طريقك الى معدل عالي في السنة التحضيرية، تجربة طالبة طب :)

[Amal Bakhsh]

السلام عليكم ورحمة الله وبركاته



انا طالبة كنت زيكم كنت خايفة مرة من السنة التحضيرية لدرجة انو جاني اكتئاب من قبل ما ابدأ وكان حلمي ادخل كلية الطب ولله الحمد انقبلت فيه، وانا راح اقولكم عن تجربتي وطرق مذاكرتي لكل المواد..



الرياضيات:



1- الكتاب

2- ملخص جمال السعدي

3- الوورك شوب

4- تمارين نهاية كل جزيئة في الكتاب

5- اختبارات سابقة



اول شي كنت اكتب الملاحظات مع الدكتورة وارجع البيت واذاكرها واتأكد اني فاهمة الدرس مزبوط، واذا ما فهمتها اروح للدكتورة اليوم التاني في ساعاتها المكتبية واذا لسه ما فهمت اروح لمدرسة خصوصية اسمها ايمان ( اعطيكم رقمها لو تبغوا) وكانت تفهمني كل شي في ساعة او ساعتين تقريبا.. وارجع البيت واحل التمارين والوورك شوب كامل ومرات كنت اطالع في الملخص بس ما استفدت منه مرة.

بالنسبة للاختبار الدوري الاول كان مررررة حلو وسهل. الدوري الثاني كان صعب بالنسبة ليا لان الجزئية كانت دسمة والنهائي كان يعني نص نص بس لا تشيلو هم ابدا لانه في بونس 10 درجات موزعه على الاختبارات.



الفيزياء:



1- الكتاب

2- ملخص اشرف بركات + ملخص يوسف زويل

3- فيديوهات يوسف زويل

4- حضور السكاشن

5- ملخصات د/ هناء فرحان

6- اختبارات سابقة



اول شي ما كنت افهم ولا شي من دكتورة الفيزياء، بس كنت اكتب ملاحظاتي معاها عشان لا اقعد فاضية، ولمن ارجع البيت اتفرج على فيديوهات يوسف زويل واكتب ملاحظاتي معاه وبعد كدة احل التمارين اللي في ملخص زويل وامر على ملخص اشرف عشان اتأكد انو مرت عليا كل الافكار. بالنسبة للسكاشن هي زي المحاضرات الاختيارية تكون في فترة البريك ويحلو فيها تمارين الكتاب.

وفي النهاية بعد ما اخلص من كل شي اراجع من ملخصات هناء فرحان اللي موجودة في موقعها.

ولا تشيلو هم الفيزياء فيلو 10 درجات بونس كمان :)





الحاسب:



1- الكتاب

2- تمارين عملية ( يبيعوها في المكتبة)



انا حاقدة على دي المادة لانها هي اللي نزلت نسبتي ولاني ما ركزت عليها مرة.

الاختبارات مقسمة عمليه ونظرية وانا عن نفسي كنت اذاكر يومين قبل الاختبار، طبعا انا انصحكم انكم تركزوا على دي المادة.



مهارات الاتصال:







1- الكتاب فقط



المادة دي تعتمد على الاستاذ او الاستاذة، لانه في واجبات وبعضهم يدققوا في التصحيح وبعضهم لا. وحيكون عندكم نشاط جماعي انكم تسوو بريسنتشن، وراح تنقسموا مجاميع، وانا الصراحة حظي كان مو مرك حلو لانه اللي معايا ما كانو مرة متعاونين وما بداو في العرض غير بعد ما انا قلتلهم وقعدت وراهم وراهم ههههههههه





الانجليزي:



1- الكتاب

2-الملف



وكمان الانجليزي يعتمد على الاستاذ او الاستاذة لانه الاستاذة حقتي ما كانت تدقق مرة في الاخطاء بس استاذة صحبتي مرة كانت تدقق.. حاولوا تشاركوا في الكلاس وتحلو التمارين وتسلموا الفايلات في الوقت المناسب وتمشوا ان شاء الله





الاحصاء:



1- الكتاب

2-السلايدات

3- الورك شيت

4- اختبارات سابقة



كتييير بنات اعرفهم كانوا يقولوا الاحصاء صعب. بس انا برأي كان اسهل مادة مرت عليا بعد الاحياء.

