Walking away from the sun :: SoulTalk

[Daniaa.]

وجدت ماكنت أبحث عنه .. كان اكثر من رائع
كنت الجأ اليه في كل الأوقات.. أشاركه افراحي وأتراحي ..
اعتدت عليه, تعلقت به كثيرا, حتى ما عدت استطيع تخيل مرور يوم واحد بدونه في حياتي..
كنت اعلم بأننا سنفترق يوما ما.. لكن ام اكن اعلم انه سيكون قريبا لهذا الحد

آآآآه لو تعلم ...

مازلت متأملة

[Daniaa.]

ايش الأسوأ من انو تكون في حالة نفسية سيئة و طفشان من كل شي.. وعلى وشك انك تبكي ؟!؟

اجابة: انو تكون عارف انو الشي اللي انت متضايق منو...اهبل و سخيف ومو محتاج دا كلللوو

بس ايش نقوول.. الشكوى الى الله ...





مشكلة اللي يكبر المواضيع x_x

[Daniaa.]

لمن كنت لسا تانية ثنوي.. جابولنا المدرسة وحده تعملنا محاضرة... كان كلامها مرره حلو وانا مره اتأثرت بيه بصراحة ..سرت كل مااجي ابى اسمع اغاني افتكر كلامها انو كيف الواحد ما يضمن عمرو وعلى ايش حيموت ..حكتنا قصة عن وحده بنت كانت تسمع اغاني نفسي احكيكم بس للأسف مني متزكرتها مزبوط واخاف اخرفلكم من راصي ..
فسرت اخاف وقررت انو اتوب و ابطل من الاغاني دي .. وفعلا سويتها وقعدت كدا كم شهر مرا مبسوطة..
قبل رمضان بكم يوم السنة اللي فاتت ما قدرت امسك نفسي و رجعت تاني .. كنت مرره مكسوفه من نفسي و عللي عملتو ..استغفر الله بس ياربي سامحني

حسيت بالفرق لمن بطلت اسمع اغاني ودحينا لمن رجعت تاني..حسيت نفسي قربت من ربنا اكتر ..





نفسي القا الشي اللي يحفزني تاني ويرجع داك الخوف اللي خلاني ابطل اول مره..

[Daniaa.]

على سيرة الاغاني...

بعد ما سويت عملتي السودا... ورجعت للي ما تتسماش

سارت تمر عليا فتره معلقه على وحده من الباندز... يعني اسير اقعد اتسمع لأغانيهم طوول الوقت الين ما اطفش واقرف منهم ..ادورلي على باند تاني, وعلى دا الحال ..هههههههه


ايام العيد في الصباح.. كنت اتسمع لباند << بلاش اقول اسماء عشان لا اخد زنبكم وفي نفس الوقت اتكلم مع احد الفريندز الغاليين عليا مره ولو اقعد اهرج معاهم ليل نهار ما اطفش ولا امل منهم ابدا ابدا....بس فين يا حسره..

اللي ساير دحين انو كل ما اجي اسمع اي اغنية للباند دي على طول افتكرهم .. والشي دا يضايق مرا لانو يكون نفسي اكلمهم بس للاسف ما القاهم ...بلا في شكل الشيطان


ونفس الشي مع الباندز اللي كنت اسمعلهم قبل دي اللي فوق... كل باند تفكرني اغانيهم بفتره معينة مريت فيها...وكلها سيئة مالت على وجهي
يعني لو حنيت للاغنية الفلانية للباند الفلاني اوقف شويا.. وافتكر انو كان في ديك الفتره كدا وكدا
وعشان لا يجيني داك الاحساس حق ديك الفتره.. ابطل منها .



الله المستعااان ....اسأل الله لي ولكم الهداية

[Daniaa.]

اكتر حاجة اكرهها في بداية كل سنة وخصوصا ازا كانت في مكان جديد زي الجامعة دحين ..حكاية النيو فيسز دي ..
اوف..اوف..اوف..

اول كم اسبوع في اولى ثانوي ..كنت ماره بحالة نفسية سيئة .. والسبب المدرسة, النظام والمكان الجديد لانو كنت لحالي ما اعرف احد
وكانت تجيني الحالة دي مع كل بداية ترم ...الين سرت تالت واتعودت << بدري

كان نظام المدرسة نظام المقررات اللي تقريبا يشبه نظام الجامعة... الحلو في الموضوع انو من اول يوم ليا في المدرسة الين اخر يوم .. في نفس الكلاس و مع نفس البنات كل يوم في وجيه بعض .. تلاته سنوات ,, يعني ارتحت من هرجة النيو فيسز دي

انا ما احب اختلط بالناس كتير.. مو بس ما احب..صعب كمان يعني اخد فتره عبال ما اتعود على اي وجه جديد اقابلو ,, لو كان نفر واحد كم اسبوع ويمشي الحال ازا ما وصلت لشهر..

