طالبات المستوى الثالث والرابع سابقاً شاركونا خبراتكم

[ام حمدان]

اتمنى انكم تشاركونا خبراتكم وتقولولنا من افضل الاستاذات او الدكاتره من حيث الشرح والمراعاة في الدرجات الي سبق وسجلتوا عندهم هالمواد
القراءه 1و2
الكتابه 1و2
الاستماع والتحدث 1و2
اللغة الفرنسيه 1و2
ارجو من الي عندها خلفيه عن طلبي ماتبخل علينا بها اجاباتكم اكيد بتفيدني وتفيد كثيرين مثلي

[لقيت روحي]

الكتــابــة 1انصحــك مع مايا اليافعــي ..

تراااااااااااعي الدرجات جدااااا ..

والفرنسي 1..

طبعــــا بلا منازع صالحــة القحطــاني ..

اما الاستماع1 اخذته مع استاذة ايمــان بوتــوعة ..

مو مرة تفهــم ..

اما الريدينق1 .. الاستاذة سهام فطانــي ..

وبالتوفيق .

[ام حمدان]

لقيت روحي مشكوره حبيبتي وجزاك الله خير

[ام حمدان]

اتمنى من الاخوات يفيدونا كمان نبغى نشوف اكثر الاراء ترجح كفة مين من الاستاذات

[[:مريــم:]]

والله حتى انا نفسي أعرف من جد ماني عارفه راسي من رجولي

من جد اتذكرت أول ما دخلت الجامعة حتى المباني ماكنت أعرفها

ودحين شغلة الحذف والاضافه و تغيير مواد واستاذات ووو..وو

من جد حاسه أني حاسيه الشغله صارت سلطه عندي والله

[nour al3mr]

السلام عليكم ورحمة الله وبركاته ....

أسال الله العلي العظيم أن يوفق الجميع وأن يرشدنا الى الخير والصواب وأن لا نظلم او نقصر في حق احد من خلقه..

أنا يا عسل بأعطيك رايي عن الاستاذات اللي درسوني الترم اللي فات لكن حطي في بالك ان مناهج الانتساب تختلف عن مناهج الانتساب .. فبجانب ان الاستاذات يلعبوا دور كبير في التدريس ..المنهج كمان له دور ....

بالنسبه لــ ماده Reading 1
أخذته مع الاستاذه إيمان بو ترعه الاستاذه مافيها اي مشكله تحاول تعطي قد ماتقدر وتدور لنا على تمارين وتدريبات من النت لان منهجنا نفسه كان جدا فظيع لدرجه ان أغلب الدفعه محمله المادة بس طبعا ولله الحمد في اللي عدى فيها احنا اتقرر علينا كتاب << More Reading Power

بالنسبه لمادة writing
أخذته مع الاستاذه سحر نصيف ما شاء الله الاستاذه جدا مرحه والكلاس حيوي معاها
وتحاول تعطيك قد ما تقدر اساليها اي سؤال وتجاوبك وتطلب منك تكتبي لها essay وتعطيه لها تصححه لك اذا انتي تحبي واذا ما تبغي تعملي التكاليف انتي حره بس اعرفي انه شيء راجع لصالحك
احنا اتقرر علينا كتاب college writing اعتقد ان اسم الكتاب كذه ..

بالنسبه لــ listining and speaking
أخذته مع الاستاذه سهام فطاني
تعليمها تمام مافيه شيء مرحه و تخلي الكلاس منتعش اللي كان يضايقني ان المنهج مره مو حلو اللي هيا مقرراه علينا MOSIC ,هي تبغانا نسمع اخبار بالانقلش لكن ما اعرف اشوف ان صاحباتي اللي اخذوا عند استاذات غير استفادوا اكثر وتوزيع الدرجات كان مو حلو اخر الترم تطلب مننا عرض عن الاحتباس الحراري GLOBAL WARMINGاعتقد ان عليه 30 درجه والباقي على اختبارين الفاينل و دوري واحد ....

الفرنسي مع الاستاذه صالحه القحطاني ...
استاذه قمة وروعه ماشاء الله بالنسبه ليا حبيت الماده مررره معاها وياليت لو اقدر اخذ معاها فرنسي 2 معطاءه ماشاء الله وتحاول تفهمك قد ما تقدر...

اخيرا اتمنى اني اكون افدتك واي استفسار انا حاضرة باذن الله......

[ام حمدان]

نور العمر مشكوره ياعسل وربي يجزاك كل خير
بس سؤال لو ممكن
اي مادة حسيتي ان اغلب البنات يقولون عنها صعبه وتحتاج مجهود كبير وايش هي اكثر ماده البنات يحملونها
لأني بصراحه ماابغى معدلي ينزل تكه وحده عاد تخيلي اذا لا قدر الله حملت ماده اكيد بنجلط لا محاله
الله يبعد عننا الرسوب ويوفقنا جميع يارب

[nour al3mr]

المشاركة الأصلية كتبت بواسطة ام حمدان نور العمر مشكوره ياعسل وربي يجزاك كل خير بس سؤال لو ممكن اي مادة حسيتي ان اغلب البنات يقولون عنها صعبه وتحتاج مجهود كبير وايش هي اكثر ماده البنات يحملونها لأني بصراحه ماابغى معدلي ينزل تكه وحده عاد تخيلي اذا لا قدر الله حملت ماده اكيد بنجلط لا محاله الله يبعد عننا الرسوب ويوفقنا جميع يارب

