نصيحه من خطه ب + هل في بونس في الفيزياء؟؟

[lovely one]

السلام عليكم ورحمة الله وبركاته
ممكن اي احد من خطه ب ينصحنا اش نعمل الترم الجي وكيف نزاكر و من فين نزاكر ومين احسن دكتورات في الجامعه

و سؤال لخطه أ هل في بونس في الفيزيا؟؟ وازا في كم حيكون؟؟

و شكرا..............

[Hamsa }~]

البونس هي الأسئلة اللي بتحليهـآ في الإختبأر

3 في الأول

3 في الثاني

4 في الآخر

[الأمير المدريدي]

انت خطة ايش
+
لا يوجد بونص لهذه الدفعة المنحوسة

[lovely one]

المشاركة الأصلية كتبت بواسطة الأمير المدريدي انت خطة ايش + لا يوجد بونص لهذه الدفعة المنحوسة

انا خطه أ للاسف

[!..RahoOofa..!]

في خطة ب للاسف مافي بونس ولا اسئلة زايدة ولا حاجا ..
بالنسبة للاحصاء اول حاجا افهمي مع الدكتورة في الحصة وتلاتة ارباع الدروس مايحتجلها مداكرة اول باول
طبعا باب الاحتمالات والبابين اللي بعدها لازم تفهمييها وتحلي اكبر قدر اسئلة تقدري تحليها حملي نماذج كتيرة نماذج اولاد او بنات وحيكون عندك الاختبار مافي اسهل منو
---------------
الكيمياء لازم تفهمي كل نققطة وركزي مو تفهمي يعني تعرفي الخطوات لا لازم تفهمي كيف دا جا ومن فين عشان في الاختبار هما يجيبولك مثلا درسين ويربطولك هوا في بعض ولازم تكوني فاهمة
بس من جد لازملو تركيز يعني اخرج من الاختبار اقول ماعندي غير غلط واحد ويطلع غلطين او 3 ولمن اراجع ورقتي الاقي اغلط في اتفه الاسئلة المباشرة يعني ,,
--------------
الاحياء من التست بانك نسخ ولصق انتي شوفي كيف حفظك ومتى لازم تبدأي
انا عن نفسي ماكنت اذاكر اول باول بس الكيميا اقولك لازملو فهم مراااا ..

[reemooo]

ليه كذا ترى خطبه ب مرررررنه اكثر وعندكم وقت كبير عشان تقدرو اتذاكر لا تشيلو همها مررررره مجرد شويت تركيز في الكيمو والستات ولازم تروحي لدكاتره شطار ودرجة البيو في يدك انتي تقرري اذا تبغي تكوني كريمه مع نفسك ولا تبخلي عليها

[][meme][]

المهم المذاكره اول باول في كل المواد

وفي الاحصاء دوري الدكاتر الكويسين

وموفقه يارب

[ahmad31]

على حسب إذا كنتي راعية فهم وإلا حفظ :)

الاحيااء << من الآخر يبغاله مخ يحفظ و ماينسى ....
الكيميا لازم مذاكره يومية أو شبه يومية ...
الاحصاء اسهلهم بس يبغاله فهم بسيط و شوية ذكاء

بالتوفيق للجميع

[zozo moh]

سؤال ياجماعهـ

من زود الح ـماس والله يدوومهـ

سؤال انا ناويه اذاكر التست بانكـ من الحين

يعني هل تتوقعو ان يتغير ..؟

[فتاة بقلب أمة]

خطة ب أحلى من خطة أ بكثيييييير

وعلى قد ما تذاكري على قد ما تجيبي فيها درجات
ونصييييييحة خذيها مني لا تسمعي كلام أي أحد يقولك الخطة صعبة أو نذاكر ونتعب وما نجيب شي ترا والله هذا كله كلام فاضي
أنا استنتجت إنو البنات ما يذاكروا تمام ولمن يجي الإختبار وما يعرفوا يحلوا يحطوها في الأسئلة

أنا ما أقولك إنو الأسئلة مررره تافهة ومافي شي صعب . بس مو لدرجة إنها ما تنحل أو توصل لدرجة الرسوب وإذا كنت مذاكرة تماااااام رح تعرفي تحليها بإذن الله ..

..
وبالنسبة لطريقة دراستك للمواد رح أبدأ أول شي بالكيمياء :
طبعا الكيمياء زي ما هو معروف مادة يحتجلها تركيز ودراسة أوووول بأول لأنو صدقيني لو ما درستي أول بأول ما رح تقدري تمشي زي الناس .. وأي شي مو فاهمته لاااابد تسألي عنو الدكتورة حتى لو في الساعات المكتبية لا تسكتي وتقولي بعدين أفهمه ترا في أشياء ما تنفهم إلا إذا شرحتها لك الدكتورة .... هذا شي

والشي الثاني اهتمي بحلول المسآئل آخر الشبتر تراها مهمممة ويجي قريب منها كثير في الإختبا ر وحتى نماذج الأسئلة السابقة وخاصة تست بانك إكرام يجي منه مرات نصا كمان ..ونصيييحة لا تسمعي كلام إلي يقولولك ما يجي منها شي في الإختبار
ترا كتير بنات يعتمدوا فقط على مذاكرتهم للكتاب من دون حل أسئلة ولا شي ولمن تجيهم أسئلة غير مباشرة في الإختبار ما يعرفوا يحلوها ... فانتبهي

هذا بالنسبة للكيمياء أما بالنسبة للإحصاء :

فالإحصاء مادة حلللوة وسلسة جدا وتجيبي فيها درجات بالراحة بس اهتمي بتمارين آخر الشبتر لأنو أسئلة الإختبارات ما تخرج عنها أبد ومرات تجي نصا منها وكمان أسئلة النماذج السابقة وحضور السكشن مهم جدا وخاصة لو قدرتي تحضري مع دكتورة سماح سندي لأنها ممتازة جدددا

الشباتر الثلاثة الأولى مباشرة جدا وحتى تمارينها متشابهة وفكرة الحل وحدة تقريبا .. أما الشباتر الثلاثة الأخيرة هي إلي يحتاجلها تركيز ودراسة مزبوووطة وحل كل شي في التمارين لأنو فيها أفكار كثيرة ..

أما الأحياء لحد دفعتنا من التست بانك فقط زاكريه أول بأول لأنو كثييييييييييير ولو تراكم عليك صعب ينحفظ
قسميه كل يوم صفحتين أو ثلاثة وبكذا ما رح يجي عليك الإختبار إلا وإنت حافظته بس رح تراجعي مراجعة

هذا باختصار عن خطة ب .. وإن شاء الله أكون أفدتك
وبالتوفيق للجميع :)