استاذتي كانت هديل الرويثي وماشاء الله شرحها جدا جدا حلو ولو البنات ما فهموا دايما كانت تعيد مليون مرة. الله يسعدها يارب هي اكتر استاذة حبيتها.

يمكن الاستاذ او الاستاذة حقتكم حتقول الكتاب مالو داعي وانكم بس تذاكروا السلايدات. بس انا اشوف الكتاب مهم مررررة لانه في تمارين نهاية كل شابتر.

طريقة المذاكرة اني كنت اكتب ملاحظات في الكلاس وارجع البيت اذاكرها واشوف طريقة حل الكتاب واكون فاتحة السلايدات وامر عليها بسرعه وبعد كدة احل الوورك شيت والتمارين.

















الاحياء:



1- سلايدات

2- اسئلة





مادة جدا سهلة واحسن شي انكم تركزوا على السلايدات وقبل الاختبار بكم يوم يحطو اسئلة على موقع الجامعة وتجي 10 منها في الاختبار. ولا تسمعوا اشاعات انكم تسيبوا السلايدات وتذاكروا من التست بانك لان نظام التست بانك وقف من زمان.







الكيمياء:



1- فيديوهات يوسف زويل

2- ملخص يوسف زويل + ملخص السيد

3- اختبارات سابقة

4- سلايدات عائشة مباركي او نهى وزان او ليلى الحربي او اكرام دانش

5- تست بانك ليلى الحربي

الكيمياء سهلة اذا فهمتوها وهي المادة الوحيدة اللي ما اشتريت لها كتاب لانو من جد دسم ومالو داعي.

ما كنت اكتب ولا ملاحظة مع الدكتورة لانها كانت تشرح من السلايدات وبس فكنت ارجع البيت وافتح فيديوهات زويل عشان افهم بعدين احل تمارين الملخص حقه وبعدين احل اسئلة السلايدات. بعدين امسك تست بانك ليلى الحربي واحلها واخر شي امر على ملخص السيد.







وفي النهاية اتمنى انكم تستفيدوا من تجربتي واي سؤال عن السنة التحضيرية او فرع الشرفيه انا حاضرة :)

[Dr.a7med2lharthii]

يعطيكك العافيةةة تجربةة جميلة جدا .. ي رب تعدي السنةة دي علىى خير
لككن اللي ما فهمتوو .. حضور السكاشن و الوورك شيت ممكن اعرف اش معناتوو

[Amal Bakhsh]

المشاركة الأصلية كتبت بواسطة Dr.a7med2lharthii يعطيكك العافيةةة تجربةة جميلة جدا .. ي رب تعدي السنةة دي علىى خير لككن اللي ما فهمتوو .. حضور السكاشن و الوورك شيت ممكن اعرف اش معناتوو

السكاشن هي محاضرة تكون وقت البريك وفيها يحلو تمارين من الكتاب بس ما اعرف لو في سكاشن للطلاب لاني سمعت بس للطالبات بس لو في حتلاقي اعلانات على تاني اسبوع دوام ومكتوب فيها المكان والوقت والخ..

الورك شيت worksheet هي تمارين محلولة لازم تمر عليها لان افكار الاختبار ما تخرج عنها بإذن الله والوورك شوب نفس الشي بالزبط :)

شكرا لمرورك :)

[Mashael Ayesh]

حبيبتتتي الله يعطيك العافيةة يارب ويوفقكي

[Razz]

اول شي مبروك تسكينك ماشاء الله :*
عقبالي بإذن الله السنة الجاية الحقك،،
،،،،،
كيف كانت مذاكرتك يومية او في الويكيند بشكل عام ؟
كم عدد ساعات الدوام عامة..؟، وهل راح احتاج مدرسين خصوصين ولا استاذات الجامعة بيكفوا
وطلب صغنن،، ايمان الي كانت تدرسك هي تشرح مزبوط ؟؟ وابا رقمهاا :$
وبس شكراًً،، والله يوفقك يا دكتورة..

