تجربتي في التحضيري سنة (2015) بنات-سليمانية

[زهرة خضراء]

بسم الله الرحمن الرحيم
السلام عليكم ورحمة الله وبركاته

راح اتكلم عن تجربة السنة التحضيرية بالنسبة ليا كتجربة شخصية
أول شي لازم انوه واقول انو الكلام دا 1-من بنت للبنات , 2-يمكن الأولاد يقدرو يستفيدو شوية لكن ابدا ما انصحكم تاخدو كلامي لأنو اسئلتكم وطريقتكم غير ,3-انا من السليمانية وفرع الشرفية الدكاترة بيقولو للبنات اشياء ما بتنقلنا في السليمانية وبعض البنات بيمشو عليها في الفرعين وبيكونو مبسوطين , انا عن نفسي ما اسوي أي شي من كلام دكاترة الشرفية .

ودحين نبدأ ,,
بداية انا عادلت مادة الانقلش , اختبرت اختبار الآيلتس ووديتلهم الشهادة , اللي يبا معلومات اكتر يسأل

خطة الترم الأول بالنسبة ليا كانت عبارة عن ( رياضيات – فيزياء – مهارات اتصال –حاسب آلي )
نبدأ وحدة وحدة

مهارات الاتصال
بالنسبة للكتاب فهو من انتاج الجامعة نفسها , الطبعة اللي درسنا منها طلعت في نفس السنة وكانت فيها أغلاط مطبعية تودي الطالب في دهية ازا كان ما بيحضر ومحد قلو عليها يعني تعريف شي ومصطلح شي . مثلا خطوات المقابلة مذكورة نقاطها تحت عنوان خطوات السيرة الذاتية . فإزا حتدرسو من طبعتنا روحو اسألو الاستاذة من بدري على الاغلاط عشان كل شي يكون مرتب عندكم من البداية .
كملخصات او اسئلة السنين اللي فاتت , فأنا جربت كزا ملزمة وكلها كانت بالزبط نفس كلام بعض وما منها فايدة ,الكتاب ما تخرج عنه الأسئلة .
المادة هيا الوحيدة في مواد التحضيري اللي فيها تكاليف , وتقسيم الدرجات 30 تكاليف , 30 دوري ثاني , 40 نهائي والدرجة تطلع لك من يوم ما تخلص الاختبار .
التكاليف عبارة عن : عرض حتعملوه وتتكلمو فيه ( تشرحوه ) عن موضوع حتحددو الاستاذة , وسيرة ذاتية وشي تاني يرفق مع السيرة الذاتية , وفيه شي ثالث سويناه بس للأسف نسيت ايش .
للمذاكرة : بس من الكتاب , ما يحتاج اكتر من يوم ونص لمذاكرة الدوري الثاني , والنهائي يومين , تختبرو في الدوري الأول جزئي وفي النهائي كامل اكتاب مع جزئية الدوري الثاني .
ملاحظات للمذاكرة : 1- لمن فيه شي النقاط المسرودة عليه نكون مرتبة احفظوه بالترتيب لأنو ممكن يجيك سؤال : في الموضوع الفلاني , الثقة بالنفس تعتبر : الخطوة الاولى او الثانية او الثالثة او قبل الاخيرة , فلازم مرة تنتبهو لدي النقطة عشان لا تنقصو درجات على الفاضي 2-الكتاب يتزاكر من المقددددددددددمة للأخير , لا تطنشو المقدمات .

بالنسبة للبونس : فيه درجتين بونس هما يزيدوكم هيا قبل لا تنزل درجاتكم في الاودس , واللي مثلا جايب 97 يعني ناقص 3 درجات , فحياخد 99 بالبونس , وأستاذة المادة تقدر تخليك تاخد 100 عشان توصلها لأنو بس بقيتلك درجة .

