السنة الثانية في الصيدلة !

[holmes]

بسم الله الرحمن الرحيم

السلآم عليكم و رحمة الله و بركاته..

أخواني أعضاء المنتدى ، بصراحة ما يخفى عليكم إني راح ألتحق بإذن الله بكلية الصيدلة في بداية العام الجديد ( بعد العيد )

و نقدر نقول صار عندي معلومات جيّدة عن الكلية .. و في الحقيقة حاب أشد حيلي و عقدت العزم على إني أجيب المعدل اللي يبيض الوجه

و يرفع الراس ، فـأبغى أعرف كم نقطة ناقصتني ( أشياء بسيطة يعني ) مثل : مادة البايوكيميستري ، و الفسيولوجي !

أبغى أعرف إذا كانت المادتين هذي دسمة و كبيرة مثل مادة الأحياء في السنة التحضيرية ( و إنتو أكيد عارفين كيف كانت شباتر الاحياء ) !

أو أقل منها أو أكثر !

الشئ الثاني .. إذا أحد منكم يعرف كيف طريقة التوظيف في ( مصانع الأدوية ) مستقبلا إن شاء الله ( إذا ربي أحياني ) و إيش يطلبوا !

الشئ الثالث .. إذا أحد حاب يكشف لنا عن العثرات اللي ممكن نوقع فيها ، أو اللي يوقعوا فيها الطلاب في الغالب عشان أتجنبها أنا و زملائي
( يعني يا ريت لو أحد يكتب تجربة له ، و إذا فيه حرج بالنسبة لهذا الموضوع .. عادي مو شرط تكتبوا تجربتكم )

الشئ الرابع .. أغلب قراءاتي لمشاركاتكم ، كنتم بتوصّوا فيها على إني أهتم بالشرح مع الدكتور و أكتب المحاضرات
( أستأذنكم بس لو توضحوا الطريقة الوافية للطالب في كتابة المحاضرة مع الدكتور .. أقصد عن الكيفية !! )

الشئ الأخير .. بما إني لسّى سنة ثانية صيدلة ، هل في كتب تعتبر مفيدة لي جدا أو انكم تشوفون إنو بدري هذا الكلام !

و الموضوع هذا للكل ، بس حاب أوجّه الأسئلة اللي فوق خصوصا لـ ( THE HILL ، د.كيف ، زمرد ، غريب عزيز ، تركي 4444 ، Pharm.d .s )
لأنهم يعتبروا المراجع بصراحة بالنسبة للطلاب الجدد ، و أصحاب خبرة ( الله يوفقهم و ينفع بهم )

أعتذر عن الإطالة ، و دمتم بود...

[غريب عزيز]

أهلا بك أخي وألف مبروك على قبولك في كلية الصيدلة ان شاء الله بتجيب درجات حلوة جدا لو بقيت على نفس المستوى من الحماس

مواد الصيدلة ابدا ما تقارنها بالاحياء لأنها طويلة لكن مع المذاكرة بتلاقيها سهلة

في التوظيف بيطلبو منك سيرة ذاتية وعلى حسب ما عرفنا انهم ما بيهتمو كتير بالمعدل

العثرات اللي ممكن تواجهكم هي الغياب ... حافظو على حضوركم عشان يجيكم كل شي حلو من الدكاترة وذاكرو باستمرار هدي اهم حاجة

في الشرح تقدرو تتفقو ان واحد منكم يسجل المحاضرات وكمان اكتبو الامثلة المهمة مع الدكاترة لأن ممكن تيجي بالاختبار احترمو الدكاترة عشان يهتمو فيكم

اذا عندك اي استفسار كمان تفضل

تحياتي ،

[holmes]

يعني مواد الصيدلة أطول من مادة الأحياء ؟

[غريب عزيز]

اكيييد المواد اللي بتدرسها بالصيدلة مش زي الأحياء ابدا لكن سهلة ان شاء الله مع المذاكرة باستمرار

[holmes]

و الله مدري وش أقول "

لكن الله يعطيك ألف العافية

و حبيت أسألك ( إذا عندك خلفية عن التوظيف في مصانع الأدوية أو لا ) !