حياك ربي ...وان شاء الله يكون التوفيق حليفك ...
أنا اول ما دخلت القسم كنت زيك احب اسأل البنات في الجامعه اللي قسمهم لغة اوربية بس الصراحه كل اللي كنت اسمعه احباط وتحطم لدرجه ان القسم اتجسد بصورة الشبح كانت ردود افعال البنات عجيبه اللي تقول صعب واللي تقول الله يرحمك لانك دخلتي ومن هذي التهاويل..انا طنشت الكلام واهم شيء اخذت في الاعتبار اراءهم عن الاستاذات وطبعا ما صدقت كل الكلام لانه كل وحده رايها يختلف عن الثانيه وحده تمدح والثانيه تذم في نفس الاستاذه ...
فاتوكلي على الله واعرفي ان كل شيء راح يتحقق بالعزيمة والاصرار ..
بس حطي في بالك شغلتين الاولى أن المعدل نزل <<وهذا الشيء حصل ليا ولصديقاتي....
الشيء الثاني : أن هذا القسم يعتمد على مجهود شخصي بشكل كبير ..حاولي تطوري من نفسك ومن لغتك قد ما تقدري لانه بالنسبه لنا كانت الاسئله بالذات في Reading1 من برى الكتاب تماما ماعدا جزئية الــ vocabulary كانوا يعطونا قائمة ويجيبوها فراغات في الاختبار..
اما الـــ writing يعتمد تماما عليك هل عندك قدره على الكتابه بشكل جيد ..وطبعا كل ما يكون عندك كلمات كل ما كانت الكتابه لك اسهل ...
وطبعا اكثر مادتين نسبه الرسوب فيها مرتفعه هي Reading >>>writing بس طبعا زي ما ذكرت سابقا في اللي نجح وعدى فيها بسهوله ....
واتمنى لو في من قسم الانتساب اللي يفيدك باعتبار ان بعض المقررات مختلفه ...

[ام حمدان]

المشاركة الأصلية كتبت بواسطة nour al3mr حياك ربي ...وان شاء الله يكون التوفيق حليفك ... أنا اول ما دخلت القسم كنت زيك احب اسأل البنات في الجامعه اللي قسمهم لغة اوربية بس الصراحه كل اللي كنت اسمعه احباط وتحطم لدرجه ان القسم اتجسد بصورة الشبح كانت ردود افعال البنات عجيبه اللي تقول صعب واللي تقول الله يرحمك لانك دخلتي ومن هذي التهاويل..انا طنشت الكلام واهم شيء اخذت في الاعتبار اراءهم عن الاستاذات وطبعا ما صدقت كل الكلام لانه كل وحده رايها يختلف عن الثانيه وحده تمدح والثانيه تذم في نفس الاستاذه ... فاتوكلي على الله واعرفي ان كل شيء راح يتحقق بالعزيمة والاصرار .. بس حطي في بالك شغلتين الاولى أن المعدل نزل <<وهذا الشيء حصل ليا ولصديقاتي.... الشيء الثاني : أن هذا القسم يعتمد على مجهود شخصي بشكل كبير ..حاولي تطوري من نفسك ومن لغتك قد ما تقدري لانه بالنسبه لنا كانت الاسئله بالذات في reading1 من برى الكتاب تماما ماعدا جزئية الــ vocabulary كانوا يعطونا قائمة ويجيبوها فراغات في الاختبار.. اما الـــ writing يعتمد تماما عليك هل عندك قدره على الكتابه بشكل جيد ..وطبعا كل ما يكون عندك كلمات كل ما كانت الكتابه لك اسهل ... وطبعا اكثر مادتين نسبه الرسوب فيها مرتفعه هي reading >>>writing بس طبعا زي ما ذكرت سابقا في اللي نجح وعدى فيها بسهوله .... واتمنى لو في من قسم الانتساب اللي يفيدك باعتبار ان بعض المقررات مختلفه ...

مشكوره حبيبتي ماقصرتي وربي يجعله في موازين حسناتك
ماانكر كلامكم كلكم خوفني بس بنفس الوقت خلاني اصر على اني اتحدى نفسي بالمقام الاول
بس حكاية ان معدلي ممكن ينزل بتطير عقلي حرام تعب السنه التحضيريه تنزله مواد التخصص والله شي يقهر بس إن شاء الله ماينزل وراسي يشم الهوا احنا علينا نجتهد ونذاكر والباقي على رب العالمين
وياريت بنات الانتساب يفيدونا اكثر

[لقيت روحي]

المشاركة الأصلية كتبت بواسطة ام حمدان مشكوره حبيبتي ماقصرتي وربي يجعله في موازين حسناتك ماانكر كلامكم كلكم خوفني بس بنفس الوقت خلاني اصر على اني اتحدى نفسي بالمقام الاول بس حكاية ان معدلي ممكن ينزل بتطير عقلي حرام تعب السنه التحضيريه تنزله مواد التخصص والله شي يقهر بس إن شاء الله ماينزل وراسي يشم الهوا احنا علينا نجتهد ونذاكر والباقي على رب العالمين وياريت بنات الانتساب يفيدونا اكثر

عزيـــزتــي ..

لازم المعدل ينزل شــوية .. او يطلع شـــوية ..


انا حصلي تاني شي ..

طلع 4 درجات عن المعدل السابق ..

منتهــى القهــر ..

لكن انتي تقدري تغيري المعـــادلة ..

واقل شي تجيبي 80 ..

وإن شاء الله ماينزل ..