مادة الحاسب الآلي
الحمدلله استاذتنا كانت امينة وتشرح كل العملي , اللي ما يحضر في الحاسب حينقص وحيندم وحيبكي وحكل شي في الاختبار العملي , الدرجات عبارة عن 25 عملي دوري اول 10 نظري دوري أول , 25 عملي دوري ثاني , 10 نظري دوري ثاني , 15 عملي نهائي و15 نظري نهائي . الكتاب من انتاج الجامعة ومهم تزاكرو العرض حق الشرايح من النت تنزلوه من موقع الجامعة من وحدة الحاسب الآلي , ضروري تجمعو بين مذاكرة الكتاب والعرض لأنو مو كل شي مذكور في الكتاب .
المذاكرة : العملي لازم تحضر الكلاس او انسى وضعك انك تجيب كامل ,النظري في الدوري الأول حتيجي فيه اسئلة من اشياء مكتوبة في جزئية الدوري الثاني اللي هيا ( اختصارات لوحة المفاتيح ) , لا تنسو تزاكروها جاني عليها سؤالين وطبعا محد قلنا انو حيدخل من هنا, فهنا فأنا اهوه بأقلكم . وبالنسبة لعموما الدوري الاول والثاني والثالث النظري فممكن يجيبولكم صورة للشاشة حقت الكمبيوتر ويأشرولكم على زر ,ويقولو يلا ايش اسم الزر دا وهكذا .
من فين تذاكرو : اسئلة السنين اللي فاتت محا تفيدكم الا في شغلة اختصارات المفاتيح , غير كدا ( بلا فائدة ) . تزاكرو من الكتاب والسلايدات والعملي تحضرو الكلاس وتزاكروه من الكتاب والسلايدات برضو .

الفيزياء
بالنسبة للحضور في دي المادة محا يفيدك غير ازا انت انسان ما عندك اصلا تأسيس في الفيزياء وحيعلموك على الكتاب والبيسكس اللي فيه اما الاختبار شي ثاني
ايش تسوي في دي المادة ؟
تزاكر من الكتاب عشان تحفظ القوانين والمصطلحات وتحل امثلة وتسير شاطر في المادة العلمية +(((( اهم من الكتاب في أسئلة الحل في الاختبار تقريبا 66 بالمية اهم {اسئلة السنين اللي فاتت المجمعة في ملزمة الد/هناء فرحان} ))) + ملزمة السعدي من مكتبة 2000 في السليمانية للمنهج + تست بانك السعدي
زاكري اول بأول عشان لا يتراكم عليكي , ولا تدخلي اختبار من غير ما تزاكري اسئلة السنين اللي فاتت ولا ازا جبتي 13 من 30 يسير تحمدي ربك .
الدرجات : 33 سؤال منها 3 بونس وعلى الاختبار 30 درجة , وكدا الدوري الثاني والنهائي 44 سؤال بنفس الفكرة .
ازا جبتي 31 دوري اول و 29 دوري تاني , تترحل الدرجة من الدوري الاول للدوري الثاني وتسيري آخدة 30 30 يعني كامل وبرضو تترحل للنهائي .
ملاحظات : 1-الملزمة حقت السعدي حقت شرح المنهج هيا فيها قوانين مختصرة وطرق حل جميلة , بس فيها مسائل معقدة ( مو امثلة الاختبارات ) ( الامثلة اللي هوا حاططها ) دي ( كبنااات ) طنشوها ما تجي زيها , أسئلتنا في التحضيري اسهل من اسئلة الاولاد ولله الحمد . ((((((2-جمعو اكبر قدر ممكن من اسئلة السنين اللي فاتت سواء حقت بنات او اولاد!!!!!!!!!!!!!!!!! )))
3-تجي اسئلة ما تنحل غير بالقوانين المختصرة اللي ماهي موجودة في الكتاب ولا في هناء فرحان بس موجودة عند السعدي فالله يخليكم انتبهو .
4- لازم تزاكرو اول بأول عشان الكمية حتكون كبيرة ( ازا سويتو زي ما بأقول وجمعتو اسئلة كتير وزاكرتو ملازم السعدي )

الرياضيات
دي المادة ( في التحضيري) مهي زي الفيزيا , ازا زاكرتي من المكان اللي قلتلك عليه خلاص حتجيبي الدرجة , دي فيها شوية اسئلة حسب قدراتك , عن نفسي كانت استاذتي جدا جدا جدا سيئة جبت فيها مدرس قيد درس بنات تحضيري 5 سنين وسعره طيب , والحمدلله , دي المادة لازم قطعا من غير تفكير اهم شي تزاكري منهم ( الكتاب "تزاكري الدرس بأمثلتو بالتمارين والواجبات" + الشيتات حقت د.حمزة ابو جبل الوورك شوب يعني ) من غيرهم اتحداكي تحلي من ملخص استاذ او غيره , وكمان زيادة عليهم بس كدا (امشي ) على ملخصات جمال السعدي لكن لا تركزي كتير لأنو أسئلتها معقدة وقلتلكم كأسئلة تحضيري احنا الحمدلله مرحومين , أسئلتنا اسهل من الاولاد , الحلو فيها هوا انو في اختصارات واشياء بالحفظ بدل ما تقعدي تحليها في الاختبار , والتست بانك برضو من عند جمال السعدي
والدرجات زي الفيزيا
ملاحظات :1- في الدوري الأول في سؤال ممكن يجي ماهو موجود في كتاب ستورت اللي كان مقرر علينا لكن كان موجود في كتاب الجامعة وهوا عن دالة اكس تربيع ازا هيا طالعة او نازلة , جاني في الاختبار وما عرفت احل السؤال بما إني ما عمري شفت الدالة , فانتبهو لدي الحكاية
2- في النهائي جاتني تعاريف برضو انتبهو منها .

