حلمي وأملي ان اكون طبيبه ارجوكم الرد

[د.مشاعل]

بسم الله الرحمن الرحيم
كيفكم
انا مشاعل
في الصف الثالث ثانوي علمي
انا حلمي اني اكون طبيبة
بس انا خايفه وابغاكم تساعدوني
انا ما سجلت في المنتدى الا عشان اسألكم وان شاء الله تجاوبوني
اعتبروني اختكم الصغيره وما افهمم شي في التسجيل والاشياء هادي
فلو سمحتو تفيدوني الله يوفقكم
انا عندي كم سؤال محيرني واتمنى انكم تجاوبوني الله يوفقكم ويسعدكم
سـ1 / اش هي اختبارات القبول وكيف صعوبتها ؟
سـ2/ ماهي النسبة الموزونه المطلوبه وانقبل في السنه التحضيريه؟
ست3/ متى احدد المجال اللي حابه ادخولو؟
سـ4 / كيف السنه التحضيريه سهله ام صعبه علما بأن لغتي يعني تمشي الحال ؟
سـ5 / ماهو المعدل المطلوب للبنات لدخول الطب؟
سـ6/ ممكن تفيدوني اي شي من كل واحد يقرا موضوعي عن السنه التحضيريه والطب ؟

وجزااااااااااكم الله عني كل الخير ووفقكم ارجوكم لا تطنشوني وجاوبني الله يسهل عليكم
واكون ويم من الايام زيكم وينكتب اسمي د. مشاعل
وانا خليت اسمي كدا تفائلاً

[Mora]

سـ1 / اش هي اختبارات القبول وكيف صعوبتها ؟
ما في غير اختباراتك اللي اختبرتيها و اللي هيا اختبار القدرات و التحصيلي

سـ2/ ماهي النسبة الموزونه المطلوبه وانقبل في السنه التحضيريه؟
السنة اللي فاتت وقف القبول عند 77.3 لكن الله اعلم هل حينطبق على سنتكم و لا لأ بس اذا نسبتك فوق الـ 85 تقدري تدخلي المسار العلمي انتظام مع انه في بنات نسبهم اقل من 80 بشوية و انقبلوا علمي بس مو انتظام و انما تأهيلي

و على فكرة ما في فرق بينهم غير انك في التأهيلي محا تاخدي مكافأة و الدوام وقته غير عن الانتظام

ست3/ متى احدد المجال اللي حابه ادخولو؟
منتصف السمستر التاني طلبوا مننا اننا نحدد الرغبات عن طريق الاوديوس

سـ4 / كيف السنه التحضيريه سهله ام صعبه علما بأن لغتي يعني تمشي الحال ؟
حبيبتي لا تسألي دا السؤال لأن رأي الطلاب في السنة التحضيرية محا يخدمك سلبي كان أو ايجابي ,, اذا انتي شاطرة و تحضري محاضراتك اول باول صدقيني حتعديها و تجيبي معدل عالي ,, و بما انه الطب في بالك ,, شدي حيلك في الفيزيا و الكيميا و الاحياء و الانجليش لأنه هادي هيا المواد اللي حيعتمدوا عليها لدخولك الطب

و لا تخافي من الانجليش ,, اغلبنا كانت لغته معدووومة بس الحمدلله الوضع تعدل

سـ5 / ماهو المعدل المطلوب للبنات لدخول الطب؟
هما ما يطلوا في المعدل العام بس يشوفوا درجاتك في دي المواد: الفيزيا - الكيميا - الاحياء - الانجليش. و ياخدوا متوسط الدرجات فيها
و في سنتا اعتمدوا المتوسط 85 ,,, يمكن دا الشي يتغير لأنو جامعتنا تتغير كل خمس دقايق
سـ6/ ممكن تفيدوني اي شي من كل واحد يقرا موضوعي عن السنه التحضيريه والطب ؟
نصيحة مني ليكي لا تسمعي الكلام المحبط عن السنة التحضيرية لأنها حتأثر على تفكيرك و حتجيبلك احباط حتى لو كانت اسهل من اللي توقعتيه ,, لو انك حاطة الطب في بالك صدقيني هادا حيعطيكي دافع انك ما تفوتي و لا تهملي

شدي حيلك واعملي اللي عليكي و توكلي عالله و بإذن الله حتنقبلي في الطب

بالتوفيق دكتور مشاعل

[د.مشاعل]

جزاااااااك الله كل خير بس انا لسى ثانوي آخر سنه بس صراحه انا من النوع اللي اخاف عشان كدا
واشكرك اشكرك والله يوفقك
وبس 17 مشاهده ورد وااااحد؟ تشكري على ردك

[Mora]

المشاركة الأصلية كتبت بواسطة د.مشاعل جزاااااااك الله كل خير بس انا لسى ثانوي آخر سنه بس صراحه انا من النوع اللي اخاف عشان كدا واشكرك اشكرك والله يوفقك وبس 17 مشاهده ورد وااااحد؟ تشكري على ردك

