارض الواقع ..
الله يكتب الخير

[ساكو]

اذا الخبر صحيح فهالشئ يحمل سبب لآ ثالث له ..
وهو يخافون من ردة فعل الجامعات اللي بامريكا وبريطانيا وغيرها بأن طلابها خريجين وعاطلين
وهالشئ يأثر ع سمعتهم ومكانتهم بين الشعووب عشان كذا ربوعنا يوظفونهم ويخلصون عليهم
مع انهم مارح يقدرون .. قبل سنه قريت ان عدد المبتعثين سنوياً 100 الف مبتعث
يعني مارح يغطونهم بالوظائف ابدا .. مانقول الا الله الرزاق والله يعين وبس ..

[لوديا]

حتى لو عدد المبتعثين وصل بالآلاف هذا ما يعطيهم الأحقية في قصر الوظائف عليهم.. غير إنه الحكومة في طور انشاء 10 جامعات أو أكثر في مختلف المناطق غير الجامعات الناشئة اللي مازالت تعاني من الشواغر.. لسا ما زالت القدرة موجودة على استيعاب الكثير من المواطنين سواء مبتعثين أو غير مبتعثين.. لكن في اعتقادي انه المسألة نجرد تعقيد لو صح الخبر لا أكثر ولا أقل.. لا ممكن أكثر من تعقيد كمان...

[DHAFER99]

فيه جامعات طبقت القرار من سنة وهو واضح في إعلاناتهم بس أتوقع. بيكون محصور على التخصصات العلمية فقط مع انه ظلم لانه المفروض يتعين الذي يستحق التعيين بغض النظر عن مكان شهادته من الخارج او الداخل والمقابلة تحدد المستحق للوظيفة

[shaden]

مالنا غير انه نرفع خطاب للمقام السامي

يعني لاوظفونا الخدمة المدنية ولا وزارة التعليم العالي يعني الحل يا اخوان ؟؟؟؟؟؟؟؟؟؟؟ لمتى حنفضل سلبيين

خلونا نسوي قرار بين بعض اقسم بالله مستغليين سكوتنا المستفيد اولادهم وحبايبهم واحنا لنا الله

[لوديا]

أنا برضو بقول كذا يا شادن .. لازم نتكلم لازم أصواتنا توصل للمسؤولين ظلم اللي قاعد يصير ... بس الأفضل نتحرئ مدى مصداقية الخبر لأني لازلت متأملة إنه يكون مجرد كلام صحافة ماله أساس من الصحة .. ونفسي يجي احد مسؤول ويبرد قلبي ويقولنا اذا هذا الخبر المنكد صحيح او لا...


اللهم اكتب لنا الخير حيث كان .. واصرف عنا كل سوء يا رحمن..