بالنسبة للترم التاني
كانت المواد ( احياء – احصاء – كيمياء )

الأحياء
دي المادة كحضور وتوسع جميلة مع د/حنان الشاذلي , تذاكريها من العرض وتحفظيه وتجيبي الدرجة كاملة بالبونس ( توزيع درجاتها زي الفيزيا والرياضيات ) , ما زاكرتلها تست بانك , بس اعتمدت على العرض .

الإحصاء
دي المادة كل الناس يخوفونا منها , لكن اضمنلك تجيبي كامل ازا درستي مع أ/سماح سندي , شرحها وافي وما تخليكي تحتاجي شي بعد الله , لحد يقلك المنسقة ولا غيرها ,سماح سماح , زاكري معاها وانتبهي لكل كلمة تقولها ولمن تقولكم ( مدري مين غلط في مدري ايه) وكل كلمة تقولها انتبهيلها وزاكري من الكتاب وحلي التمارين وارجعليها ازا احتجتي أي شي وان شاء الله فُل مارك , لحد يقلك زاكري سعدي ولا غيرو والله ما يحتاج , زاكري الشيتات والنماذج الموجودة في الموقع حق أ/سماح حق الجامعة وازا سويتي زي ما بقلك تجيبي 100 بإذن الله .
الدرجات : المادة دي ما فيها بونس , 30 , 30 , 40 لكن فيها كيرف أب (يعني درجات يدوها لكل الدفعة عشان ما يسقطو ناس كتير ) 5 درجات ( كل سنة ) فإن شاء الله الشي دا ما راح يتغير عليكم .

الكيمياء
دي المادة لا حول ولا قوة الا بالله ,ما حبيتها ما اعرف ليه , مع انو غيري ما كانت كدا معاه , عموما انا ما احس صح اني اعطي نصايح فيها لكن حقول تجربتي فيها , زاكرت من سلايدات ليلى الحربي , فيها اغلاط في الحل واغلاط في اللغة وكمان مهي سلسة في الفهم , واكيد لاااازم من التست بانك في دي المادة لأنو الاختبار 65-70 في المية منو . وما اعرف ايش اقول في دي المادة ورحت لمدرسة خصوصية وما ارتحت صراحة ليها واقلكم تاني انا ما اقدر انصح في دي المادة لأني مرة ما عرفت الطريقة والمكان اللي المفروض ازاكر منه .
الدرجات : المادة دي ما فيها بونس , 30 , 30 , 40 ولنا الله
أنصحكم : تسألو الناس اللي جابو 100 فيها ايش سوو , تجربو تزاكرو من عرض أ/نهى وزان او تشترو الكتاب وتزاكرو منو , دا اللي كنت حسويه , وتاني مرة اقلكم لاازم من التست بانك في دي المادة

والله يوفقكم جميعا ...
تاني مرة : ( اختبار الفيزياء والكيمياء ما يندخلو من غير تست بانك , الرياضيات مزاكرة اول بأول , الأحياء تركيز , الحاسب عملي حضور المحاضرات )

[Ja_al3mri]

اه ي التحضيري كان ثقيل علينا وتشوف الدقيقه ساعه بس فالتخصص ترتاح
بصراحه اشوف التحضيري ف بعض المواد ظلم بدون بونس

[د/ندو]

السلام عليكم ماقصرت اختي في كلامها جزاها الله خير وكل عام والجميع بخير انا بالنسبه ليا الحمد لله درجاتي كلها aبلس وهذا بفضل لله سبحانه وتعالى وانا ذاكرت اول باول رياضيات شرح الكتاب مع مدرستي الخصوصيه وانا كنت احل الورك شيت واسئلها بالاشياء الصعبه وفيزياء كتاب ونماذج وكيمياء سلايدات وتست بانك والاحصاء الكتاب والنماذج والانجلش كمان الكتاب والنماذج وكل موادي طبعا من دون مهارات الاتصال والحاسب والاحياء طبعا حفظ والانجلش اخدتها مع مدرسه كانت تلخص وتبسط وتعطي افكار يجي زيها بالامتحان ومنتظمه بوقتها والله يوفقكم و سنه حلوه مره وبالتوفيق

[R.x1]

لو سمحتي ممكن رقم مدرسة الانجليزي

[زهرة خضراء]

دانة الكويسة
شكرا انك اديتيهم فكرة عن بنت من الشرفية

د/ندو
وعليكم السلام ورحمة الله وبركاته , ان شاء الله اشوفك في TMM , الله يجزاكي بالخير انتي كمان

ja al 3mri
صح بس المشكلة اللي اكبر من البونس انو مثلا اختبار الكيمياء ساعة ونص بدل ساعتين , بس ساعة تلاتة كلها في النهاية عدت الحمدلله .