لكن لمن يكونو ناس كتير زي كلاسي اللي في الثانوي...الين اليوم دا وانا ما اقدر احتك بيهم او اكلمهم على انهم صحباتي وعشرة تلاته سنين...
يعني لو شفت وحده فيهم يدوبك اسلم عليها بس وامشي بحكم اني اعرفها... مافي كيفك وايش اخبارك وايش عاملة ...at all




فالله يعيين دحين ..كل مادة في كلاس وكل كلاس فيلو بنات جداد ونيييوو فيسززز

[Daniaa.]

غريبة المنتدى دا مو مسوي المتواجدوون الآن ..مو قصدي عللي اون لاين عارفه انو في
قصدي في صفحة الموضوع و الملف الشخصي ..اللي يجي تحت مكتوب اسم العضو الموجود في الصفحة وعدد الزوار

هوا احسن انو مو عاملين يعني..عشان بعض الناس اللي محطيين عينهم على كم عضو كدا..
متتبعينهم ..
اول ما يشوفوا مشاركة جديدة لهم او موضوع على طووووول يروحوا يشوفوا .. وكل شوية والتانية خاشيين الملف حقهم ..ههههه
فأحسن كدا عشان لا ينتبهوا ويقولوا اشبهم دول



بس زي مسلا في المدونه هنا .. حلو تكون عارف مين اللي بيقرا وازا في احد متابع

[Daniaa.]

آآآه... ملل..




أتسآءل مالذي يفعلونه اللآن !

[Daniaa.]

الكلام هنا جدا ممتع ..
تقول اللي تبغاه في الوقت اللي تبغاه وتخرج كل اللي في نفسك .. محد يقدر يحشر نفسو ولا يقلك تلت التلاتة كم

[Daniaa.]

- كيــــفك يا قمر
- حبيبتي ناولييني ..مدري ايش
-وحشتيني يا عسل
-يا قلبو.. الخ الخ

مني فاااهمة !!!

مره شي ينرفز لمن تكوني مع وحده وكل كلامها بالطريقة دي... نمك ومجاملات مالها داعي
واللي ينرفز اكتر واكتر.. لمن تكون في سنك .. وازا مو صحبتك كمان x_x

لو كانت حرمة كبيرة ما بينك وبينها شي ..ابله ولا دكتورة مسلا.. طلبت من حاجة تقولك يا حبيبتي .
عادي تحسسك انك زي بنتها وبالعكس تنبسطي لمن تسويلها اللي طلبتو منك .. بدل ما تقولك يا بنت ولا يا طالبة كأنك جاية مدري من فين

اما لمن تكون وحدة زيك.. وتجي تقولك يا حلوه ويا قمر ..ايش لو داعي الكلام دا يعني
بالزات الكلمتين دول...احسها زي كانها بتتريق .
لو ما تعرفيني وتبي تسألي عن شي قولي لو سمحتي بلاش يا حلوه دي !!

[Daniaa.]

لمن يكون الواحد زعلان, مبسوط, ولا متضايق من حاجة..سبحان الله لمن تشوفو يبان في وجهو على طول..
بس انا السنة اللي فاتت اكتشفت انو اقدر اعرف نفسية الواحد من كلامو.. مو قصدي لمن اكلمو فيس تو فيس.. لا لمن اكلمو عالمسن.
مدري هيا قفت ولا اغلبية الناس تقدر تفرق برضو ..



حقول اسم كم عضو واللي لاحظتو من طريقة كلامو.. واللي يشوف اسمو يرسلي ويقولي ازا توقعي كان صح ولا لأ

عموريAHLI : لمن يجي يكتب يكون مكشر.. واحيانا احسو يرد من طرف خشمو ..
حتى لمن يجي ينكت ولا يتريق.. مافي اي تعابير او حتى ابتسامة صغيرة على وجهو.
بيوكيميائية ^_^ : من كلامها يبان عليها انها وحدة طيوبة وقلبها ابيض . بس انها جدية شوية..ولمن تجي تمزح وتنكت..احس برضو ما في اي تعابير على وجهها .
سكووت: دمها خفيف.. صح انو اغلب ردودها اللي قريتها فيها ترقيه و مزح ..بس جواتها كدا احس دمها محروق.. وفي حاجات مضايقها .
lady-fano-bird: لزيزه يناسو عليها ..احسها مهويه شوية..
ǁ غــلأآإ ، رٍوٍحــي ǁ : البت دي مدري كيف...احسها مع ناس وناس...يعني ناس تمزح وتنكت معاهم, ناس ترد عليهم من طرف خشمها , وناس تكون معاهم عادي
Life as Game : لزيز ومره احب اقرا مشاركاتو .. بس احسو لمن يجي يكتب يكون منفعل بزيادة واحيانا معصب ..اليي يخلي فيها شوية وقاحة
Butterfly Hope: مره يا ناسو.. دايمنها مبتسمة و مبسوطة.
miss you : كان يكتب اسألتو وهوا طفشااان ونفسو يلطش احد .

بس هادا اللي افتكرو... ولحد يزعل . وعلى كلمة من طرف خشمو معليش بس ما اعرف اي تعبير تاني بنفس المعنى


" امكن اللي كتبتو يكون تحليل شخصية على نفسية مدري ..مشو حالكم بس "