>>> لو جاني استفسار فجأة عادي ارسلك عالخاص ؟

[no0o0oz-a]

السلام عليكم .. بس حابة اكد على شغله وهي اذا إختنا مشيت بطريقتها دي مؤ معناته انو نحن كلنا نسوي مثلها يعني كل وحدة فينا تعرف ايش ألطريقه الي تناسبها وم تضيعها ... انا لاحظت أنها كانت بتزاكر من عدة ملخصات ودا الشيء ناسبها لكن في كثير م راح يمشو كذا بالعكس راح يتشتتو انا افضل انو تشوفو مصدر واحد بالإضافة الى اختبارات السنوات السابقة أو التيست بانك ،، انا مثلا في الرياضيات اعتمدت فقط على الكتاب والورك شيت .والفيزياء ملخصات هناء فرحان ونماذج اختبارات .والكيمياء ملخص اكرام دانش وتيست بانك ليلى الحربي .والاحياء من السلايدات والأسئلة الي ينزلوها بالموقع ، أما الحاسب والاتصال والإنجليزي الكتاب كااااافي ... وبالتوفيق

[Amal Bakhsh]

المشاركة الأصلية كتبت بواسطة no0o0oz-a السلام عليكم .. بس حابة اكد على شغله وهي اذا إختنا مشيت بطريقتها دي مؤ معناته انو نحن كلنا نسوي مثلها يعني كل وحدة فينا تعرف ايش ألطريقه الي تناسبها وم تضيعها ... انا لاحظت أنها كانت بتزاكر من عدة ملخصات ودا الشيء ناسبها لكن في كثير م راح يمشو كذا بالعكس راح يتشتتو انا افضل انو تشوفو مصدر واحد بالإضافة الى اختبارات السنوات السابقة أو التيست بانك ،، انا مثلا في الرياضيات اعتمدت فقط على الكتاب والورك شيت .والفيزياء ملخصات هناء فرحان ونماذج اختبارات .والكيمياء ملخص اكرام دانش وتيست بانك ليلى الحربي .والاحياء من السلايدات والأسئلة الي ينزلوها بالموقع ، أما الحاسب والاتصال والإنجليزي الكتاب كااااافي ... وبالتوفيق

شكرا يا حبيبتي على التوضيح :) صح مو لازم يمشو طريقتي بس انا حبيت اكتب تجربتي الطالبات والطلاب يستفيدوا :) وصح كلامك بس انا كام عندي مصدر واحد اساسي والباقي كنت امر عليها بسرعه يعني اقراها، شكرا لمرورك يا عسل :)

[Amal Bakhsh]

المشاركة الأصلية كتبت بواسطة razz اول شي مبروك تسكينك ماشاء الله :* عقبالي بإذن الله السنة الجاية الحقك،، ،،،،، كيف كانت مذاكرتك يومية او في الويكيند بشكل عام ؟ كم عدد ساعات الدوام عامة..؟، وهل راح احتاج مدرسين خصوصين ولا استاذات الجامعة بيكفوا وطلب صغنن،، ايمان الي كانت تدرسك هي تشرح مزبوط ؟؟ وابا رقمهاا :$ وبس شكراًً،، والله يوفقك يا دكتورة.. >>> لو جاني استفسار فجأة عادي ارسلك عالخاص ؟

ان شاء الله :)
مذاكرتي كانت يومية يا عسل :)
على حسب لو عندك انجليزي تبدأي من 8 وتخلصي على 3 او 4 بس لو ما عندك راح تخلصي على 11 تقريبا على حسب جدولك :)
ايوة ايمان شرحها مرة كويس وهذا رقمها 056xxxxxxx

العفو وايوة طبعا ينفع تسأليني هنا او على الخاص مافي مشاكل :)

[وعد الحارثي]

المشاركة الأصلية كتبت بواسطة amal bakhsh ان شاء الله :) مذاكرتي كانت يومية يا عسل :) على حسب لو عندك انجليزي تبدأي من 8 وتخلصي على 3 او 4 بس لو ما عندك راح تخلصي على 11 تقريبا على حسب جدولك :) ايوة ايمان شرحها مرة كويس وهذا رقمها 056xxxxxxx العفو وايوة طبعا ينفع تسأليني هنا او على الخاص مافي مشاكل :)

الرقم الاستاذه ممكن ترسليه😭😭😭😭😭😭

[Amal Bakhsh]

المشاركة الأصلية كتبت بواسطة mashael ayesh حبيبتتتي الله يعطيك العافيةة يارب ويوفقكي

شكرا لمرورك يا عسل