[Ackerwife]

مادة مهارات الاتصال مافيها بونس كان !
شكرا

[دانه الكويسه]

خلصت السنة بسرعة الحمدلله الله يكتب لنا التخصصات اللي فيها الخير لنآ

بالنسبة لي انا اول نصيحه اقولكم عادلوا الانجلبزي هي المادة الوحيده اللي نزلتني و انا اخذت بس المستوى الرابع الحمدلله

الرياضيات مادة تحتاج حل كثير و دكتورة للأسف مثلك ما كانت كويسه و هذي الماده مستحيل تتخارج من غير شرح كويس
اول شي لازم تتطبعوا الكورس سيلابوس من موقع الدكتوره رانيا الحربي و تنزلوا كل الوروك شوب الكورس سيلابوس في الامثله و التمارين المقرره علينا و غالبا الاختبار ما بيطلع عنها
و الورك شوب كويس انك تتدربي على افكار اكثر

بالنسبة للفيزياء دكتورتي يعني كانت جيده نوعا ما و تحاول تساعدنا قد ما تقدر بس المنهج سهل و لو اساسك كويسه ما حتحتاجي انك ترجعي لمدرسة ابدا مهما كانت استاذتك لان كلها قوانين و تعويض
كنت اذاكر سلايد الدكتورة الاء امام كافيه و وافيه هي الوحيده اللي السلايد حقها حيغنيك عن شبابتر الكتاب و السكشن فيها و فيها تمارين محلوله تفصيليآ و الاجمل انها تحل معانا تمارين السكشن في نفس المحاضره فمااحتاج احضر اي شي !
و افكار حلوه و في اربعه نماذج بحل تفصيلي بموقعها
و كمان ملخصات هناء فرحان اظن و ملزمة النماذج و بكذا ان شاء الله تضمنوا ١٠٠ فيه

مهارات الاتصال قراءه بتركيز ما ياخذ اكثر من نص يوم مذاكرته و لا توسوسوا في الاختبار و حلوا بفهم و خلاص سهله انا ما جاني ابدا اي بونس هذي الماده ما كان فيها اي عدل بين الاستاذات

نفس الشي الحاسب قراءه و تطبيق من السلايد و ما ياخذ وقت و النظري كلب نقصت فيها تماما ٥ درجات و الحمدلله البونس وصلني ١٠٠ اما العملي تافهه جدآ


الترم الثاني بم اني كنت خطه أ

الاحياء المحاضره كانت بريك الشي الوحيد اللي كنت استفيده ان دكتورتي فريال بوقس كانت تأشر بيانات من الرسمات و تحذف لنا الاشياء اللي مالها داعي لكن تعتمد عليك و بس حتتعبوا شويه في الحفظ و ف الاخير الاختبار حيجي سهل جداً
و اكثر ماده جابوا فيها البنات ١٠٠

الاحصاء ماده سامجه و سهله جداً بس قد ايش خوفونا منها !
انا بالنسبه لي كل استاذات الشرفيه كانوا كويسين في الاحصاء انا كنت عند هناء صقر كويسه جداً و تقول الاشياء المهمه و تأشر معانا النظري المهم و تراجع معانا مراجعه كويسه بالنسبه لي مره وحده حضرت سكشن و طلعت من نصه
و الحمدلله جبت فيها ١٠٠ كنت احل مع نفسي و اخذ الحلول من البنات و اللي ما اعرف له اخلي الاستاذه تحله لي بعد المحاضره


الكيمياء كانت تدرسني د.ضحى الهاشمي تكره شي اسمه سلايد و مستواها اعلى مننا فما تشرح كل شي بس تتكلم بشكل عام
و دايما تخوفنا من السلايدز و تقول جيبوا كتاب ! و لا تمسكوا تست بانك !
انا من اول يوم حضرت لجميله الاحمري و طبعت سلايداتها و تست بانك ليلى الحربي و كنت اذاكرهم و ضميري يأنبني من كلام الدكتورة ضحى لانها كانت منسقة فرع الشرفيه بس بعد ما جبت ٣٠ مشيت على ع نفس الشي و قلبي مرتاح و كنت اراجع من ملزمة محمود الزامل جداً رائعه و فادتني و الحمدلله جبت فيه درجه كامله الحمدلله بس انتبهوا التست بانك و السلايدز حق ليلى الحربي فيه اغلاط بسيطه اي شي تحسوه غلط ارجعوا لاستاذتكم تحله لكم !

