إيش رايكم ما كأنهم زودهــــــــــــــــــــــــــا ؟؟

[مشمشانا]

سلام معطر بفل وياسمين
موضوعي اللي أبغى أتكلم فيه اليوم انا لاحظته كثير بالفترة اللي راحت واستغربته

ابتكلم اليوم عن الزواجات وكيف سارت وأبي رأيكم بصراحة وهل انتو مع هذي الظاهرة أو لأ






زمان كان المعروف أنو الخطوبة تكون مختصرة وبين الأب والأعمام أحيانا وعلى سكتي لين ما ربي يتمم كل شئ
وقبل الملكة بفترة يعلنو الخطوبة وتسير الملكة بسيطة وعائلية مقتصرة على العمات والخالات وفي البيت
وبعدين يجي الزواج اللي يكون كبير وينعزم فيه القريب والبعيد و يسوا فيه كل اللي في خاطرهم
وفي بعض العوائل عندهم الغمرة والشرعة وانتهى الزواج في الخطوبة لبس العروس عادي وفي الملكة فستان ناعم
وفي الزواج تفصل عند أحسن الخياطات لو تبي .

و اللحين :
( الخطوبة )
تطور شوي شوي من حفلة صغيرة بعدها إلى حفلة ينعزم فيها الاقارب كلهم وفيها دي جي في بعض الأحيان
( ما بعد الخطوبة )
حفلة مباركة خاصة بالبنات زي الدي جي وبوفيه وبس الحضور مقتصر على من في سن العروس
( الشبكة )
سار لازم شبكة وكل بنات عماتها وخالاتها وخالاتها وعمتها موجودات نفس الملكة زمان
( الملكة )
في البداية حفلة كبيرة في البيت واللي بيوتهم صغيرة في استراحة بعدين سارت في قاعات صغيرة بدون مطربة
بعدها سارت قاعات صغيرة ومطربة وبعدين كبرت القاعة و كثروا المعازيم وسرنا نسمع الحريم الكبار يقولوا
كانوا زواج مو ملكة وما ساروا يرضو بغير كذا (( وحدة من معارفي أبوها توفى قبل ملكتها ب5 شهور خطيبها
ولد عمتها طبعا بسبب وفاة أبوها قررت تكون الملكة في بيتهم اللي مو فلة قصر لما عرفت عمتها زعلت وقالت ليش
ولدي مو قد المقام ملكتو تسير في بيت لأ ما أرضى لازم في قاعة كأنوا اللي توفى مو أخوها وأبو البنت والثاني
قريبتي نفس الوضع أبوها توفى واصلا البنت من دون شي كانت تبغى ملكة صغيرة قبل الملكة جات أم العريس
وقالت انا عزمت 70 وحدة طبعا غير معازيمهم وسار العدد فوق المية فاضطروا يسوها في قاعة )) لين هنا وصلت
الملكة في بالكم لأ قبل شهر أنعزمت على ملكة كانت الملكة في اكبر قاعة بالهليتون وكانوا جايبين فرقتين مو مطربتين
يعني كل فرقة فيها مطربتين ثلاث بالإضافة لمطرب وحاطينه بروجكتر يغني ويردوا عليه المطربات وغير السيرفس
الاضافي اللي طلبوه وغير أشياء كثيرة ولاحظو أنها ملكة طبعا انا انصدمت وقلت إيش بقي للزواج
إذا كان هذا سار في الملكة اللي معروف دائما انو الزواج اكبر منها بكثير
(( بعد الملكة ))
حفلة عائلية وعشا بمناسبة الملكة
(( قبل الزواج ))
حفلة توديع عزوبية خاصة بالبنات مابين ناس في بيوتهم وناس في قاعات صغيرة
(( الزواج ))
بالله عليكم إيش ممكن يسوا فيه بعد كل اللي سوه أخر شي في زواج وحدة اعرفها سوا زفات وجابوا فرق تحيها
زفة مصرية ووحدة ترقص مصري وزفة خليجي وبعدين عرضة وبعدين زفة خاصة بأخوات العروسة
وزفة خاصة بأخوات العريس وزفة للأمهات وزفة لبنات العم و لخالة وزفة أخر عروس اتزوجت قبلها
وطبعا الزفة لرئيسية كل شي تتوقعوا سوه فيها
(( بعد الزواج ))
غدا ولا عشا بمناسبة الزواج وبعدها يسافروا شهر العسل والموضوع ما انتهى
(( بعد شهر العسل ))
حفل استقبال كبير ويزفوا العروس ويعزموا
(( بعد حفل الاستقبال ))
أخر شي حفلة صور العروسة تعزم أخواتها وأخوات زوجها وقريباتها وصحباتها وتعملهم عرض للصور
بالاضفة لبوفيه على شرفهم

بالله عليكم ما زودوها ولوضع زاد عن حده اللي يشوفهم يقول ما صدقت تتزوج وراحت صورة العروس القديمة
وطبعا سار لازم كل واحد من هذي الحفلات له فستان خاص و لازم يكون فستان محترم يعني مو خفيف وصيفي
لأ زي فساتين المناسبات

أنا شخصيا رافضة هذا الأمر وحتى لو كثير من معارفي يسوه فهذا الشيء أنا أرفضه

وأخيرا آسفة على الإطالة