وي معليش انا حسبتك خلصتي سنة تالت و حتدخلي الجامعه

اتاريكي لسه صغننة

يا بنتي مرررررره بدري على انك تشيلي هم التحضيري من دحين ,, احنا لمن كنا قدك ما كنا سمعنا بكلمة "تحضيري"

شدي حيلك في تالت و جيبي اعلى نسبة عشان تجيبي موزون عالي

[soma al7elwa]

مورا كفت ووفت

والله يوفقك يارب

[Nimo]

مسآء الخير
والله الحمد لله
إنت ِ كيفك ؟؟
إن شالله بخير

أول شي موفقة أختي بإذن الله بمشوارك
وربي إن شالله يحقق لك حلمك
ونشوفك بيوم دكتورة قد الدنيــا
ولازم تعرفي شي قبل ما أجاوبك
الطب يا مشاعل يحتاج له شدة حيل
شدي حيلك على الآخر
وكل ما حسيت بإحباط أو خفت عزيمتك
أتذكري إنك إن شاء الله بيوم من الأيام راح تصيري

د . مشـــاعـــل

و دا إن شالله راح يعطيك ِ Push إنك تشدي حيلك أكتر
وترجع عزيمتك أقوى من قبل

بالنسبة لاستفساراتك

أول شي
بالنسبة لاختبارات القبول
اختبار القبول هو مثل اختبارات تحديد المستوى
دا الاختبار تختبريه بعد ما تخلصي من تالت ثانوي بأسبوع تقريبــا ً
حيكون الاختبار مقسم لقسمين
اختبار قدرات
واختبار تحصيلي
الأول عيارة عن مهارات في الرياضيات و اللغويات
والتاني حيكون من مناهج المواد العلمية اللي بتدرسيها في الثانوي
موضوع كيف صعوبتها
برأي و صرآحة
الاختبار مو صعب
ولا سهل موية
يعني وسط
تختلف من طالب لآخر حسب القدرات
يعني مافي مقياس للصعوبة
بس اللي سمعتوا إنه العام دا جآاا اختبار التحصيلي سهل
و الله أعلم
إنت ِ بس لا تشيلي همه و ربي ييسره لك إن شاء الله

النسبة الموزونة
النسبة الموزونة يا مشاعل هي النسبة الثانوية التراكمي مع نسبة اختبار القبول
يعني نسبة تانية + تالتة + القدرات + التحصيلي
50 % نسبة الثانوية
+
30 % قدرات
+
20 % تحصيلي

أما موضوع كم النسبة اللي تضمني بيها القبول
فدا يعتمد على دفعتك اللي حينقبلوا معاك
إذا كانت الدفعة مستواها عالي أكيد يوقف القبول عند نسب عالية
و إذا وسط يوقف عند نسبة وسط
و هــكــذا ..
و إنت ِ حاولي الموزون حقك ما يقل عن 85 %
عشان إن شاء الله تضمني القبول
بس برضو .. ما أضمن لك إن النسبة تكون مقياس
ممكن الدفعة تكون مرة مستواها عالي فما تضمني
إنت ِ بس شدي حيلك وربي ييسرها لك إن شاء الله
لا تشيلي هم القبول من الآن

موضوع تحديد المجال اللي تحبيه
فإن شاء الله السمستر التاني راح يفتحوا لك
بصفحتك على الأودس
خيارات التسكين
و إنت ِ ترتبي رغبات التسكين حسب الأفضلية بالنسبة لك
يعني اللي تبيه في الأول وهكذا إلى أخر رغبة ..
و الجامعة إن شاء الله حيعملوا لكم اجتماع يفهموك فيه كل شي
عن التسكين لا تشيلي هم ميسرة بإذن الله

بالنسبة لموضوع صعوبة السنة التحضيرية من سهولتها
شوفي مشاعل .. لازم تاخدي قاعدة في الحياة
ما تسمعي حكم على شي أو تحكمي على شي من تجربة أحد
لابد من إنك تجربي الشي بنفسك عشان تحكمي
فلو سلمت إذنك للناس اللي تقول السنة التحضيرية صعبة
و السنة دي تحطيمية والكلام دا
حتشوفيها صعبة

عن تجربة السنة التحضيرية بالنسبة ليا عادية
ويمكن تميل لأن تكون سهلة
أسهل من الثانوية في بعض المواد
ما أنكر إنه في مواد يبالها شدة حيل
بس الأغلب سهلة
لأن أغلب المواد بس تآخدي أساسيات فيها
يعني بدون تعمق في دقائق المادة
وطبعا ً رأيي يفضل رأي
جربي و حتشوفي بنفسك
وقولي إن شاء الله خير

أما عن موضوع اللغة
فشوفي
أغلب طلاب التحضيري كانوا شايلين هم كيف ندرس
بانجليش وكدا و احنا متعودين على الدراسة بالعربي
بس ترآ هي شهر .. شهرين بالكتير
وحتنسي هم اللغة و تخوفك من الدراسة بلغة مغايرة
وحيصير همك المادة ومحتواها مو لغــتــها
وإذا على لغتك إنها تمشي الحال
فزي ما قلتي راح تمشي حالك في البداية
وشوية شوية مع التعمق في الدراسة بالانجليش
حتصير عندك حصيلة كلمات وراح تشوفي الموضوع سهل
وما تدري .. يمكن تصير عندك الدراسة بالانجليش أسهل من العربي
و ترآ بجد حقيقي الدراسة بالانجليش أسهل من العربي
وراح تجربي و تشوفي بنفسك