و انتبهوا من ملخصات يوسف زويل بالنسبه لي في البدايه ضيعت وقتي فيه حيعلمك تحفظوا الحل مو تفهموا و في اشياء ف كل المواد
مو مقرره علينا موجوده و افكار صعبه ما تجي بالنسبه لي ابداً ما افضله !

و بس كانت جميله و حبيت افيدهم انا كمان بتجربتي
اسأل الله ان يوفقكم و يكتب لكم الخير جميعاً

[Amal.]

اول نصيحة حابه اقوللها لكم
ابعدو قد ما تقدرو عن الناس السلبية و اللي بس يحطمو يا كثر ما بتقابلو هذي النوعية
صدقوني في ناس شغلتهم بس يحطمو و المادة صعبة وكيف بذاكر بلا بلا بلا .... !!!
لو قابلتو هذي النوعية حطو سماعات في اذانكم و امشو 😂 و بتتوفقو في حياتكم ويتيسر لكم كل شي بس لا تسمعو لهم ابدا ولا تتأثرو بكلامهم

وهذي اكثر سنه راح تسمعو فيها اشاعات
حقيقي الاشاعات فيها ما تخلص ! عن البونس والكيرف اب خصوصا ف عشان كذا اجتهدو وسووا كل اللي عليكم وربي ما بيضيع لكم تعب ان شاء الله


كثير ناس يقولو خطة أ اسهل من ب
بس بالنسبة ليا الاثنين بنفس المستوى وحتى ب اسهل من ناحية انو تقدر تضمن فيها درجات وهذي الحقيقة مو بس بالنسبة ليا


وبقولكم معلومة مهمة
اختبار تحديد المستوى ما يعتبر مقياس بصراحه !
ف اذا انقليزيتك كويسه حاول تعادل المادة ب اختبار التوفل او الايتلس و بكذا ترتاح من الدوام الطويل وتركز في باقي المواد !
واذا لا منت حاب برضو خيرة لك لأنو كل ما زادت الساعات كل ما كان لك فرصة ترفع معدلك في كل ترم
انا الحمدلله بدأت من لفل تو وكانت خيرة ليا رفعلي معدلي لأنو سهل اما لفل ون ما ينحسب في المعدل
وفي نهاية الترم الثاني صرت فاضيه خلاص بدون انقلش وحقيقي ارتحت وصار عندي ايام اوف


وبالنسبة لكل مادة وكيف تتذاكر وايش مصادرها
انا استفدت من تجربة طالبة طب هنا في المنتدى كاتبة كل ماده كيف ذاكرتها الله يسعدها ويوفقها
تلاقو الموضوع لين ذحين موجود ماراح ازيد شي على كلامها

وانا مستعدة اجاوب عن كل استفساراتكم عن الجامعة وعن المذاكرة و المواد وكل شي

استمتعو بالتحضيري ترا جدا خفيفة وسهله بس خليكم متفائلين وسوو كل اللي عليكم واعرفو تاخذو المعلومة الصح من مين

ودعواتكم لنا في التخصص

[بنت ناس وقلبي ألماس]

وعليكم السلام ورحمة الله وبركاته

الله يعطيك العافية يا عضوتنا الفاضلة زهرة خضراء

ما قصرتي أفدتي أخواتك بذكر تجربتك ونبهتيهم على نقاط مهمة

فشكراً لكِ على هذه المبادرة الطيبة منك


وشكراً أيضاً للأخوات الفاضلات

د/ندو

دانه الكويسه

Amal.

وتم تثبيت الموضوع وإضافة وسام التميز نظراً لجهودكن المبذولة

[Mshaal saad]

السلام عليكم يعطيك العافية على الموضوع
سؤالي بالنسبة للتسكين
مثلا كليه العلوم الطبية التطبيقية طالبين النسبة الخاصة فوق 80 في المواد التالية : انجليزي احياء كيمياء فيزياء صح
اللي مو فاهمه هل كل مادة لازم اجيب فيها بالقليل فوق 80 ولا تجمع المواد الاربعه وتقسم على عددها ومجموعها لازم فوق 80
وفي التسكين هل النسبة العامة هي المعتمدة في التسكين والخاصة شرط ولا كيف طريقتها
شكرا مقدما وان شاء الله ما طولت عليكم بالاسئلة