[غريب عزيز]

الوظائف لسة بدري تفكر فيها انت بس تدخل كلية الصيدلة بتشوف مجالات كتيرة للشغل ومع السنوات بتعرف فين ممكن تشتغل وايش هو المكان الأنسب لك

في يوم المهنة الصيدلي ان شاء الله بتعرف بالتفصيل عن الوظائف وبتقابل ناس بيشتغلو في كل المجالات

تحياتي ،

[holmes]

تسلملي ما قصرت

[THE HILL]

مرحبا

بداية الف مبروك على. قبولك في الكليه ؛)


بالنسبة للمواد زي الفسيولجي والبايو

مواد تعتمد ع الفهم بعض الناس يشوفو البايو حفظ

احياء التحضيري اعتبرته دسم ( لانكم ما بتفهموه قد ما تحفظوا عشان الاختبار ) +ان الاحياء جتكم كماده دسمه عشان المصطلحات العجيبه اللي اول. مره تشوفوها


في البايو في نوع من الدسامه لو الماده اتراكمت ( وانتببه تتراكم ) + والشي اللي تقريبا يمنعها من انها تتراكم عليكم اختباراتها الدوريه

يعني كل ما نخلص موضوع نختبر ع طول

شوف عشان تسهل عليك مواضيع البايو والفيسيو ( انك تشوف اليوتيوب )

حعطيك توبيكات تدرسها في البايو بس اطلع عليها في اليوتيوب عشان تاخذ فكره!

ايش يعني بروتين ؟ أنواعه ؟ وايش الوحده الاساسيه في تركيبه ؟ وظائفه ؟ فين موجود في الجسم ؟ الهيموجلوبين والمايوقلوبين ؟

عندك كمان الكولاجين

بس ابحث عنها بالانجلش


الفيسيولجي ( علم وظائف الأعضااء) يعني جسم الانسان عباره عن أجهزه زي ما اخذت ف الاحياء
طيب الاجهزه هذه لازم ندرسها عشان نعرف الجسم فسيولوجيا ايش يصير فيه وعشان اذا تغير ومرض هذا الجزء نعرف كيف نعالجو والعلاج في ماده ثانيه تدرسها السنوات الجايه


الفسيولجي ماده مهمه للفهم أنا الى الان اقرأ فيها. وفي اشياء مافهمتها الا بعدها

تقدر تشوف في النت وتقرأ عن الجهاز التنفسي والجهاز الهضمي ،،،، الخ


بس اول شي حاول تعرف اسماء الاعضاء الاساسيه في كل جهاز بالانجلش

يعني الكبد ( liver ) والكليه والمعده والمريء ووو الخ

[THE HILL]

العثرات اللي نواجهها

ممكن في البدايه الواحد مايعرف كيف طريقه الدكتور ف الاسئله .. يعني نركز ع اشياء الدكتور اصلا مايفكر فيها

الملل والطفش ، مايشغلو نفسهم بالانشطه

وممكن الغياب الكثير بس هذا ملحوظ في دفعه الاولاد



* بالنسبه لكتابه النوت في المحاضرات
ما اضحك عليك واقولك الكل ينتبه ويكتب تجينا حالات شلل ف نص الترم فنكتفي بالتسجيل

مع ان مضاره اكثر من فوايده بس ايش نسوي 😂وهو شي غير مشروع من غير اذن الدكتور




مدري اذا نسيت حاجه من طول الرد بس لو ما وضحت نقطه اسأل عنها واشرحلك هيا :)


...

[holmes]

من كلامكم يعني بصراحة ريحتوني ... يعني إن شاء الله الحمد لله إذا الواحدذاكر أول بأول يقدر يتحكم بالمادة

المشاركة الأصلية كتبت بواسطة the hill العثرات اللي نواجهها ممكن في البدايه الواحد مايعرف كيف طريقه الدكتور ف الاسئله .. يعني نركز ع اشياء الدكتور اصلا مايفكر فيها طيب ممتاز ... أقدر أسأل الدكتور كيف طريقة الأسئلة و إيش الأشياء اللي نركز عليها ولا ممنوع أو لو سألت عنها فـــ( راح ياخذ فكرة سيئة عني !! ) الملل والطفش ، مايشغلو نفسهم بالانشطه ما فهمت هذي النقطة حقت الملل و الطفش =) ! وممكن الغياب الكثير بس هذا ملحوظ في دفعه الاولاد * بالنسبه لكتابه النوت في المحاضرات ما اضحك عليك واقولك الكل ينتبه ويكتب تجينا حالات شلل ف نص الترم فنكتفي بالتسجيل مع ان مضاره اكثر من فوايده بس ايش نسوي 😂وهو شي غير مشروع من غير اذن الدكتور مدري اذا نسيت حاجه من طول الرد بس لو ما وضحت نقطه اسأل عنها واشرحلك هيا :) ...

غير كذا .. الله يسهل عليكم كل أمر عسير يارب و ما قصرتوا =)