أما عن موضوع تدخلي دورات لغة و الكلام دا
فأنا صراحة ً ما أشوف إنه الموضوع حيفيد مرة
يمكن يزيد عنك ثقتك بإنك تعرفي انجليش كويس
يمكن يفيدك تتكلمي انجليش أفضل
بس يفيدك في دراستك لمواد علمية ما أعتقد
لأنه أغلب المواد العلمية تعتمد على المصطلحات العلمية
الخاصة بكل منها .. فعشان كدا الدورة ما راح تفيدك
إلا إذا كانت الدورة في المصطلحات العلمية
بس لا تشيلي هم
مع الدراسة و التكرار راح تلاقي نفسك من الأفضل للأفضل
و راح تتحسن عندك اللغة كتير

أما عن المعدل المطلوب
فبرضو دا يعتمد على دفعتك
بس عشان أريحك شوية
دا العام أعتمدت الجامعة
على النسب الموزونة ( نسبة السنة التحضيرية )
وعلى النسب الخاصة ( الكيمياء + الفيزياء + الأحياء + الانجليزي )
و وقف القبول لدا العام في كلية الطب 89 % بوينت شي للطب العادي
و للطب الموازي 87 % بوينت شي مع تحقق الشروط طبعا ً
بس عذرا ً .. مو فاكرة كم البوينت
أعذريني أختي

أخــيرا ً الإفادة
شوفي مشاعل
سنة تالت ثانوي عادية
والسنة التحضيرية عادية
يعني لا تشيلي هم إنك ما تجيبي نسب كويسة فيها
إن شاء الله ناجحة بأعلى النسب يــارب
و أهم شي أنصحك بيه
لاتصدقي كل شي تسمعيه من بنات الجامعة و التحضيري
حتسمعي شـــائـــعـــات مرة كتير
لا تصدقي إلا المصادر الموثوقة
الجامعة نفسها .. الدكاترة والمحاضرين
وأي شي تسمعيه يخوفك أو يقلقك
عشان تريحي راسك قولي الله يسهلها وخلاص

أما بالنسبة للإفادة في موضوع الطب
فأنا لسع ما بدأت دراسة عشان أقدر أفيدك
إن شاء الله أخواتنا اللي بالطب يفيدوك
كل اللي أقدر أقولك هوا
إنه الطب حلم و أتحقق الحمد لله
وعقبال ما تحققي حلمك إنت ِ كمــان أختي
و تصيري || د . مشــاعــل ||

أتمنى أكون أفدتك في استفساراتك
وعذرا ً على الإطــالة
و أي شي تاني عندك حابة تسألي عنه
لا تتردي أسألي و إن شاء الله تلاقي مين يجاوبك
زي ما قلت ِإنت ِ أختنا الصغيرة
و نــحــنــا في الخــدمـــــة







|| إلى اللـــقـــــآء ||

[د.مشاعل]

جزاك الله كل خير ياnimo والله يوفقك من جد وفيتي وكفيتي الله يحقق لك كل ما تتمنيه
وانا الحمدلله نبتس في تانيه جدا رائعه والله الحمد وان شاء الله ازيدها في تالته
الله يوفقك واشوفك اكبر دكتوره

[Nimo]

المشاركة الأصلية كتبت بواسطة د.مشاعل جزاك الله كل خير ياnimo والله يوفقك من جد وفيتي وكفيتي الله يحقق لك كل ما تتمنيه وانا الحمدلله نبتس في تانيه جدا رائعه والله الحمد وان شاء الله ازيدها في تالته الله يوفقك واشوفك اكبر دكتوره

الله يسلمك يا عــســل
أنا ما عملت إلا الواجــب
ربي يسمع منك إن شاء الله
ويحققلك أحلامك و أمانيك إنت ِ كمــان
وتجيبي أحلى نسبة في تالتة
و إن شاء الله أنا و إنت ِ
نكون من أكبر الدكاترة
بالتوفيق أختي

[د.مشاعل]

آآآآآآآآآآآآآآآآآآآآآآآآآآآآآمين والله ما تتوقعي قد اش نفسي اكون دكتوره ولكن كل شي مكتوب ويارب اكون دكتوره

[FOFO<3]

مشااعل شعووله خليكي قويه يابنت حضربك ترا

السنه التحضيريه مرررررررررره حلوه وانا احسها تمهيد للطب

اهم شي انك تزاكري كوويس وماتفوتي المحاضرات عشان تجيبي معدل حلوو وتدخلي طب

انا اعرف بنات كتييييييييييييير انقبلو والحمدلله

وبعدين مافي شي سهل فالحياه كلوو يبغا تعب